سائق ميكروباص المرج: «أصبحت عاجزًا عن العمل بسبب جنيه زيادة» (فيديو)

لم يكن أحمد ناصر، سائق الميكروباص الثلاثيني، يتوقع أن يتحول يوم عمل اعتيادي على خط «المرج – ألف مسكن» في القاهرة إلى كابوس، وأن يتحول خلاف على جنيه واحد إلى اعتداء بالسلاح الأبيض كاد أن يودي بحياته.
«جنيه واحد أشعل شرارة عنف غير متوقعة»
ففي ظهيرة 17 أبريل الماضي، كانت الحركة طبيعية في شارع عبدالله رفاعي بمنطقة المرج، حينما نشب خلاف بسيط بين «أحمد» وأحد الركاب بشأن زيادة الأجرة.. زيادة جنيه واحد، كانت كافية لإشعال الشرارة.
«بشتغل على الخط ده من 10 سنين.. يومها كنت واقف بحمّل زي العادة، وكانت الأجرة زادت جنيه، وده كان متعارف عليه بين السواقين والركاب، طلعلي زبون اعترض، قولتله بكل هدوء: (لو مش معاك الجنيه، سيبها يا باشا، ربنا يسهل لك)، لكنه فجأة شد معايا وقاللي: (أنا معايا، بس مش هديك الجنيه.. أنت إيه؟ فاكر نفسك مين؟)»، بحسب شهادة السائق.
الجدال تحول إلى ما يشبه المناوشات الكلامية، لكن «أحمد» يقول إنه لم يتوقع أن تتطور الأمور إلى أبعد من ذلك، خصوصًا بعد أن غادر الراكب السيارة.
«الراجل نزل، وأنا حسبتها خلصت، لكن لقيته بيخبط على جسم العربية جامد، بيضرب على الباب والجناب، قولتله: (أنت مالك ومال العربية؟ حد كلمك؟)»، يروي «أحمد»، مضيفًا أنه فوجئ برد صادم من الراكب: «قالي: (أنا عندي عند البيت، وممكن ما تمشيش من هنا تاني)»، على حد وصفه.
مرت ساعات، لم يظن السائق الثلاثيني أن الرجل سيعود، أو أن التهديد سيتحقق، لكنه عاد، وكان بانتظاره في نفس المكان.. «رجعت أحمل تاني من نفس النقطة، ولقيته واقف، وكأنه بيترصد لي.. بصلي وقاللي: (فاكرني؟ أنا اللي عملت معاك مشكلة قبل كده)»، يقول «أحمد»، مؤكدًا أن الرجل كان بصحبة شخص آخر، وتقدم باتجاه الميكروباص بينما كان أحمد يحمل الركاب.
«طفل شاهد والده يُضرب حتى الإغماء»
هنا بدأت لحظة الرعب الحقيقي، كما يصفها السائق، فصديقه الذي حاول تهدئة الوضع تلقى الضربة الأولى، قبل أن يبدأ هو في تلقي الطعنات.
«صاحبي نزل يتفاهم معاهم، اتضرب على طول، واحد من اللي معاه طلع سنجة، وبدأ يلوّح بيها، وأنا كنت جوه العربية، نزلت عشان أحوش عن صاحبي، لقيته ضربني على دراعي الشمال، ضربة فتحت الكف، وبعدين ضربة تانية على اليمين، كنت بشيل بإيديا.. مش عايز السنجة تيجي في وشي»، بحسب رواية «أحمد».
ما زاد من رعب الموقف أن ابنه الصغير، البالغ من العمر 8 سنوات، كان يجلس بجانبه في السيارة وقت الاعتداء.. «كان ابني طالع من المدرسة، وجاي يقعد معايا شوية لحد ما نخلص الشغل، كان بين رجلي، وبيترجف، وشايف كل حاجة، لما فتحوا باب الميكروباص وضربوني، خفت عليه، زقيته بعيد، قلت يمكن يهرب، أنا خدت الضرب عنه، كنت بتحايل عليهم: (سيبوا العيل، حرام عليكم)»، يضيف السائق بصوت يملؤه التأثر.
«أحمد» يتحدث عن لحظات مؤلمة، حينما شعر بالعجز الكامل عن حماية ابنه أو نفسه.. «كنت بنزف، والركاب جريو، وأنا حاولت أهرب منهم، بس واحد تاني قطع عليا الطريق، وركب العربية وساقها.. كانوا بيتعاملوا معايا كإني عدو، وأنا كل مشكلتي إني سواق فقير مش عارف يلم الجنيه الزيادة»، قال «أحمد» بأسى.
أصيب سائق الميكروباص في ذراعيه وساقه، ودخل في غيبوبة قصيرة، ثم خضع لعمليات جراحية متعددة، يقول إن كفه الأيسر بات مشلولًا، والأصابع لا تتحرك، بينما ذراعه اليمنى مليئة بالمسامير والشرائح المعدنية.
«مبقتش أعرف أمسك رغيف عيش، ولا أركب ميكروباص، ولا حتى أساعد عيالي في لبسهم، أنا راجل مسؤول عن بيت، عندي 3 عيال، دلوقتي عاجز، قاعد في البيت، مستني أهل الخير، أو القضاء ياخد لي حقي»، بحسب ما قاله السائق.
النيابة تتحرك.. والمجني عليه يناشد: عايز حقي وحق ابني
«أحمد» أكد أنه يمتلك مقاطع فيديو من كاميرات المراقبة القريبة توثق لحظة الاعتداء، وقدمها للنيابة العامة.. «أنا مش طالع أشتكي عشان حد يعوضني، أنا طالع عشان القانون، عشان اللي يعمل كده يتحاسب.. أنا روحت النيابة بنفسي لما بدأت أقدر أتحرك، واستجوبوني، وقدّمت الفيديوهات.. وربنا كريم»، يقول «أحمد»
اليوم، وبعد مرور أكثر من شهر على الواقعة، لا تزال حالته الصحية حرجة، وإن كانت تسمح له بالكلام، فقد قرر أن يروي حكايته كاملة، طالبًا الإنصاف، وسرعة ضبط الجناة.. «أنا مش قادر أنسى عيون ابني وهو بيعيط ويقولي: (بابا، إحنا هنموت؟) اللحظة دي محفورة في قلبي. عايز حقي.. حقي وحق ابني اللي عاش لحظة رعب محدش يستحملها»، يختم شهادته.
النيابة العامة بدأت تحقيقًا موسعًا في الواقعة، وطلبت تحريات أجهزة الأمن حول الواقعة حيث بدأت الجهات الأمنية جمع التحريات وتفريغ كاميرات المراقبة.