«فضلنا نهز بعض».. «فتاة الطالبية» عن قتلها شاب: «ضربني بالشبشب»

قالت فتاة الطالبية الشهيرة ب«هند جرجير» المتهمة بقتل شاب يُدعى «خالد»، فرد أمن، أمام النيابة العامة جنوب الجيزة، إنّها استلت سكينًا من «فرشة» الخضار محل عملها، وسددت له طعنة نافذة في الصدر، إثر وقوع خلاف بينهما على أولوية ركوب «توك توك».
وأضافت المتهمة، في تحقيقات النيابة التي حصلت «المصري اليوم» على نسخة منها: «أنا لما لقيت المجني عليه ضربني بالشبشب وبيجري ورايا، وأنا كنت بحاول أستغيث بالناس جريت على (الفرشة) وجبت السكينة وفضلنا نهز بعض ونهوش في بعض، ورحت ضربته بيها ضربة».
وتابعت قائلةً: «أنا بعد لما سلمت نفسي في القسم إمبارح، سألوني على السكينة اللي عورت بيها اللي مات قولتلهم في المباحث أنها موجودة على «فرشة» الخضار بتاعتي والمفروض أنهم بعتوا حد من المباحث علشان يجيبها من هناك».
وإلى نص التحقيقات:
س: ملك من السلاح الأبيض المعروض عليكي الآن؟
ج: معرفش مش هو ده اللي أنا ضربته بيه.
س: ما قولك فيما قررتيه سلفًا من أنّ السلاح المستخدم هو سلاح ذات مقبض بلاستيكي أبيض اللون والسلاح المضبوط والمعروض رفقتك الآن هو سكين ملفوف بلاصق أبيض اللون؟
ج: السكينة اللي أنا ضربته بيها، إمبارح كان إيدها بلاستيك بيضاء، ومش هي المعروضة عليا دلوقتي.
س: وأين كنتي تحتفظي بذلك السلاح حال ارتكاب الواقعة؟
ج: أنا بحطه على «فرشة» الخضار بتاعتي، علشان أنضف الخضار بيه.
س: وهل ذلك السلاح هو المستخدم في إحداث إصابة المجني عليه؟
ج: لأ.
س: وأين يتواجد السلاح المستخدم في الواقعة محل التحقيق؟
ج: أنا بعد لما سلمت نفسي في القسم إمبارح، سالوني على السكينة اللي عورت بيها اللي مات قولتلهم في المباحث أنها موجودة على «فرشة» الخضار بتاعتي والمفروض أنهم بعتوا حد من المباحث علشان يجيبها من هناك.
س: ومتى أشهرتي ذلك السلاح في وجه المجني عليه وقمتي بضربه؟
ج: لما لقيته بيجري ورايا، وأنا كنت بصوت وبستغيث بالناس ومش عارفة أعمل إيه وخايفة يعورني جريت على «الفرشة» وجبت السكينة.
س: وما الملابس التي كنتي ترتديها آنذاك؟
ج: نفسي لبسي اللي أنا لابساه دلوقتي، عباية سوداء ونفس الشبشب.
س: وما هي الملابس التي كان يرتديها المجني عليه؟
ج: هو كان لابس طقم عادي بنطلون «جينز» و«كوتش» ومش فاكرة كان لابس إيه من فوق، بس تقريبًا كان لونه لأما أخضر أو أسود وكان بنص «كوم».
س: وما هي الأفعال المادية التي آتيتيها في إحداث إصابة المجني عليه؟
ج: أنا لما لقيته ضربني بالشبشب وبيجري ورايا، وأنا كنت بحاول أستغيث بالناس جريت على «الفرشة» وجبت السكينة وفضلنا نهز بعض ونهوش في بعض، ورحت ضربته بيها ضربة.
س: كم عدد الضربات التي كلتيها للمجني عليه؟
ج: أنا شكيته شكه واحدة بالسكينة.
س: وأين استقرت تلك الضربة؟
ج: في صدره من الناحية الشمال.
س: وبأي شئ تعديتي على المجني عليه آنذاك؟
ج: بالسكينة اللي كانت معايا على «فرشة» الخضار بتاعتي.
س: ولماذا قمتي باختيار ذلك الموضع من جسده للتعدي عليه به؟
ج: إحنا كنا بنهوش بعض، وزي ما طلعت الضربة مني مكنتش أقصد أضربه في حتة معينة، وكان كل همي إنه ميعورنيش ب«المطواة» اللي كان ماسكها في إيده.
س: وبأي يد كنتي ممسكة بذلك السلاح الأبيض؟
ج: بإيدي اليمين.
س: وما موقفك من المجني عليه وموقف الأخير منكي بُعدًا، ومستوى اتجاهك حال تسديدك لتلك الطعنة له؟
ج: هو كان وشه في وشي، وفي نفس المستوى بتاعي وكانت المسافة طول إيدي.
س: وما المسافة التي كانت تفصل بينك وبين المجني عليه آنذاك؟
ج: هو كان قريب مني أوي حوالي خطوة.
س: وما سبب تسديدك لتلك الضربة للمجني عليه؟
ج: علشان كنت خايفة منه علشان كان ماسك «مطواة» في إيده، كنت خايفة يعورني بيها.
س: ومن أين استحصل المتوفى إلى رحمة مولاه على السلاح الذي كان بحوزته كما قررتي لنا سلفًا؟
ج: هو طلعها من جنبه، وكان ماسكها في إيده وعايز يعورني بيها.
س: وما حالة الضوء والرؤية في المكان محل الواقعة آنذاك؟
ج: المكان كان منور، علشان إحنا كنا قبل صلاة الجمعة.
س: وما رد فعل المجني عليه عند قيامك بإحداث إصابته؟
ج: هوا جري ورايا، وكان فايق وبعد كام خطوة أنا وقعت وهو وقع على الأرض.
س: وما تصرفك حيال ذلك؟
ج: أنا بعدما ضربته الضربة دي جريت منه، علشان كنت خايفة يعوروني ب«المطواة» اللي كانت معاه.
س: وهل حاول المجني عليه مقاومتك؟
ج: إحنا كنا عمالين نهوش بعض، وهو مكنش فاكر إني هضربه الضربة دي وهي جت فجأة.
س: وما الذي حدث عقب تسديدك لتلك الضربة للمجني عليه؟
ج: هو جري ورايا ب«المطواة» اللي كانت في إيده، وكان عايز يعورني زي ما أنا عورته ومرة واحدة أنا أتكعلبت ووقعت على الأرض، وهو كمان وقع بعدما جري ورايا شوية وصاحبه قومه من على الأرض، ووقف «توك توك» وركبوه ومشيوا.