شوبير يوجه رسالة مهمة لاتحاد الكرة في ظل أزمة كهربا مع الزمالك

حرص الإعلامي أحمد شوبير حارس مرمى الأهلي ومنتخب مصر السابق على توجيه رسالة إلى مسؤولي اتحاد الكرة المصري في ظل الأزمة الأخيرة بين محمود عبد المنعم كهربا لاعب الأهلي ونادي الزمالك والغرامة المقررة على اللاعب بعد هروبه من الزمالك إلى البرتغال قبل انضمامه للأهلي.
وقال أحمد شوبير في تصريحات إذاعية: «قصة كهربا هتخلص والنادي الأهلي سيتعامل مع اللاعب بشكل نبيل، خاصة أن اللاعب عايز يلعب بعد ما ضاعت منه سنة على الفاضي خرج فيها للاحتراف لكن مش هو ده الشكل ولا الظهور الفني اللي كان كهربا بيبحث عنه».
وتابع أحمد شوبير: «أنا هسأل سؤال بصوت عالي ومش بتكلم على نادي الزمالك بتكلم بصفة عامة لأن الزمالك له كل الحق في قضية كهربا، هو إحنا هنفضل في المشاكل دي لغاية امتى؟ نادي الزمالك كان مدانا في قضية شيكابالا ومحمد إبراهيم والولد الصغير حسام أشرف، الأهلي طبعا مش مدان خالص في موضوع كهربا، القضية بين كهربا وناديه القديم في البرتغال».
وتابع أحمد شوبير: «هتلاقي في الإسماعيلي أسعد لجزيري وإيقاف القيد وفي المصري هتلاقي كاسونجو في الاتحاد مش عارف مين في فاركو موقوف القيد عشان مش عارف إيه.. أما آن الأوان يبقى فيه نظام، والنظام بيبدأ من اتحاد الكرة، لما كنت في اتحاد الكرة فيه حاجة اسمها رسوم القيد بتيجي تسجل أشرف بن شرقي أو بيرسي تاو مثلًا بتدفع 3 في المائة أو 5 في المائة تقريبا فمثلا يعني تشتري لاعبًا ب 20 مليوناً فيه رسوم مثلا 2 مليون جنيه ييجي النادي يقول لك مش معايا فلوس، جدولها ورحلها وتتراكم الحقوق وفيه مثل مصري بيقول اللي معوش ما يلزموش، عشان الفلوس دي بيصرف منها الاتحاد على النشاط وده موجود في كل العالم في إسبانيا وفرنسا وإيطاليا وكل دول العالم».
وتابع شوبير: «كمان خارجيا لما آجي أعمل عقد لازم نشتغل صح ييجي لاعب يمشي وعقده 30 يونيو مثلا فييجي يمشي يقول عايز حقه وباقي فلوس عقده، نقول مش هندفع واخبط دماغك في الحيطة يقول لك ليه الحيطة هخبط دماغي في الفيفا فيكون اللاعب باقي له 100 ألف دولار مثلًا يتحكم له ب 500 ألف دولار، وعلى كده تتورط الأندية المصرية، وييجي المسؤول في النادي ده ولا ذاك يقول لك يا عم هنكون مشينا من المجلس، ولا كإن النادي الذي يحمل اسم مصر هو المتورط.
واختتم: «عيب ده يحصل إحنا عندنا قانونيون وخبراء ممميزون لازم نستفيد من قدراتهم ونظبط كل الأمور الخاصة بانتقالات اللاعبين».