تامر حسني يوجه رسالة تحفيزية لمتابعيه : «غوصت في ماسورة طاقة سلبية وخرجت»

عدما وجه الفنان تامر حسني رسالة تحفيزية لمتابعيه مضمونها: «تأثرت ولقيتني غوصت جوة ماسورة طاقة سلبية»، أكد «تامر» عبر حسابه على «فيسبوك» أنه حرص على قراءة تعليقات جمهوره بنفسه والتفاعل مع متابعيه لمنحهم الطاقة الإيجابية ومناقشتهم في ما يتعرضون له.
وأضاف «تامر»: «من امبارح وأنا بحاول أقرا كل تعليقاتكم وطبعاً تأثرت جداً ولقيتني غوصت جوه ماسورة طاقة سلبية رهيبة بس التحدي أني أستوعبها كلها وأخرجها لكم إيجابية اأقسم بالله قاعد اقرا تعليقاتكم من امبارح متحركتش من مكاني ..قسّمت الردود على كل المواضيع وبرضو بقول ان ردودي نابعة من أخ ليكم وانسان عاش تجربة كبيرة من الظلم والنجاح وشوفت فيها كل اللي هشرحه في البوست / نوعية اسألوا الدنيا رايحة بينا على فين وكورونا والحروب والقدريات كلها اللي احنا كبشر ملناش ذنب فيها دي في إيد ربنا مش في ايدينا غير الدعاء والتفائل بالخير بس أنا هتكلم أكتر في اللي في إيدنا».
وتابع: «على قد ما قرأت وجمعت آراء من خلال الآراء المتشابهة اللي معظمها اتكلم عن الوساطة والمحسوبية والفشل والإحباط وضعف الثقة بالنفس والعنصرية تناقض المجتمع وعدم الأمان في الدنيا وعدم فرص العمل هحاول أرد على حد علمي وخبرتي المتواضعة في الحياة لعل شخص واحد يقتدي برأيي مش هتكلم على اختلاف عادات المجتمعات لإنه موضوع نسبي ويتعلق ببلدك وتربيتك وعاداتك وأسرتك ،لازمه شرح كبير وأسئلة كتير نسبية رايحة جاية، نيجي لموضوع الواسطة والمحسوبية وكل ما ذكرته في أول الكلام هو فعلاً موجود بشدة وبقسوه وأنا شخصياً مريت بيه وقهرته وأنا طفل وشاب فقير اتعرضت لكل ما ذُكز، يا جماعة بما انك عايش في مجتمع فيه كدا يبقى مش قدامك غير التميز الواضح عشان كفاءتك تحرج أي مسؤول أو مدير يعني لو انت دلوقتي شخص ذو كفاءه عالية لازم تشتغل على نفسك تاني وتبقى ذو كفاءه عالية جداً جداً ومتميز كمان والأهم يكون عندك ثقة كبيرة في ربنا ملهاش حدود، عشان هو شايفك وأكيد هيكافئك على مجهودك بس انت اتعب وأعرف انك تتعامل مع ظروف مجتمعك الحالي، هو عصر صعب بس ينفع تنتصر عليه اما فكرة الفقر والظروف الصعبة عايزك تفهم انك مش لوحدك خالص معظم الناس كدا وفيهم مستسلمش لظروفه ومرضه وقرر يقهر الظروف دي، افتكر دي دايماً إن في واحد اسمه «لولا دا سيلفا» كان فقير وخرج من المدرسة وصباعه اتقطع واشتغل ماسح أحذية وتعب وكافح واجتهد وصبر وفكر يتميز لحد ما وصل بقى رئيس جمهورية البرازيل».
وكان تامر حسني قد نشر بوست تحفيزي عن النجاح وتفاعل معه متابعيه، والذي قال لهم عنه «حسيت ناس كتير كانت مستنية تسمع كلام تحفيزي زي ده، واحنا يا جماعة في العصر الصعب بنواجه كمية حقد وغل وكراهية وطاقة سلبية مش طبيعية لازم نرد عليها بالعكس لازم يكون في طاقة أكبر بترد على كل الإحباط ده، والحقيقة إن أنا عندي بعض الخبرات في الحياة من خلال رحلتي المتواضعة أحب أوصلها ليكم، هحاول كل كام يوم أتناقش معاكم في موضوع أو أقترح عليكم حاجة بعملها دايمًا، هبدأ بحاجة بعملها بإستمرار وعلمتها للمقربين مني ومواطبين عليها من سنين، وهي إنكم حالاً تستحضروا ناس في دماغكم بتحبوهم وتدعو لهم بأسمائهم في ظهر الغيب بكل اللي يتمنوه، وكل فترة نكررها ونثبتها زي ما بنثبت حاجات تانية في حياتنا مش بالأهمية دي، والله هتلاقوا تساهيل كتير حصلت مش هتعرفوا بتحصل منين».
كما وجه «تامر» تساؤلاً آخر بهدف تفريغ الطاقة الفكرية لمتابعيه حسب حديثه إليهم، حيث سألهم عن أكثر المضايقات في النفس والمجتمع والعالم.
من امبارح وانا بحاول اقرا كل تعليقاتكم وطبعاً تأثرت جداً ولقيتني غوصت جوه ماسورة طاقة سلبية رهيبه بس التحدي اني...
Posted by Tamer Hosny on Tuesday، February 9، 2021