كلام مسئول

محمد صلاح: يا مساء الخير ، اليونسكو حلم؟ أه أكيد ومنصب دولي ورفيع ومش عجبه إن مصري يتولاه كان فيه مصري أمين عام للأمم المتحدة الدكتور بطرس بطرس غالي وأمين عام للوكالة الدولية للطاقة النووية الدكتور محمد البرادعي ونواب لمنظمات دولية كتير الترشيح لليونسكو تم من بدري كان لازم .. عشان الإعلان المبكر فيه جس نبض للدول اللي طرحه مرشحين وللمرشحين الآخرين أنفسهم قراءة لترمومتر مزاج العالم لكن برضة الإعلان المبكر فتح النار وأوم الدنيا مقعدهاش في بر مصر وفي العالم جدل واسع حصل اختلطت فيه الثقافة بالسياسة ، الواقع بالتاريخ ، الإشاعات بالحقائق دول عربية وأفريقيه كتير احترمت ترشيح مصر وسحبت مرشحيها لكن في الداخل كان فيه أسئلة كتير ليه يكون الوزير فاروق حسني بالتحديد .. جه الجدل بالصدفة مع أكثر وزير إثارة للجدل وزير المعارك والأسئلة والاستجوابات أرادها البعض معركة مفتوحة مع الوزير الشاب الفنان – هو ما بقاش شاب لكن أكيد لسّه فنان – دلوقتي بيدخل مرسمه كل يوم ساعة ولاّ ساعتين بيرسم ويتأمل .. من ساعة ما اختاره الدكتور عاطف صدقي من 22 سنة والمعارك معاه وحواليه مستمرة والمعارك بدأت من سؤال ليه فنان تشكيلي شاب يبقى وزير ثقافة وانتهت ب ليه يترشح لليونسكو ما بين السؤالين جبهات مفتوحة ملهاش أول من أخر جه بالبراشوت ، محظوظ لأن الأوبرا أتفتحت على أيامه وعلى أيامه فاز نجيب محفوظ بنوبل أمه دعياله بقى علشان فضل وزير كل السنين دي .. استقالته بعد حريق مسرح بني سويف وبعدين حصل حريق المسرح القومي ولا استقال ولا حاجه وزير مغترب "مسيو فاروق حسني" قال في حديث صحفي إنه ما بيحبش الحجاب ، عنده شلة ، ناس من اللي بيشتغلوا معاه راحوا السجن في قضايا رشوة وتربح وظيفي ، لوحاته محدش بيفهمها وتمنها كمان غلي قوي بع ما بقى وزير ، بيدي جوايز الدولة لناس بتهاجم الأديان ، سمح لموسيقار إسرائيلي بالعزف في الأوبرا ، وزير مهرجانات .. يعني نهر من الاتهامات عكسها بقى فيه مدافعين جامدين قوي .. فنان تشكيلي عالمي ، حرك المياه الراكدة في الثقافة المصرية ، نفض الغبار عن مؤسسات ثقافية وأنشأ الكتير منها ، وقف ضد التطبيع مع إسرائيل من البداية ، أهّل دور مسرح وسينما ، أقام مهرجانات بالنزول بالثقافة للناس ، تكريس وزن مصر الثقافي .. بره مصر كان ماشي كويس كان بيعرف لغة العالم في أوربا والدول المتقدمة لغاية ما اصطادته إسرائيل واللوبي بتاعها في كل مكان لما قال لو إن الوزارة طبعت كتاب إسرائيلي ححرقة بدأ عليه الهجوم الكاسح عموما خلاص اليونسكو أمامكم والبحر من ورائكم ولأجل اليونسكو ينسقي العُليق معارك فاروق حسني في الداخل والخارج ، اشتباكاته مع كل الاتجاهات ، اليونسكو نسبة الاستحواذ بين فاروق حسني وبين المنافسين حيكون لنا عنها النهاردة كلام ....مسئول
فاصل
محمد صلاح: ما بين صخب الداخل وتربص الخارج يواصل الوزير فاروق حسني حملته من أجل منصب مدير عام اليونسكو ، المنصب مشغلوش أي عربي من قبل مرشحان عربيان مصري وسعودي من عشر سنين حاولوا وفي غياب التنسيق ضاعت فرصتهم هم الاتنين دلوقتي التنسيق العربي ماشي كويس والثقافة العربية مؤهلة لشغل المنصب عشان تقدم رؤيتها في إدارة ثقافة العالم وطرح مبادرات وابتكارات .. معركة اليونسكو الفرصة وحجمها ومساحتها الحظ وفدان الشطارة الفوضى والتخطيط الحلم والواقع حيكون لنا النهاردة مع وزير الثقافة فاروق حسني كلام مسئول
