«أسف لنفسي مرة ثانية».. مسلم يعلن فسخ خطوبته من يارا تامر.. ما القصة ؟

أعلن مطرب المهرجانات الشعبية مسلم، عن فسخ خطوبته للمرة الثانية من يارا تامر وذلك بعد عودتهم خلال الشهور الماضية .
ونشر «مسلم» ستوري عبر «انستجرام»، وكتب: «محتاج أقول حاجة يمكن مش هتكون مهمة أوي للناس، دلوقتي لأن حاسس أن الناس زهقت من الموضوع ده بس حبيت اوضح عشان ضميري قدام ربنا.. تم فسخ خطوبتي من يارا تامر».
وأضاف، قائلا: «أتمنى لي حياة جميلة ونجاح واستمرار، لأن حاولنا كثير وأنا خسرت كثير أوي من حياتي ووقتي قصاد التجربة دي وفشلت، والحمد لله بحمد ربنا إنه بين لي كل حاجة تخليني أبقى في حالي، وأبعد وأسف لنفسي مرة ثانية، والمرة دي بجد تعلمت الدرس، شكرًا المرادي اتقفل الموضوع نهائي».
مطرب المهرجانات مسلم: رجعت أنا وخطيبتي
كشف مطرب المهرجانات مسلم، ابريل الماضي، عن تفاصيل عودته لخطيبته السابقة يارا، والتي انفصل عنها بعد أيام قليلة من إعلان الخطوبة.
وأعلن مسلم حصريا لبرنامج «أسرار»، الذي تقدمه الإعلامية أمير بدر على شاشة «النهار»، أنه عاد مرة أخرى لخطيبته السابقة والتي وقفت بجانبه كثيرا.
وأضاف مسلم: «خطبت بعد طلاقي ب 7 شهور، لأني حبيت من قلبي مش بعقلي واختيار قلبي، والمرة اللي فاتت كانت اختيار الناس وأني اقعد في البيت واتجوز وممشيش غلط، وكلنا بنغلط وكلنا خطائين، واللي خطبتها من برا المجال ومحترمة من عيلة، واتظلمت معايا، وكانت بتستحمل، والناس افتكرت انها اخدتني من طليقتي وابني».
واستكمل مسلم: «أنا معملتش حاجة غلط وعملت خطوبة زي أي بني آدم ومجرحتش حد طليقته بالخطوبة اللي عملتها، وراعيت مشاعرها وعمري ما هجرحها لأنها ام ابني، وكنا مطلقين ومش قايلين لحد، ولما بدأنا نشوف حياتنا قولنا نعلن عشان الناس تعرف، الناس قالت خطوة سريعة، ولكن حسيت مع خطيبتي بحاجات محستهاش مع اللي قبلها، حبيت أن ثقتي في نفسي زادت وقبل كده مكنتش عايش حياة».
وأضاف مسلم أنه عاد مرة أخرى لخطيبته بعد إعلانه فسخ الخطوبة: «ده تسرع مني وأنا اللي نزلت اننا فركشنا وفي ناس قالت بغيظ طليقتي ولا محتاجة أعمل تريند عشان اتشهر، بندم اني عرفت للناس تفاصيل حياتي الشخصية بس اتعلمت، وأنا بني ادم عايز احب واعمل اسرة وحياة».
وقال مسلم: «احنا رجعنا لبعض لاننا مستحملناش نبعد عن بعض ومرضيناش نقول إننا رجعنا، عشان الناس متفكرش نعمل لقطة ولا تريند، ومش حابب حد يحطها في الحتة دي لأنها أنضف من كده، وناوي اننا نعقل ونكبر ومنتسرعش في أي حاجة بعد كده، أنا اللي اتقمصت شوية وموقف حصل ولكنها مسابتنيش ومسابتنيش زعلانة في عز منا غلطان، احترمتها».