الطفل «محمود» يودّع أمه قبل قتله على يد جاره «أكلك حلو يا ماما» (فيديو وصور)

في تمام الرابعة، حل موعد زيارته بالمستشفى.. كان والداه أمام غرفته، استقبلهما الممرضون، أحدهم قال للأب: «تعالى معايا ابنك تعبان شوية، هننزل الدور الأرضى»، وباقتراب الأم من طبيبة رتبت على كتفها تواسيها: «شدّى حيلك، البقاء لله»، دوى صراخها عاليًا: «جاية أزورك يا محمود، يا وحيدى وسندى، مش جاية أشيل جثتك».
والدا «محمود»، الطالب بالصف الثانى الإعدادى، نزلا إلى الثلاجة، الابن كان ممدًا، الابتسامة تعلو وجهه، كأنه «عريس»، وقفًا يناجيانه ويترجان فيه: «قوم يا حبيبى، الامتحانات قربت، هنحقق لك حلمك هتكون ضابط»، ثم يندبان حظهما «دا طيب، وسلك خناقة بين (سيف)- جارنا بمنطقة المناشى بالوراق في الجيزة- وهو طفل زيه، وعيل تانى من نفس سنّهما، فالأول ضربه بطوبة مرة لما تفادها ضربه بواحدة تانية جت في ودانه، وراح المستشفى ودخل في غيبوبة لحد ما مات».
الطفل «محمود» وعد عمه «أحمد»، يوم الواقعة بقوله: «خلاص يا عمو آخر يوم هشتغل معاك، علشان داخل على امتحانات»، يقول العم «كان بيساعد أسرته وشغال معايا بمحل دراى كلين، وبَعَتّه لزبون، ومفيش 10 دقائق راح ورجع لقيته ماسك ودانه اليمين وبيصرخ، سألته: مالك يا حبيبى؟.. أجاب متألمًا: (كنت ماشى لقيت (سيف) بيضرب ولد تانى، ولما حجزت بينهم هو اتضايق لأن الولد جرى منه، فحدفنى بطوبة مجتش فيّا، قام حدفنى بواحدة تانية هي اللى أصابتنى)».
وصل العم بابن شقيقه إلى صيدلية قريبة يستغيث: «عاوز حاجة تنزل الورم دا؟»، أخبره صيدلانى: «اجرى بيه على المستشفى، لأن اللى ظاهر قدامنا مجرد إصابة ظاهرية ومنعرفش إيه اللى جوا»، ليحمله إلى مستشفى قصر العينى ليرى عذاب الطفل «محمود» أمامه: «فضل يتشنج ورجله لفت على بعضها، والدكاترة قعدوا يدوله مسكنات ومهدئات مرة واتنين وتلاته وتنتابه ذات الحالة، حتى إنه تقيأ بطريقة هستيرية كأنه أخرج كل ما في معدته منذ نعومة أظافره».
لم تكن تعلم والدة «محمود» بما دار، حتى تلقت اتصالًا من شقيق زوجها يخبرها: «تعالى المستشفى ابنك متعور، ومحتاج هدوم يغيرها»، قالت الأم: «أول ما شوفت ابنى قلت دا ميت!، واستمرت حالته بغيوبة 20 يومًا لم يفق منها إلا بوفاته، يوم زيارتنا الأخيرة له».
والدة المجنى عليه، طيلة احتجاز طفلها بالمستشفى «بين الحياة والموت»، وفق كلامها: «مكنتش عاوزة أعمل محضر، لحد ما ابنى مات، وطلبوا منىّ تحرير محضر للاشتباه بوفاته وابنى جثته اتشرّحت»، مُنهارة: «الطفل اللى ضرب ابنى دا ضحية تربية والديه، كنت بقول بلاش محضر لحد ما يقوم بالسلامة، لكنه دخل على القبر».
الأم تتذكر كلمات ابنها الأخيرة إليها يوم الواقعة: «كان بيقوللى: أكلك حلو قوى يا ماما»، تدمع عيناها «شكله عرف إن دى آخر مرة يذوق فيها أكل من إيدى»، تطالع صورته مرتديًا بذلة «عريس زفيته للجنة، جنازته طوب الأرض مشى فيها».
والد «محمود» اعتزل الناس جراء الحزن الذي ألم به «دا ابنى الولد الوحيد، سندى وحياتى كلها»، يطالب «عاوز أقصى عقوبة على الجانى، كنا نرأف به كطفل، لكننا وجدناه ينكر ما فعل ويقول إنه خرج مع ابنى من المدرسة ومكانش يقصد يحدفه بالطوبة!، والواقعة حدثت في ال7 مساءً بتوقيت لم تكن به دراسة، وولدى كان يعمل لدى عمه بمحل الدراى كلين».
أسرة المتهم غادرت القرية محل الواقعة، وقال عدد من الأهالى إن الطفل المتهم كان سلوكه سيئًا وشقيقه أيضًا سبق أن دهس سيدة العام الماضى ب«موتوسكيل»، كان يقوده بسرعة جنونية.
أجهزة الأمن ضبطت الطفل مرتكب الواقعة، وأمرت النيابة العامة بإيداعه إحدى دور الرعاية الاجتماعية، وطالبت بتشخيص حالته من قبل الجهات المختصة واستدعاء والديه وشهود العيان وتفريغ كاميرات المراقبة بمكان الواقعة.