ومن كلام الوزير فاروق حسني " أرفض العنصرية أكثر من أي شيء أخر بما في ذلك مجرد الرغبة في التحدث بشكل جارح عن الثقافة اليهودية أو أي ثقافة أخرى" ، " لم أقدم أي تضحيات للوصول إلى منصب مدير عام اليونسكو وسأستقيل من منصبي في حال إخفاقي في الفوز بمقعد رئاسة المنظمة الدولية " ، " أنا في أعلى منصب ثقافي في العالم فأنا وزير ثقافة مصر التي تملك تراثا عظيما وذهبت إلى اليونسكو برغبة سياسية " ، " لن أقبل التطبيع قبل وجود دولتين على الأرض وبعد أن يأخذ الشعب الفلسطيني حقه وأنا مقتنع أنه في حال أرادت إسرائيل سِلم فليقيموا السلام علشان نطّبع " ، " شعرت بظلم شديد بعد أزمة الحجاب وكانت لدي رغبة شديدة في اعتزال السياسة بشكل كامل ولكن الأزمة كشفت لي عن غياب الثقافة الدينية عن نشاط الوزارة " من ساعة ما جه وزير ثقافة واتنصبت له المحاكما ، طول عمرة في الوزارة وهو في قفص الاتهام ، مشتبك مع تيارات وأفكار وأشخاص ودخل من خصومة لمصالحة ومن مصالحة لخصومة اتسعت الجبهة من الداخل المصري إلى الفضاء العربي وإلى قارات العالم الخمس ، الفنان الذي يحمل عقلة وريشته لا يريد أن يستريح ولا يأخذ فاصل ليواصل .. وزير الثقافة فاروق حسني حيكون لنا معاه النهاردة كلام ...... مسئول
فاصل
محمد صلاح: أرحب بوزير الثقافة السيد فاروق حسني مرشح مصر لمنصب مدير عام اليونسكو أين نحن الآن في معركة الترشيح والتصويت
فاروق حسني – وزير الثقافة: طبعا هي معركة شرسة وإحنا ثمانية على نفس الموقع ومفيش شك إنه وأنت داخل معركة ضد أوربيين وضد أيضا من أمريكا اللاتينية وأفريقيا فلازم حساباتها تكون دقيقة للغاية ، إحنا دايما بنحسب على الأسوأ يعني بتحاول انك أنت طول الوقت standby
محمد صلاح: يعني إذا حسبنا حساباتنا للأسوأ حيودينا للأفضل ؟
فاروق حسني: أنا مش عايز أقول الأعداد إحنا حاسبين بس إحنا حاسين إننا في موقع أفضل على الأقل إحنا أحسن موقع في كل المرشحين إلى الآن
محمد صلاح: سيادة الوزير كان في انطباع دايما إن علاقاتك الأوربية جيده بحكم إنك قضيت فترة طويلة في حياتك في أوربا لكن بعد الترشيح أو بعد الإعلان عن الترشيح حسينا إن الترابيزة أتقلبت وإن أوربا مش معاك كان صح
فاروق حسني: لا لا لا خلي بالك كل دولة لها مصالحها مع دول المرشحين فبالعكس أوربا معانا ومعانا كويس جدا معانا دول قوية جدا في أوربا فيه ثلاثة في أوربا من الإتحاد الأوربي وواحد من روسيا إذاً أربعة أوربيين ضد واحد عربي
محمد صلاح: يعني الترشيح لما يكون فيه أربعة من أوربا منهم ثلاثة من الإتحاد الأوربي ده يساعدك في تفتيت الأصوات ولاّ يؤثر عليك في أصوات تقريبا مصر كانت ضمنه إنها تحصل عليهم
فاروق حسني: أنا بشوف إنه إحنا أخدنا الأصوات اللي علاقاتنا بهم جيدة جدا وأعتقد إن الأصوات الباقية اللي هم سيتقاسهموها أنا في اعتقادي احتمال كانوا يدونا واحتمال ما يدوناش لكن إحنا معانا دول هامة جدا ولها تأثير كبير في المنظمة يعني اخدنا جزء كبير من التورتة الأوربية
محمد صلاح: الدول الإسلامية زي تركيا موقفها أيه؟
فاروق حسني: تركيا مش في المجلس التنفيذي
محمد صلاح: في بعض الدول اللي ممكن متبقاش أعضاء من ال 58 أعضاء المكتب التنفيذي لكن مؤثرة على دول أخرى
فاروق حسني: الكلام ده صحيح لكن أنا عايز أقول حاجة إن المؤتمر الإسلامي أدانا إجماع .. أفريقيا ادتنا إجماع .. العالم العربي أدانا إجماع الإجماع الحقيقي من العالم العربي ودا بالفعل مؤثر إلى أبعد الحدود ةدا عمل هزة كبيرة جدا داخل المنظمة لما حصل إجماع عربي احتمال كانوا متصورين إن دا مش حيتم وتمت عملية تخريب بين المنطقة العربية لكن الحمد لله لم تنجح أيضا المؤتمر أنت عندك دول إسلامية غير عربية وبالتالي المؤتمر لما يديك إجماع دا في حد ذاته قوة كبيرة جدا أفريقيا إحنا أخدنا إجماع لكن في أفريقيا إحنا عارفين دايما بتحصل نوع من أنواع الإنفلاتات ففيه دولتين خرجوا عن الإجماع بالرغم من إن هم مرشحين لكن مش باين لهم صوت يعني فيه مرشحين آخرين في منتهى النشاط وبيشتغلوا وبيعملوا
