«باع النادي علشان يستفيد».. نجم الإسماعيلي السابق يفتح النار على يحيى الكومي

فتح اللاعب شكري نجيب نجم الإسماعيلي السابق، والمقاولون العرب الحالي، النار على يحيى الكومي رئيس الدرويش السابق، بسبب تدهور النادي في السنوات الأخيرة.
شكري نجيب: زعلان على الإسماعيلي.. و«الكومي» باع النادي بسبب وكلاء اللاعبين
وقال «نجيب» في تصريحاته عبر إذاعة أون سبورت إف إم: «اتربيت ولعبت في الإسماعيلي 13 سنة وكنت أحد قادة الفريق، والجماهير هناك عاشقة متيمة بالفريق، ونفسه يرجع زي زمان».
وتابع: «لكنه قلة الموارد وسوء الإدارة سبب من ضمن أسباب أزمات الدراويش، وبالتالي لو تم توجيه دعم أكبر من الدولة أو تم إدخال الاستثمار في النادي الإسماعيلي هيرجع الدراويش برازيل مصر»
وواصل: «زمان الأهلي والزمالك كانوا بيروحوا يلاعبوا المحلة في ملعبه وكانوا بيواجهوا صعوبات كثيرة، وهي دي متعة وحلاوة الكورة، لكن حاليًا محدش بيتفرج عشان سيطرة أندية الشركات والمؤسسات من سنوات».
وأوضح: «مشكلة الإسماعيلي إدارية ومالية، وعشان كده مفيش استقرار، وبالتالي كل عوامل النجاح مش موجودة لا إدارة ولا أموال ولا مدربين ولا جودة لاعبين عالية، وبالتالي الأمور مش في أفضل أحوالها في الإسماعيلية، ولو بصينا الناحية التانية على النادي المصري ومستر كامل أبوعلى هنشوف الفارق، ورغم وجود رجال أعمال كثيرين لكن ليس لهم دور أو محدش بيساعد عكس ما يحدث في الاتحاد السكندري مثلًا، في الإسماعيلية كله بيدور على مصلحته قبل مصلحة النادي»
وأكد: «النادي فيه فلوس لكن فيه سوء إدارة للأمور، مطلوب يكون فيه حد يكون فاهم في الكورة يتدخل في الأوقات الحاسمة، ممكن تكون مواردك قليلة لكنك تقدر تنافس بالمتاح».
وشدد شكري نجيب: «أنا أجبرت على الرحيل من النادي بعد 13 سنة، بسبب المهندس يحيي الكومي وكلاء اللاعبين، اللي كان كل همه يبيع كل حاجة في النادي عشان يستفيد، ساعتها رفضت اتكلم ومشيت عشان الأجواء مكنتش حلوة، لكني قولت للناس خلوا بالكم النادي رايح في حتة مش كويسة، وكان لازم يبقى فيه تدخل من أساطير ونجوم النادي لإنقاذه».
واختتم: «زعلان على اللي بيحصل للإسماعيلي، سمعة النادي بقت في أدنى مستوياتها، واللاعبين بقت ترفض تلعب للنادي اللي ياما طلع نجوم وأساطير لعبوا أحلى كورة في مصر، والسوشيال ميديا المأجورة بقت مؤثرة بشكل مرعب وبتنجم ناس متستحقش على حساب كثيرين يستحقوا، روحت الاتحاد وقالوا لي النادي فيه فلوس وموارد؟، طب بالعقل كده ليه النادي مش بينافس».