احترس من ركوب الميكروباص

طيب هو أنا مكنتش ناوي أكتب حاجة عشان مخوفش حد بس النهاردة قابلت واحد صاحبي بالصدفة قالي ان في واحد صاحبه حصله نفس اللي حصلي وفي نفس المكان. من 5 أيام تحديداً يوم الثلاثاء 1 ديسمبر كنت مروح من مساكن شيراتون لمدينة نصر الساعة 11 ونص، وكنت واقف عند أول طريق الأوتوستراد عشان أوقف ميكروباص أركبه، وفعلاً عدى ميكروباص لونه أبيض كله وبستائر من جوه والنمر بتاعته لونها رصاصي (يعني مش أجرة) قلت في عقلي مش مشكلة كتير سواقين على عربيات في شركات بيطلعوا يسترزقوا بعد شغلهم، المهم شاورتله ووقف وركبت، الوضع كان طبيعي جدا في البداية، السواق وواحد قاعد جمب السواق وواحد قاعد في الكنبة اللي وراهم وبعدين الكنبة التانية فاضية وواحد قاعد في الكنبة التالتة، فقعدت أنا في الكنبة الفاضية، وبعد تقريباً 30 ثانية لقيت اللي قدامي بيقفل الستارة اللي جنبه واللي ورايا جه قعد جمبي من ناحية اليمين واللي قدامي نط جمبي من ناحية الشمال وفي ثواني مطوتين اتفتحوا عليا واللي قاعد جمب السواق طلع مسدس، أنا للوهلة الأولى مكنتش مصدق ان دة بيحصلي او قلت اكيد دة كابوس، المهم بدون الدخول في تفاصيل مؤلمة اتسرقت مني كل حاجة كانت معايا ورموني على الطريق، الحمد لله الاصابات كلها سطحية، بس اول ما لقيت اكتر من حد بيقولي ان الحكاية دي اتكررت في نفس المكان ونفس التوقيت ونفس الاحداث تقريبا، قررت ان انا اكتب ايه اللي حصل عشان احذر اي حد بيركب من الحتة في الوقت دة عشان ياخد باله.
أوصاف الاتنين اللي كانوا جمبي واحد منهم قصير ورفيع ووشه معضم بطريقة ملحوظة وعنده سكسوكة سودا تقيلة وشعره اسود مفلفل وقصير ولونه قمحاوي، والتاني طويل واسمر وشكله غلط خالص وشعره لونه مصدي كدة، والميكروباص نفسه تويوتا الموديل القديم لونه ابيض كله وفي ستاير من جوه ونمره لونها رصاصي (انا بس لمحت لون النمر وانا بركب من غير ما اخد النمر) يا ريت يا جماعة تخلوا بالكوا وتحذروا اي حد تعرفوه بيركب من الحتة دي بالليل.
ملحوظة: الصور دي مش حقيقية، دي أمثلة للتوضيح بس