محمد صلاح: راصد أنت الكلام ده كله ؟
فاروق حسني: طبعا عندنا علم بكل اللي بيدور لأن إحنا بنشوف نفسنا فين منين
محمد صلاح: على مستوى علاقاتك الشخصية علاقاتك جيدة جدا بالفرنسيين والعلاقات الرسمية المصرية الفرنسية تقريبا على أعلى مستوى لكن لحد الآن فرنسا ما حسمتش أمرها وكتب الأستاذ محمد سلماوي أخيرا بيتكلم عن تعديل في الموقف الفرنسي أنت بتحلل موقف فرنسا أزاي إنه متأخر لحد دلوقت
فاروق حسني: لا لا لا فرنسا من الخطأ إنك تخليها تعلن عن رأيها سواء كانت معانا أو ضدنا دي دولة مقر ودولة المقر عندها حساسية كبيرة جدا لعملية الانتماء لمرشح معين يبقى فيه نوع من عدم الحيدة أنا بحسبها حسابات شخصية علاقة الرئيس بالرئيس ساركوزي .. علاقة فرنسا بمصر بالذات في الآثار وفي الثقافة من أيام نابليون 200 سنة وعلاقات مستمرة بمصر في المجال بتاعنا عموما أنا مش خايف من فرنسا وبعدين لو ما أخدناش صوتها مش حنخسر كتير ، لازم نعرف إن المعركة دي معركة الجنوب لأن طول الوقت شمال الكرة الأرضية كان يتحكم في المنظمة لازم نعرف إن دي أهم منظمة موجودة ولها تأثير كبير جدا وبيعتبروها جوهرة الأمم المتحدة فكان لسنوات طويلة مُسيطر عليها من الشمال النهاردة الجنوب من حقه وبالذات العالم العربي لأنها المجموعات الجغرافية كلها أخذوا إلا العالم العربي .. العالم العربي يُعتبر من المنطقة .... يعني مثلا أفريقيا ألف والعالم العربي باء أفريقيا أخدت إنما العالم العربي مأخدش إذاً بالتالي هم دلوقت بيتكلموا على أوربا الشرقية بس إحنا مالنا دي أوربا وأوربا أخدت يعني العقلية الأوربية سيطرت سنوات طويلة على المنظمة وبالذات دول الجنوب عندهم اهتماماتهم وعندهم إشكالتهم وعندهم إدراك المطالب بتاعتهم بتكون نابعه من إحساسهم بالمشاكل مفيش شك لازم يبقى فيه نهج جديد رؤيا جديدة نفس جديد حالة جديدة ميبقاش على نفس الوتيرة بنفس التكنيك يعني أنا أرى إنه العالم العربي النهاردة لما يقدم مرشح دا مرشح لازم يبقى له شكل وقيمة محددة ما بين كل السابقين لأنك أنت حالة تانية تراث تاني رؤيا تانية إيقاع أخر يجربوا بس
محمد صلاح: إحنا عايزين الناس تجربك في الجوهرة ، لحد دلوقت ما رحتش الصين من ضمن جولاتك موقف الصين أيه ؟
فاروق حسني: لازم أروح الصين لها زيارة خاصة إحنا منتظرين بس تحديد المواعيد .. الصين دولة صديقة جدا ويمكن أكبر تعاون اقتصادي مع دولة الصين وإذا كانت الصين أقصى الشرق فإحنا البوابة التي تؤدي إلى الشرق
محمد صلاح: نتكلم في شوية نقاط شائكة .. أنت لما هتقعد في الجوهرة حتتكلم في كل حاجه .. سيادة الوزير أنت لما أتكلمت عن حرق الكتب العبرية اليهودية الإسرائيلية تعرضت لحملة في الخارج ونلت تصفيقا حادا من بعض الرموز في مصر والشخصيات ومن قوى المعارضة وغيرها أنت بتتعامل في بعض الأحيان أو حتى في منصبك بروح الفنان شويه يتجاوز بعض المصالح السياسية أو يبقى حريص عليها في أحيان أخرى
فاروق حسني: أولا أنا غير موافق أنه كثيرين صفقوا لي عندما قلت حرق الكتب
محمد صلاح: والله كتير صفقوا
فاروق حسني: أنا لا أعتقد لأسباب إن الكتاب قيمة أيا كان
محمد صلاح: بدليل لما حضرتك تراجعت أو اعتذرت هاجموك نفس اللي كانوا بيصفقوا
