جريمة في العيد.. بائعة جرجير تقتل شابا بالسكينة وتعترف: «هو اللي ضربني بالرجل الأول»

حصل موقع 'أهل مصر' على اعترافات المتهمة 'هند.ج.ر' وشهرتها 'هند جرجيرة' 30 عاما، في اتهامها بقتل الشاب 'خالد محمد.أ' 24 عاما، بمنطقة الطالبية في ثالث أيام عيد الفطر، إثر مشاجرة نشبت بينهما بسبب الخلاف على أولوية ركوب التوكتوك.
جريمة في ثالث أيام عيد الفطر
وقالت المتهمة: 'اللي حصل أن أنا شغالة على عربية كارو ببيع خضار في شارع العروبة قدام صيدلية الحسيني وإمبارح الجمعة الصبح قبل صلاة الجمعة حوالي الساعة العاشرة لقيت توك توك واقف قدام الصيدلية فندهت على السواق اللي سايق التوك توك عشان يوصلني بيتي عشان أروح أغير واتشطف في البيت اللي أنا ساكنة فيه'.
وأضافت المتهمة في اعترافاتها: 'لقيت مرة واحدة اتنين شباب دخلوا نطوا في التوك توك وركبوا وقالوا للسواق اتحرك تعالى وصلنا راح سواق التوك توك رد عليهم وقالهم أنا معايا ناس رحت أنا رايحة عليهم راح واحد من الاتنين اللي ركبوا في التوك توك شتمني شتيمة مش كويسة رحت أنا رديتلوا الشتيمة راح ضربني بالرجل في رجلي رحت موطية وقلعت الشبشب من رجلي ومسكته في أيدي وكنت عايزة أضربه بيه على وشه راح واخده من أيدي وضربني بيه على رأسي واللي كان راكب التوكتوك معاه قاله عورها ياض'.
تفاصيل الحادث
وتابعت المتهمة: 'سواق التوك توك كان واقف بيحوش وكان في شخصين تاني ماشيين في الشارع بيحوشوا وأنا كنت بصوت ومش لاقيه حد ينجدني منه، رحت فلت منه ورحت على فرشة الخضار بتاعتي جبت سكينة صغيرة اللي بقطع بيها الخضار ورجعتله تاني وأول ما دخلت عليه طلع مطواه من جيبه وأحنا الاتنين كنا بنتنطط قدام بعض'.
واستكملت: 'الناس كانت بتحاول تحوش وأنا كنت خايفة لحسن يعورني وكنا ساعتها بنجري ورا بعض قدام محل كهربائي بتاع واحد اسمه عبده القط قدامه الناحية التانية عطارة الحسيني رحت ضرباه بالسكينة في قلبه وساحبة السكينة تاني راح هو طلع يجري ورايا وساعتها أنا اتكعبلت وهو وقع ورايا راح صاحبه جاي وشاله من على الأرض ووقف توكتوك تاني وركب جمبه ومشيوا'.
وأضافت: 'بعدها على طول رجعت عند فرشتي ودخلت العربية الكارو اللي عليها الخضار في جراج في شارع العروبة اللي بجرج فيه وكنت مروحة على بيتي لقيت ناس في الشارع بتقولي المباحث بتدور عليكي رحت رايحة على قسم الطالبية بنفسي وسألوني على اللي حصل قولتلهم على اللي حصل وسألوني على السكينة قولتلهم السكينة على فرشة الخضار وفي حد من المباحث راح جابها'.