«الأهلي معندوش أساطير إزاي!».. إبراهيم عبد الجواد يفتح النار على ناصر ماهر

فتح الإعلامي إبراهيم عبدالجواد، النار على ناصر ماهر، صانع ألعاب الفريق الأول لكرة القدم بنادي الزمالك، وذلك بعد حواره في برنامج «اللعيب»، المذاع عبر فضائية «ام بي سي مصر».
وقال عبدالجواد، في تصريحات تلفزيونية عبر فضائية «أون تايم سبورتس 2»: «التصريحات التلفزيونية وتصريحات السوشيال ميديا، بيبقى فيها أمور بعيدة عن المنطق والموضوعية كان آخرها تصريحات للاعب الزمالك الجديد والأهلي الأسبق ناصر ماهر».
وأضاف: «لما سمعت كلام ناصر ماهر، استوقفني أكثر من نقطة جانبه فيها التوفيق تمامًا أولهم إن الأهلي مفيهوش أساطير ونادي الزمالك هو الفريق الوحيد حاليًا اللي فيه أساطير مستشهدًا بشيكابالا وعبدالله السعيد، طيب محمد الشناوي، اللي حارس مصر الأول منذ 6 سنوات وأكل الأخضر واليابس مع النادي الأهلي، إيه ظروفه! طيب أحمد فتحي، اللي مقفل اللعبة، فاز بثلاث بطولة كأس أمم إفريقيا ولعب كأس العالم للشباب ولعب أوليمبياد وفاز بكل البطولات مع الأهلي».
وتابع: «اللي مالوش خير في أهله مالوش خير في حد، واللي مالوش خير في النادي اللي رباه عمره ما هيكون ليه خير في النادي اللي هو رايحله».
وواصل: «ليه عشان نعظم في شأن طرف نقلل من الطرف الأخر؟ ليه عشان نعظم من شأن الزمالك نخسف بالأهلي الأرض أو العكس؟، عبدالله السعيد، اللي هو فعلًا أسطورة وعمل كل حاجة مع الأهلي ومنتخب مصر لا بجرؤ أن يقول هذه التصريحات، لأنه عارف قيمة الكلام والكبير مبيقولش أي كلام».
وأكمل: «الكلام ده يا ناصر، ممكن يخليك تكسب عقول بعض الجماهير بعض الوقت، لكن صدقني اللي يخليك تكسب حب واحترام جمهور الزمالك هو عرقك ومجهودك داخل أرض الملعب وإزاي تساهم مع الفريق في تحقيق بطولات ده اللي هيخليك تستمر في قلوبهم وعقولهم إلى أبد الضهر، لكن مهما قصفت جبهات وقولت تصريحات نارية وتصريحات فيها زغزغة لقلوبهم وعواطفهم ده ممكن يديك 10 أو 20 متر لقدام ولكن لو مستواك مش كويس هما أول ناس هيطالبوا برحيلك وهيقولوا انت عالة على الفريق».
واسترسل: «نفس القصة عملها إمام عاشور، بعد انتقاله للأهلي، يا جماعة الجمهور زكي، عقلك وقلبك مش هيتبدل في يوم وليلة الناس هتحترمك لما تكون بترضي ربنا في أكل عيشك وترضي المكان اللي أنت بتاكل منه عيش وفاتح بيتك وتصون الجميل للمكان اللي كنت فيه، احترموا عقول الناس، ودي العقلية اللي بيتكلم عليها محمد صلاح».
وأتمّ إبراهيم عبدالجواد، تصريحاته، قائًلا: «اللي أنا بقوله ده حبًا في ناصر ماهر، واللعيبة اللي عندهم مواهب كبيرة ولكن للأسف الشديد بعض التفاصيل في تفكيرهم وشخصيتهم ممكن تاخدهم لسكة يبقوا مهوسين بالسوشيال ميديا وناسيين إن شغلهم الأساسي أرض الملعب».