فاروق حسني: لا هم هاجموا لأنهم تصوروا إن أنا اعتذرت لإسرائيل أنا اعتذرت للفظ ولنفسي ولك ولكل من يقرأ هي طبعا أنا لا يمكن كنت أقصدها وهي طلعت في حالة نرفزة وحقيقي طالعة على أساس إنه لو لقى وأنا متأكد إنه مش حيلاقي إذاً بالتالي أنت بتتكلم عن فراغ أنت بتقول له هات الفراغ أحرقه مش ممكن دي رقم واحد ، أما التعامل اللي سيادتك بتقول علية أنا راجل رسام أنا فنان وكل واحد له طبيعته أما يكون واحد محاسب غير طبيب غير فنان بيتعامل مع الأشياء بالكيان اللي أتكون به في حياته أتكونت حياتك في ظروف معينة إدراكاتك أتبنت في ظروف أيضا معينة هذه المدركات مفيش شك إنها بتؤثر على العمل أولا أنا مش وزير صناعة ولا وزير زراعة ولا وزير كذا أنا وزير ثقافة يعني أنا وزير لحالة إبداع موجودة في الدولة أنا مسئول عن الآثار ودي إبداع عبقري على مر العصور أنت أيضا مسئول عن كل إبداع سواء أدبي أو فني أو سينمائي أو مسرحي الحاجات دي كلها هواياتي الأساسية وأنا قلت دايما إن أنا بتعامل مع الوزارة دي كهاوي .. أنا فنان محترف لكن الوزارة أنا حسيبها في يوم من الأيام
محمد صلاح: إحنا عارفين موقفك من حرية الإبداع والثقافة والأديان اسمح لي المصريين والعرب بشكل عام عندهم حين نوايا دايما لكن في المصالح السياسية والمواقف الدولية أعتقد ده بيفرق وبالتالي لفظ يبقى مقبول في مصر التراجع عنه في بعض الأحيان ممكن المسألة تعدي إنما في معركة زي معركة اليونسكو فيه بعض العبارات لايمكن إنها تخرج كدة وكان من بينها اللي قلته عن الكتب
فاروق حسني: الكتب دي أولا لا هو تصريح بعد ما انتهينا من حوارات داخل لجنة الثقافة وخارج فتحدث معي نائب أخواني وكنت بقول له هو شخصيا لكن كان فيه صحفي صغير شاب لسّه فهو التقط .......
محمد صلاح: دايما يلتقطوا لك ، التقطوا لك قبل كده موضوع الحجاب .. دايما بتعمل حراك للصحافة وال media ووسائل الإعلام وبيبقى فيه معارك وأنت وزير مثير للجدل وللمعارك والصحافة بتحب كده وبرامج الفضائيات بتحب كده لكن أنت بطبعك اللي في قلبك على لسانك ولاّ نسميها أيه ؟
فاروق حسني: أنا أولا محبش السياسة لكن غصب عني أنا سياسي والكلام اللي بيطلع بيطلع بموازين يعني موضوع الحجاب لم يكن تصريح
محمد صلاح: برضه كنت قاعد وبتتلكم وراح حد لقطه
فاروق حسني: لا لا لا
محمد صلاح: أمّال أيه؟
فاروق حسني: الكلام ده كان في التليفون وسُئلت من المحررة هل ده للنشر وقلت لها لا مش للنشر والتاني لم يكن أيضا تصريح .. أجمع تصريحاتي في ال 22 سنة تجدها على ميزان من دهب إنما الحاجات اللي بتلتقط بشكل أو بأخر
محمد صلاح: سيادة الوزير أنت مابتحبش السياسة لكنك في موقع سياسي في النهاية بتتعامل مع دول وبتتعامل مع منظمات وبتتعامل مع أشخاص وبتعكس سياسة البلد أيه الضوابط اللي بتحكم اللي بيشتغل في العمل السياسي أنه حتى لما يفضفض في تليفون أو يتكلم في قعده يتكلم في أيه أو لما يبقى أمام الكاميرات يتكلم في أيه ؟
فاروق حسني: المفروض تبقى صادق في كل الأحوال سواء كنت بعيد عن الكاميرات أو داخل الكاميرات تبقى أنت فعلا صادق وصريح ولكن الصراحة لها حدود يعني فيه أشياء لا يجب إن يعرفها حد آخر وإلا مكنش يتكتب على مظروفات سري .. سري للغاية فاللي أنا عايز أقوله إن السياسي هنا مش معناه إنه بيلعب على الآخر الساسي معناه باصص لنوع من التباديل والتوافيق للمواقف يقدم أيه ويأخر أيه ويتعامل مع الناس أزاي ، السياسة دي لعبة فكر متحرك طول الوقت أزاي أنت ترى الأشياء لأن السياسة أيضا رؤيا كبيرة جدا يعني أنت عشان تنفذ سياستك لابد أن تكون مسبوقة برؤيا فإن مكنش عندك رؤيا يبقى معندكش سياسة يبقى حتخبط حتقول أنا بشتغل سياسة معناها أنك بتلعب من تحت الترابيزة فالسياسة علم كبير
محمد صلاح: سيادة الوزير أنت اعتذرت عن اللفظ زي ما حضرتك بتقول دلوقت في مقال نشر في اللوموند أنت كنت متوقع ساعتها إنه تثار حملة ضدك هنا في الداخل أزاي حسبت معايير الهجوم عليك أو مناصرتك في الداخل والخارج لما كتبت كتبت المقال في اللوموند ؟
فاروق حسني: الحساسية الشديدة جدا تجاه إسرائيل من كل المجتمع المصري أنا متأكد أنه حيعمل حساسية بس أنا عايز أقول حاجه هنا المفروض نتوقف لحظة أنا ليه أُعامل للآن كوزير ثقافة
