أمبارح حصلت لى مفاجأة خليتنى طايرة من الفرحة من السعادة والله يا جماعه الفرحة اللى فرحتها ما فرحتهاش من يوم ما الزمالك آخد آخر بطولة ليه أحكى لكم بقى وأفرحكم ... إمبارح قبل العصر كده لقينا طنط منى صاحبة ماما بتتصل وتقول إنها جاية لنا، طبعاً مش دى المفاجأة ما طنط منى دى مشرفة عندنا كل أسبوع، عاملة كده زى حقنة التراى بى اللى امى بتاخدها كل يوم سبت المهم علشان ما أطولش عليكم ماما قالت لى قومى طلعى كيس فراولة من الفريزر علشان يلحق يفك على ما طنطك منى تيجى، وبفتح الفريزر علشان أطلع الكيس وألاقى لكم .. والله ما هاتصدقوا ... لقيت 6 اكياس طماطم كل كيس فيه ما يقرب من 2 كيلو .. اه والله الطماطم ام 8 جنية الكيلو و عند ابو احمد الحرامى بعشرة و اتناشر كمان، أتارى الست أكياس دول كانوا مستخبيين ورا الفراولة ومش باينين أكمنهم حمر زى الفراولة المهم انى بعد ما فوقت من الصدمة و قدرت أتوازن ما بقيتش عارفة اوصل الخبر السعيد ده لأمى إزاى .. أحترت يا جماعة، أقولها لها بطريقة مباشرة و لا فى الأول أمهد لها وأجيب لها الخبر واحدة واحدة، ولا أنده حد من الجيران يقول لها هو علشان لو جرى لها حاجة من الفرحة ما تبقاش نهايتها على أيدى أنا وأعيش بذنبها العمر كله، المهم توكلت على الله و قولت ادخل عليها و اقول لها و اللى يحصل يحصل، بس زياده فى الاطمئنان كلمت اخويا و قلت و انت جاى من الشغل هات لنا معاك مهدأ لماما - ليه بس خوفت اقوله على السبب لحسن من فرحته يمشى مذهول فى الشارع و تخبطه عربية لا قدر الله قلت له لأ اصل طنط حنان جارتنا اللى فوق وقعت من البلكونة و هى بتلم الغسيل و الاسعاف جت شالتها و انا خايفه يجرى لها حاجة فماما تتصدم من الخبر قالى و هى يعنى ماما كانت بتقبلها ما هى على طول قرفاها بغسيلها اللى بينقط علينا و كل يوم فى خناق و مشاكل قلت له يا حبيبى ما انا خايفه على امك من الفرحة لما تعرف انها خلصت منها و الى الابد، وقومت علشان اقول لماما و انا كلى امل انها تقدر تتماسك بعد ما تسمع الخبر الجميل ده، ما هو مش معقولة خبر الطماطم يكون أصعب من يوم ما لقت كيس لحمة مستخبى فى قعر الفريزر و أحنا أخر الشهر يومها الدمعة كانت هاتفر من عينها يا حبيبتى يا ماما ، ولا يوم ما راحت السوق و أكتشفت أن فى بياعه بتبيع الجرجير الحزمتين بنص جنية وعليهم واحدة بقدونس هدية، يومها الناس اللى رجعوها لنا البيت قالوا لى انها اغمى عليها و فوقوها 3 مرات و بعد ما قامت اصرت تشترى بكل الفلوس اللى معاها جرجير أصله الجرجير الحزمة بقت بنص جنية وهما 10 جرجيرات مش أكتر والبقدونس شرحه والحزمة مفيهاش غير 6 أعواد بس المهم دخلت عليها و قلت لها ماما عندى خبر حلو و خبر وحش ... قولى الحلو الاول لأ هاقول الوحش أكياس الفراولة اللى فى الفريزر نقصوا 6 اكياس - ايه ليه راحوا فين شربتيهم يا طفسة و انتى عندك حساسية لأ و الله - يبقى اتفزلكتى وعملتى بيهم حاجة حلوة علشان منى هى طنط منى غريبة علشان أعملها حاجة حلوة دى صاحبة بيت - طب يا بنتى ما تعتبرينا احنا كمان اصحاب بيت وترحمينى أنا وأخوكى من إختراعاتك يعنى هو ده وقته . هاتسيبينى اقولك الخبر الحلو و لا لأ - قولى يا وش السعد قلت لها الاكياس طلع فيها طماطم مش فراولة، ولقيتها فجأة سكتت وما بتردش ... أيه ده ماما ماما مالك يا حبيبتى ماما ردى عليا أوعى يجرى لك حاجة - يجرى لى حاجة و اسيبكم تتهنوا بالطماطم لوحدكم الحمد لله انتى كويسة - اه كويسة وراحت راقعة زغروطتين تصدقوا يا جماعة الناس اللى جم يهنونا بعد ما سمعوا الزغاريط وشافوا فرعين النور اللى علقناهم من الفرحة أكدوا أن الإكتشاف ده أهم من أكتشافهم أن صلاح عبد الله هو اللى دبر الحادثة بتاعة نور الشريف فى مسلسل الدالى أنا كنت هانزل الموضوع ده إمبارح بس من ساعة ما الخبر أتعرف و أنا مش ملاحقة على التليفونات، العاشرة مساء والقاهرة اليوم ومصر النهاردة والحياة اليوم و90 دقيقة كلهم بيتسابقوا علشان يعملوا معايا حوار، ده غير مدحت شلبى من إمبارح وهو قارفنى عايزنى أطلع معاه فى مساء الأنوار بيقول هايجيبنى ويكنسل لقاء مرتضى منصور، ده حتى أستاذ إبراهيم حجازى أكد لى أنه على إستعداد يلغى الحلقة اللى عاملها علشان حرب اكتوبر يوم الأربعاء ويعمل معايا حلقة خاصة بالمناسبة دى بس انا بصراحه ما وافقتش، أصلهم مصرين أجيب معايا الأكياس علشان يتصوروا معاهم وأنا بينى وبينكم كده خايفة عليهم من الحسد على فكرة الخبر هاتلاقوه نازل فى المصرى اليوم ( ههههههههههههههه ) الصحفى بيقول إن الإكتشاف ده أعظم أكتشاف حصل من بعد أكتشاف مقبرة توت عنخ آمون وأن ده يعتبر أهم حدث فى 2010، وفيه كوادر تعليمية رفيعة المستوى طالبت بأنه ينزل فى كتب التاريخ إبتداء من الطبعة الجديدة ان شاء الله أخر حاجة أحب أقولها لكم أننا أخيراً هانعمل محشى وعقبال عندكم كلكم يا حبايب .
