بالصور.. أطرف مواقف الأبناء في عيد الأم عبر «فيس بوك».. محمد: فكرته عيد ميلاد أمي بس.. هاميس: ساندوتش جبنة بايت من أسبوعين هدية أخويا.. مامو: لو جبت وردة بلاستيك هنام في الشارع

لا تنتهي مواقفنا الطريفة مع الأمهات خاصة في عيد الأم الذي يستهلك تفكير الكثيرين في الهدايا المناسبة، وروى مستخدمو موقع التواصل الاجتماعي "فيس بوك" مواقفهم الطريفة في عيد الأم عبر صفحة "الكومنت الفصيل".
كيس قلبظ ب 100 جنيه
أحمد رفعت: "وأنا صغير كنت عاوز أجيب هدية حلوة لأمى في عيد ميلادها فضلت أحوش من مصروفى لحد ما حوشت 100 جنيه، فضلت أفكر في هدية حلوة بالسعر ده ملقتش، خطرت لي فكرة طفولية ذكية، روحت اشتريت 4 كراتين قلبظ من اللى بيكسب أجهزة كهربائية وفضلت أفتح في الأكياس وأجمع أجزاء مروحة ومكوة وغسالة وفى الآخر الحمد لله قدرت أجمع أجزاء كيس قلبظ واديته لأمى".
وردة بلاستيك
علق محمد مامو قائلا: "الحاجة زمان قبل عيد الأم بيومين كده قالت لي قسما بالله لو جبت وردة بلاستيك لتنام في الشارع لآخر الأسبوع، جبت وردة طبيعي وأحلى كل سنة وإنتي طيبة يا غالية وربنا يخليكي لينا".
ساندوتش جبنة بايت
وقالت هاميس: "واحنا صغيرين ماما قالت لنا الهدية مش بكتر فلوسها لا دى بمعناها والله لو جبتولى حتى سندوتش جبنة لهكون فرحانة جدا بيه، قام أخويا ما كدبش خبر وجاب أحلى سندوتش جبنة بس المشكلة إنه جابه قبل عيد الأم بأسبوعين وقدمه يوم عيد الأم".
دخلتى عليكى بالدنيا
وقال طلعت قنديل: "لأ.. أنا أمي بتقولي مش هتجبلي حاجة في عيد الأم؟ قولتلها عيب يا حبيبتي تقولي كده.. أنا دخلتي عليكي البيت سليم وكويس بالدنيا وما فيها.. قالت لي: حسبي الله ونعم الوكيل.. عمرك ما فتحت نفسي.. وعدى اليوم عادي جدا".
عيد أمي بس
وعلق محمد رجب قائلا: "كنت صغير في ابتدائي كده المهم إنى كنت مفكره عيد ميلاد أمى بس.. المهم كان عندى بلي كتير أوووى كنت لعيب بعته كله جبلي نحو 12 جنيه وده كان مبلغ رهيب، وكنت محوش نحو 3 أو 4 جنيه رحت جبت زينة وجبت 2 تورتة وشمع وجبتلها 2 بوك وبرواز وخاتمين حلوين كده.. المهم أفتكر إنى جبت حاجات كتير بال16 جنيه دول باين، جيت اعملها مفاجأة بقا بقولها كل سنة وأنت طيبة ياماما.. قالت لى: وأنت طيب.. فأختى فاجأتنى وقالت لى: ده مش عيد ميلاد أمك بس ده عيد لكل الأمهات.. صدمتنى وزعلت ع البلي أوووى.. كان تجميع سنين لعب.