محمد صلاح: عشان أنت وزير ثقافة 22 سنه وزير ثقافة ؟
فاروق حسني: لا أسف لابد من الآن أن أٌعامل كمدير عام منظمة اليونسكو
محمد صلاح: كمرشح؟
فاروق حسني: يعني أعتبر نفسك كده وتصرفاتك التمهيدية لابد أن تعرض شخصيتك على المستوى الدولي أنا ما يهمنيش النهاردة إن أنا أقيم حوارات في الداخل كل الحوارات لازم تبقى في الخارج وفي الخارج لابد إن إحنا نخاطب هؤلاء بعقليتهم هنا إحنا عندنا عواطف يعني أسمح لي أنا اللي بديت عدم التطبيع وأنا اللي وقفت مع كل المثقفين ومقدرش أخرج منهم لأن أنا موجود في مصر لكن أنا رايح في طريق تاني أسمة اليونسكو رايح لسكة أسمها السلام هذه المنظمة بنيت كي تقيم حصون السلام في عقول البشر ده أول مبدأ في دستورها فمش معقول أنا حقول إن أنا حعمل وأسوي ومفيش تطبيع أنا أرجوا إن الناس تفهم ده إن فيه انتخابات والانتخابات لها سياستها وأنت وزير لك سياستك ولازم الهدف نفسه له سياسته لا يجب إن أنت تخرج عنه وإلا أنت متقدم ليه رايح ليه
محمد صلاح: يعني أنت كده بتنفي إنه يكون فيه تناقضات في شخصيتك أو في كلامك لكن دي معركة وإدارة الثقافة المصرية خلال السنين الماضية ده موضوع تاني
فاروق حسني: أسمح لي أنا وأنا صغير كنت مدير قصر ثقافة أتعينت مدير المركز الثقافي المصري في باريس ده أسمة مركز ثقافي وده أسمة قصر ثقافة الفرق كبير جدا يعني أنت وأنت بتشتغل مدير قصر ثقافة أنت مُطالب أنك أنت تُحضر لمجتمعك ثقافات العالم وترعى المبدعين أما في المركز الثقافي المصري أنت عندك طبق واحد هي مصر إن ما فهمتش ده حفشل في شغلي فأنا عايز أقول أنه لازم تبقى فاهم أنت رايح فين وتُعد عدتك إنك أنك أنت تعتلي المكان وتمشيه أزاي لأنك لازم تدي أمان لكل اللي حينتخبك وأنا عايز أشرح حاجة شرف عظيم جدا مفيش أعلى منه أنك تكون وزيرا لثقافة هذا الوطن أنا بقولها بثقة وأعتقد إن أي حد حيصدقها وبعدين دي مهمة ومهمة صعبة وثقيلة والنهاردة وأنت بتتعامل مع مجموعة مثقفين اللي معاك واللي ضدك إنما أنت النهاردة بتتعامل مع 193 دولة وكل دولة لها مطالب فأنا عاوز أقول إن أنا راضخ لرغبة هذا الوطن رغبة السيد الرئيس اللي رشحني وانا مفيش شك حفضل طول عمري مصري لكن العقلية لابد أن تأخذ مجرى أخر ومنحى أخر ورؤية العالم بشكل محايد .. شريف .. وشفاف لا يتأتى هذا إلا بأنك تكون فعلا مدرك تماما أيه الوظيفة اللي أنت بتشتغلها
محمد صلاح: بتتنرفز لما حد ينتقضك خليك معانا لسه الكلام مخلصش؟
فاصل
محمد صلاح: الوزير فاروق حسني يتقبل النقد وما بيتضايقش لما حد بينقل له اللي بيتقال عليه .. في إدارتك مع المعركة اللي فُتحت ضدك في الخارج بعد موضوع حرق الكتب الموقف كان ضدك عشان خاطر أنت أصلا ضد التطبيع ولاّ تلقفوا الكلمة بتاعة حرق الكتب
فاروق حسني: هي أصلا عشان ضد التطبيع وأصلا للأسف الشديد الجانب الأخر مش مدرك أيه وظيفتك وأيه اهتماماتك وأيه انتماءك ، أنا منتمي لوطني ومنتمي أيضا للمجتمع العربي ولا يمكن بأي حال من الأحوال أتنازل عن هذا ولازم يدركوا ده وأنا قلت لهم اليونسكو ده حاجه تانية خالص وتعامل أخر وأنا في مصر أنا مصري مائة في المائة وأنا في اليونسكو أنا شخصية دولية لابد أن أتعامل مع الموضوع بشكل أخر هم برضه مش فاهمين عايزينك تطبع وليه ما تطبعوش
محمد صلاح: يعني أنت تعاني من عدم الفهم جوه وبره أنت عانيت من سوء فهم ولاّ سوء ظن أنت حاسس إن في ناس كتير مش قادرة تفهمك
فاروق حسني: يعني فيه تربص من بعض الأفراد
محمد صلاح: ليه ؟
فاروق حسني: الحياة بيشكلها الإنسان والإنسان يملك كل الحواس والحواس يمكن يكون من ضمنها الغيرة المُطلقة وأنا مفيش منافسة بيني وبين حد وأنا محبش أنافس حد لكن اللي أنا عايز أقوله إن اللي بيزعج أنهم حاسين إن من حقهم أنهم ينتقضوا ومن حقهم أنهم يهاجموا ومش من حقي إن أنا أنتقد وأهاجم وإذا كان الديمقراطية تاخد شكلها معايا أنهم ينتقدوني أنا لها ومعنديش مانع
