فريدة سيف النصر تطلب من جمهورها استضافة كلب سوسن بدر .. ما القصة؟

عرضت الفنانة فريدة سيف النصر على جمهورها استضافة الكلب الخاص بالفنانة سوسن بدر، بعدما طلبت الأخيرة منها استضافته لكنها أوضحت عدم قدرتها على ذلك.
وكشفت فريدة سيف النصر عن تفاصيل المكالمة التي دارت بينهما حيث كتبت على حسابها على «فيس بوك»: «ياه يا سوسن بقالي كتير ماسمعتش صوتك.. فجأة اتصلت وقالت أنا سوسن بدر يا فريدة، قولتلها يا خبر عاش من سمع صوتك، قالت وحشتيني وعايزة أطمئن عليكي أنتي كويسه قلقت عليكي، قولتلها الحمد لله ليه بجد يا حبيبتي، قالت بطمن عليكي بيقولوا تعبانه والشغل والكلام ده؟ إيه اللي حصل في مشكلة؟ ضحكت وقولت كل سنة وأنتي طيبه قربنا من رمضان الجاي لسه فاكرة أنا كويسة وكله تمام طول ما أنتم حلوين، والحمد لله مافيش أي مشاكل، أنا بحبهم كلهم وأولهم المخرج.. ولادي كلهم ماقولتيش عجبتك سترة؟ قالت آه حلوة جدا.. وأنا داخلة مع طارق لطفي وفي مصر، قولتلها، ربنا يوفقكم يارب ودائما تكوني بخير وتطمني على أخباري».
وأضافت: «اتكلمنا عن بيت العيلة والأيام ولما أبويا سمي أخويا بدر الدين على اسم أبوها.. وأخيرا عندها كلب جديد بيجل زي اللي عندي وأصلا في جولدن زي سيمبا.. ما احنا اتربينا مع كلاب من صغرنا في جنينة بيوتنا، وافتكرنا أمي وأمها جارتنا الفنانة الجميلة أمال سالم، طنط أمال وأمي الصحاب الحلوة وأبويا وقالت لي نروح نفتكر قولت لها ماروحتش من يوم مامشيت أمي ماقدرش.. وافتكرنا حمودة أخويا وعمر أخوها الله يرحمهم راحوا شباب.. واتكلمنا في حاجات كتير».
وأشارت: «اللي يضحك أنها عايزه تسافر وعلشان أنا باحب الكلاب تجيب الست افروديت والسيد روكي البيجل ونشوف نتصرف إزاي.. الحقيقة في عندي ناس دكاترة عندهم مزرعة بيستضيفوا الحالات دي السفر والشغل وهما بيحبوا الكلاب جدا وبيهتموا بيهم، دول اللي اديتهم سفروت وعكروتة الكلاب بتوع (عملة نادرة) اللي خدتهم معايا ماكنش ينفع نسيبهم في الصحراء ست شهور، سفروت حبيبي مات لكن عكروتة ملتزمة بيها عندهم المهم اديتها أرقامهم وحقيقي رغينا كتير».
وأوضحت: «سوزان أختي شرعا في الرضاعة مع سيف النصر أخويا.. وضحكنا كتير.. من المواقف لأني حقيقي بحبها عشرة عمر فبتحمق علشانها بسرعة.. في (الأب الروحي) مثلا زعلت هي من تامر حمزة حبيبي جدا معاشرني أوراق مصرية 7 سنين مخرج منفذ خطير وأخرج الجزء التاني من الأب الروحي، فأنا خدت موقف منه وخاصمته علشانها واعتذرت سبت العمل وهي كملت».
تابعت: «بتقولي هاجيب لك الكلاب اتصرفي، قولت لها أروح بيهم فين فعلا أخوات والله زي الباقيين بالظبط مايفكروش فيا إلا في ورطة، المشكلة الدكرين اللي عندي هايبهدلوا الصغير، ولاني لازم اتصرف لما يحتاسوا وطول عمرهم كده، فأنا بطلب اللي عايز بيجل ولد ويعاملوا كويس ونضمنه أنا هسلمه روكي بتاع سوسن، ووالله لو مش عارفة المشكلة اللي هاتحصل كنت خدتهم، إنما تروح وترجع بالسلامة وتاخد كلبتها اللي معاشراها، لكن البيجل لسه صغير».
واختتمت: «قولت لها ناقصك كلبة بلدي عاجزة زي اللي عندي وتعاني معاناة فريدة.. اللي عايز بيجل روكي ويعامله كويس بيننا وبينكم ربنا قولولي».