الآنسة فيلة

النهارده كنت راكب عشان اروح الوحدة الصحية اللي هخلص فيها شوية شغل... ركبت جمبي مدام اربعينية في السن ومائة واربعينية في الوزن على أقل تقدير طبقا لجهاز ريختر.. المهم قعدت جمبي وانا لزقت في الشباك اللي هو كان فاضلي تكة وابقي في الشارع .
لقيتها بكل ادب بتقولي:
ممكن تدخل شوية كمان ؟!
- ادخل فين حضرتك !!...أدخل في الصاج ؟!
حاول بعد اذنك...عشان احط الشنطة مابيننا...عشان ما نلزقش في بعض !!
- طب ماتجيبي قالبين طوب ونبني حيطه هنا احسن !!... وبعدين حضرتك ده مش ذنبي... انا حجمي طبيعي مش مُخالف ومش طالع مني أي بروز عشان يدايقك... المشكله مش من عندي حضرتك.
طب ممكن حضرتك تنزل... وانا هاخد الكرسيين ؟!
- أنزل!! ده ايه البجاحة دي !!!... هو بصي أنا عمري ماتعرضت للموقف ده... ومش عارف بيردوا فيه ازاي... بس كل اللي عارفه اني هنزل... مش عشانك... ولا عشان الشنطه... ولا عشان الصاج... بس عشان رجلي اللي ممكن مع الزنقة دي والمطبات لحد ما أوصل يلتصقوا ببعض وميبعدوش تاني عن بعض..
المهم نزلت.... ووقفت لحد ماركبت ميكروباص غيره وركبت في الكرسي جمب السواق لوحدي ومكنش حد راكب جمبي ساعتها... المهم الميكروباص طلع الكوبري ونزل... وببص لقيت الميكروباص اللي انا كنت راكب فيه... الكاوتش مفرقع والناس نزلت منه... ولقيت الولية التخينة بتشاور للميكروباص اللي انا راكبه.. اللي مكنش فيه مكان فاضي غير المكان اللي جمبي بس... لقيت السواق بدأ يهدي عشان يركبها عشان ميبقاش طالع ناقص نفر.
قولتله بالله عليك اطلع ومتقفش وانا هحاسبلك على كرسيين كمان مش واحد بس... وبالفعل موقفش ..