محمد صلاح: يعني دي مواقف شخصية ؟
فاروق حسني: لا لا لا أولا إنسان من غير أعداء يبقى مش موجود كمان فيه نقطة مهمة قوي ناس تقولك إن وزير الثقافة حصر المثقفين في كنفه .. أولا المثقف ده معناه كنز كبير جدا للوطن ولوزير الثقافة وزير الثقافة يتعايق به ولا يمكن يفرط فيه ممكن إن هو يفرط في وزير أو في الدولة لكن الدولة لا يجب أنها تفرط فيه لأنه قيمة من القيم اللي الوزير يجب أنه يقدمها للشعب ، أنت مسئوليتك مش المثقف أنت مسئوليتك المجتمع .. المجتمع اللي مفروض أنك تديله كل ما هو جيد وقيم في هذا الوطن وبالتالي أنت حتجيب مثقفين منين من خارج حدود مصر عشان تقدمهم للشعب المصري ؟ ! ! ! مش ممكن إن مكنتش أنت حتاخد هؤلاء المبدعين والمثقفين وتبقى أداه في يدك كي تصل إلى هذا المجتمع الذي يحتاج فعلا إن هو يتعلم ويتربى بيهم دا أنا الآلة اللي ممكن توصل المسائل دي مكتبات وقصور ثقافة ومراكز أبداع ومسارح فاللي أنا عايز أقوله إن أنا ما ليش أعداء ولو أنا عدو لأحدهم فليكن أنا مش زعلان
محمد صلاح: ليه دايما السؤال مطروح ليه فاروق حسني ليه رسام بقى وزير الثقافة لما أسندت إليك وزارة الثقافة و ليه أترشح لليونسكو فاروق حسني مش حد تاني أنت حاسس إن حد بيسأل ليه قعد ده كله في الوزارة عند الإحساس ده ؟
فاروق حسني: أنا أقول لحضرتك ، أنا ما حستش بالوقت الحقيقة
محمد صلاح: عشان شغال؟
فاروق حسني: لأن بننجز أعظم مشروعات تمت في تاريخ مصر الثقافي إنك أنت تعمل هذا الكم الهائل هو دا لمصلحتي هو أنا بعمل في بيتنا أنا بعمل في ممتلكات الشعب لما أنت بتقيم متاحف عظيمة في كل بقعة من بقاع مصر لما تقيم نشاط ترميمي من أول أبو سنبل لحد إسكندرية في كل المناحي والتنوع لما تملكه مصر من آثار طبعا كل ده شيء مهم جدا كان لازم يتعمل وعلى فكرة أنت تقدر تبني مبنى 100 دور حتحط قدامك زمن محدد حتبنيه إنما عشان ترمم مبنى جامع أو مدرسة خنقاه أو قصر تاخد سنين طويلة
محمد صلاح: لأنك هتخلص حاجه هتتفتح حاجة تانية ؟
فاروق حسني: مفهوم ترميم الآثار وتحضير الأثر للزيارة ده مكنش موجود كان بيتعمل بخطأ شديد والدليل إن إحنا أعدنا ترميم أبو الهول قعدنا فيه عشر سنين كان أترمم قبلنا ب 6 شهور كان مملوء بالأسمنت ثلاثة أمتار أسمنت بالعضد والكتف 1.65 سنتي كانت مأساة كبيرة جدا فأنت وأنت بتتعامل مع هذه الجواهر العبقرية وهذا التاريخ بمسئولية رهيبة جدا فيه فرق بين عملية الزايدة بتاخد أد أيه والقلب بياخد أد أيه فأنت قدامك مهمة والمهمة دي لازم تخلص تخلصها بأكبر متحف في العالم ، أكبر متحف حضارة تاني في العالم ما يقرب من ثلاثين متحف في ربوع مصر كلها مئات المكتبات في القرى والنجوع دار الكتب المصرية عملت مؤسسات كبيرة جدا ، صناديق الصرف على الثقافة ..... هو ده كلام يتنسي ده عايز كمان عشرين سنه تانية
محمد صلاح: أنت فكرت في الاستقالة أكثر من مرة من بينها المرة اللي أنت قدمت بالفعل بعد حريق مسرح بني سويف ليه فكرت في الاستقالة عشان الحملة كانت شديدة أوي عليك ؟
فاروق حسني: شوف اولا في بني سويف كان الموقف اقوى من أي احتمال وخصوصا بعد انا ما ذهبت ورحت بني سويف وشفت المكان المحترق ومن احترق انا مش قادر اقول لحضرتك يعني ايه التمن، برضه عشان نبقى واضحين 100% انا بقولك انا تحملت المسئولية المعنوية تماما وخلاص قلت انا ماشي واعملوا فيا اللي انتوا عايزين تعملوه لكن ايضا لما اتهم رئيس هيئة قصور الثقافة دا خطأ اداري لانه هو مالوش دعوة بالحكاية دي اولا عشان نعرف الظروف تمت ازاي ......
