«خس أوي ومكانش ليه طلبات كتير»..أحمد مدحت يكشف تفاصيل الأشهر الأخيرة ل هشام سليم

لا تزال أصداء وفاة الفنان الكبير هشام سليم بعد صراع مع مرض السرطان عن عمر يناهز 64 عامًا تلقى بأحزان تتجدد على جمهور وعلى زملاءه في الوسط الفني، وخاصة لصناع الأعمال الفنية الذين عملوا معه واقتربوا منه.
وكشف المخرج أحمد مدحت عن تفاصيل بينه وبين الفنان الراحل هشام سليم، وقال عبر حسابه الشخصي على موقع التواصل الإجتماعي «فيسبوك» :«في 2017 رشحت هشام سليم عشان يقف أمام طارق لطفي في مسلسل «بين عالمين» والناس كانت شايفة أن الكاست بتاع المسلسل غريب شوية إلا أن المسلسل نجح جدا وكان دور غريب اوي على هشام سليم وبيعمل فيه دور شرير من منطقة جديدة عليه وابتدينا نفهم بعض اكتر«.
وتابع المخرج أحمد مدحت: بعد كده اشتغلنا مع بعض في 2018 مسلسل «اختفاء» والحمد لله المسلسل نجح ورشحته في مسلسل «الثمانية» كضيف شرف وبالفعل حضر جلسة التصوير الفوتوغرافي اللي باعملها قبل أي عمل وخدوا مقاسات الملابس إلا أن محصلش نصيب انه يكمل واعتذر لظروف مرضه، من وقت مسلسل بين عالمين اتكونت مجموعة جميلة اللي كانوا في المسلسل ونشات بينهم روح حلوة ودايما اللي كان بيجمعنا فيدرا.
وأضاف مدحت عن علاقة الصداقة والإنسانية مع هشام سليم قائلًا :«ابتدي يبقي فيه علاقة على المستوي الإنساني بيني وبين هشام نتقابل في مهرجان الجونة ويجيني الجونة واروحله الغردقة ونتكلم ساعة ماتشات برشلونة ونتكلم على ميسي واشتكيله من حبة حاجات وهو كمان، كان متعود يطلع رحلات صيد مع احمد زيتون مدير التصوير وكانوا يقولولي بس انا ماليش في الصيد لكن كان بياخدني بالمركب بتاعته المحمية على بعد نص ساعة من الغردقة وساعات كان يجيلي الجونة نقعد في مودز أو نتفرج على ماتشات في البيت عندي، في يناير 2021 كلمتني فيدرا قالتلي انت فين؟ قلتلها انا في الجونة قالتلي النهارده عيد ميلاد هشام حاول تروحله وكان معايا المونتير هيثم كرم وفعلا رحنا جيبنا تورته ورحناله المركب وفرح جدا واتفرجنا على ماتش معاه هناك وطفينا الشمع واتبسط جدا.. دائما كان هشام بيحب يلبس حذاء اديداس ابيض Stan Smith وكان بيحكيلي عن والده ازاي كان بيحترم المواعيد جدا وازاي كان حازم معاه وهو صغير لدرجة انه كان بيضربه بالحزام ( ويقولها ويضحك ) لانه كان بيحب والده جدا وبالرغم من كده كان دائما يقول انه اعتمد على نفسه وماعتمدش عليه«.
وتابع «مدحت»: «كان بيحب الفنان محمد جمعة جدا وكان دايما يوصفه بالجدعنة ، وكنا بنتقابل أنا وحازم سمير وفيدرا وأحمد زيتون وكان بينضم ناس تانية احيانا زي المنتج كريم ابو ذكري وطارق الشوري، من شهرين كده وقبل ما يخش المستشفي كنا معزومين عند فيدرا في بيتها الجديد ودايما بتعملنا الاكل اللي بنحبه وهشام ماكانش ليه طلبات كتير، وانا باحب الكشك جدا واحنا مروحين انا واخويا السيناريست ايمن مدحت خدنا هشام نروحه وبعد كده كنا ح نجيب لانا بنتي، من عند واحده صاحبتها لكن هشام قالي نعدي عليها الاول عشان يشوفها وقعد يغلس عليها وينكش فيها، وبعد لما وصلنا هشام البيت سالتني قالتلي انكل هشام خس اوي قلتلها ادعيله قالتلي حاضر، يوم 22 سبتمبر خلصت المدرسة وكلمتني هي ومريم بنتي وكانوا بيعيطوا وقالولي متزعلش هو استريح ، ادركت أن بناتي كبروا وادركت اني خلاص مش ح اشوف H تاني زي ما كنت باقوله».
يذكر أن الفنان الراحل هشام سليم توفي الخميس عن 64 عاما ، إثر معاناة مع مرض السرطان.