محمد صلاح: دكتور مصطفى علوي حضرتك تقصد
فاروق حسني: اه ..المسرح كمسرح كبير، وموجود قدام الشباب اللي عملوا المسرحية لكن اختاروا قاعة مش اكبر من دي اطلاقا وبباب واحد وعملوا نوع من انواع الديكور القابل للاشتعال تماما وانا بقول الله يرحمهم النقاد كان لابد انهم يرفضوا الدخول في هذه القاعة لانهم ناس عارفين وفاهمين معنى كلمة مسرح ومعنى كلمة ديكور، طبعا دا كان مهرجان وكل الناس بتقدم في كذا حتة ففي بني سويف اختير مكان خاطئ استمر يشتغل 4 ايام واحترق في اليوم الخامس طبعا زي ما انا بقول انه فيه مسئولية مدير القصر فيه مسئولية الراجل اللي مسئول عن المهرجان انه هما اللي قسموا المواقع وبرغم من كده يعني انا ماجادلتش في دا ولكن انا قلت اذا كانت استقالتي اني ارتاح واريح فليكن..
محمد صلاح: مرتين طلع من عندك في الوزارة من مكتبك اتنين اتهموا بالتربح او بالرشوة واحيلوا للقضاء وصدرت الاحكام.. انت ثقتك في الناس سريعة يا سيادة الوزير ؟
فاروق حسني: لا أنا ثقتي في العمل أما حكاية نوع التربح فدا له اجهزة اللي تشوفه ، أنا لما ألاقي الإنسان اللي قدامي انسان بيعمل وبيديني العمل اللي انا عايزه بالظبط بيعطي للدولة ما تريده بالظبط لازم احتويه طبعا
محمد صلاح: ماهو في النهاية يتهم وفي الاخر بيبقى ضدك ؟
فاروق حسني: الله مش فيه اجهزة هو انت جهاز ولا انت مدير انت بتدير عمل ، هو كان مؤهل شاب وطموح عنده بس هو يمكن كان فيه خطأ لو احنا بصينا كده وانت القاضي لازم تشوف الموضوع كله اه اللص لص لازم ياخد عقابه مفيش شك لكن انا لما اجد شاب في مقتبل العمر وعمل اشياء عظيمة جدا اعاقبه يعني ماتقتلوش وتقتل اولاده يعني نقيس عمل ايه وايه اللي اتعمل وايه اللي لصالح الدولة وصالح المجتمع وصالح مصر ، تسمح لي اقولك انه قناعة القاضي بتجب القانون يعني يقين القاضي احيانا في الجريمة بالذات القاضي له الكلمة الاولى بمنطقه ودا عنده حق ففي النهاية كنت بقول ايه كان المنطق لو اتسع شوية طبعا طالما انه لص يستاهل لكن هناك حدود للمساوئ
محمد صلاح: انت معندكش متحدث رسمي باسم الوزارة يخفف عنك قضاياك متشعبة وكتيرة ونشاطك كتير ومتفرع واداءك مختلف ومن ايقاع لايقاع في داخل مصر وخارج مصر ليه مفيش متحدث عندك يخفف عنك او كان وضح كتير من بعض الامور ؟
فاروق حسني: أنت صحفي وكبير وعارف ان الصحفي دايما عايز يروح لراس الموضوع مش عايز حد تاني واخد بال حضرتك وانا راجل اصلي شعبي فبقابل أي حد صغير وكبير ومعنديش.. لا .. بابي مفتوح للناس وانا بشوف ان دي يمكن بالنسبة لي الصحفي الصغير بالنسبة لي اهم من الكبير لان الصحفي الصغير دا انت بتعلمه ان النشاط اللي انا بشتغل فيه هو النشاط تجريدي عشان تجمعه وتدركه ومتنوع ايضا فالشاب لما بيقعد معايا بيتعلم اللي انا عايز اقوله دلوقت مثلا مع اليونسكو بيبقى معايا لجنة مصغرة جدا فيه الاستاذ حسام نصار لما بيبقى فيه حاجة خاصة باليونسكو توضيحات
محمد صلاح: انا بتكلم عن نشاط الوزارة سيادة الوزير
فاروق حسني: والله مكنتش فاضي
محمد صلاح: طيب دلوقت هاخد من كلامك إن أنت راجل شعبي بس فيه كلام انه مخاوف على الثقافة المصرية من التغريب يعني نتيجة وجودك لانه في كلام عن السمبوزيوم والرقص الحديث وعن المسرح التجريدي يمكن لو كان رقص شعبي مثلا مكانش حصل انتقادات جديدة ليك في الاتجاهات دي
فاروق حسني: الثقافة دي شئ دولي كبير جدا دا قيمة عالية هو انت لما بتلعب رياضة تقول لا مجيبش الملاكم الفلاني الامريكي يلعب مع الملاكم المصري البسيط طبعا وستقل كفاءاتك تماما انت تحضن العالم هنا في القاهرة لكي يتم نوع من التحدي وبعدين التحريض الثقافي دا والتحريض الابداعي انت لما بتجيب اخرين هنا يعني الواحد لما بيخرج يتفسح بره هيشوف كام مسرحية ..واحدة او كام نشاط ..واحد انما انت لما بتجيب النشاطات هنا انت بتخلي المبدعين يدركوا هما فين من مين.. يعني دا بيبقى قاعد شايف نفسه في مرآة هو واصل لفين من هؤلاء وبالتالي بيبقى فيه تحدي وبالتالي بيبقى فيه تحفيز وفي النهاية بيبقى فيه ابداع جديد والاحتكاك الابداعي دا مهم جدا مش عشان تنقل لانك انت لو نقلت فانت مخطئ تماما لكن لو انت محفز ابداعيا من اخر تطلع اللي جواك مش اللي جواه ودا اللي بيتم.. النهاردة انت عندك الشباب رائع في المسرح شباب رائع في الرقص الحديث او في المسرح الحديث في الموسيقى في الفن التشكيلي النهاردة الفن التشكيلي في مصر بقى على مستوى عالمي جدا لانه ابتدت الاحتكاكات الدولية ثم سمبوزيوم النحت دا هذا البلد بلد النحت اللي نحت ابو سمبل ونحت كل التماثيل رمسيس وغيره انتفى هذا بعد محمود موسى وبعد مختار وبعد النحاتين الكبار وبعض النحاتين بقوا بيعمل بالصلصال او بالجبس او بالكلام دا واحنا بلد الحجر بلد النحت هل دا يعقل فاحنا جبنا نحاتين من العالم مع نحاتين بتوعنا وابتدوا ولاد من اللي كانوا بيساعدوهم الاول بقوا نحاتين كبار جدا وبينحتوا في الجرانيت والاحجار الصلبة الصلدة بقى عندك النهاردة متحف مزار رائع جدا في النحت الحديث اذن انت دولة النحت ودولة العمارة لابد ان تحيي هذا
محمد صلاح: 22 سنة وزير للثقافة مش هاقولك عملت ايه ..ايه اللي مقدرتش تعمله في ال22 سنة ؟
فاروق حسني: اللي مقدرتش اعمله الحقيقة ماكملتش عملت بس ما كملتش اللي هي الحالة السينمائية الدولية عملناها بس في الافلام القصيرة والتسجيلية انما في الافلام الطويلة طبعا فيه افلام بتتم دلوقت اتحسنت تماما كنت انا ابتديت عملية تحسين دور العرض ايضا الاستوديوهات والمعامل ابتدات بيها من ساعة ماجيت مكانش فيه معامل وعليت التذاكر وحطيت التنافس ولامهرجانات بقت مهرجانات ليها قيمة ولها طعم احنا انتجنا فيلم والفيلم دا ان شاء الله هتسمع عنه اليومين الجايين داخل في مسابقة كبيرة جدا هو فيلم اسمه" المسافر " اخترت شاب صغير دا كان من النابغين راح اكاديمية روما فاز بجائزة روما الكبرى راح هناك قعد اتعلم سينما عمل سيناريو جاب السيناريو قرينا السيناريو كلنا اتفقنا عليه والفيلم خلص بطولة عمر الشريف وخالد النبوي
محمد صلاح: تعليقك ايه على المعركة اللي بدات بدري بدري على خلافتك لوزارة الثقافة مين اللي هيكمل البنا ؟
فاروق حسني: شوف البنا دا اكتمل ناقص حاجات بسيطة انت لما تيجي متحف كبير اكبر متحف في العالم تلتينه انتهى والتصميمات already موجودة والتصميمات الداخلية يعني شركات اللي هتقوم بيها مش الوزير نفسه وايضا متحف الحضارة وبقية المتاحف الاخرى بتنتهي المتحف الاسلامي المتحف الاتوني متحف المجوهرات دا على افتتاحات ان شاء الله اما المتاحف الصغيرة فكانت لها تصميماتها ولها الشركات اللي بتمشيها أنا لما اتكلم ، اتكلم عن نشاط انه النشاط الثقافي النشاط هو اللي بياخد ملمح كل وزير شخصيته ورؤيته ومدركاته يعني كل وزير له ثقافته وأشياؤه اللي جواه اللي هو يحب يطلعها يحب يشرك فيها الناس كلها يعني بيحب ايه عشان يطلعه للمجتمع وتاكد غلط انك تجيب فاروق حسني تاني انت لازم تجيب واحد اخر
محمد صلاح: كان عندنا معارك أدبية دلوقت بقت المعارك ثقافية ولانه وزيرالثقافة المصري فاروق حسني فنان بطبعه فهو كشخص وريشته كمان بقوا داخل مجال السجال الثقافي والأدبي والفني والسياسي والصحفي يوم 18 سبتمبر سوف يحسم خلال اجتماع لليونسكو الاقتراع على منصب المدير العام لليونسكو نتمنى ان ينال مصري هذا المنصب كان معانا مرشح مصر للمنصب الوزير فاروق حسني اللي قال كلامه معانا كان كلام جميل كلام معقول بس اكيد كان كلام مسئول خلص الكلام نلتقي في الحلقة المقبلة