قبل إعلانها إصابتها ب«كورونا».. 6 فنانين خالطتهم بسنت شوقي في عيد ميلادها

شاركت الفنانة بسنت شوقي، منذ ساعات، بلقطات مُصورة أثناء احتفالها بيوم ميلادها، وذلك قبل أيام من إعلانها إصابتها بفيروس «كورونا»، وبصحبتها خطيبها الفنان محمد فراج، وعدد من الفنانين مثل الفنانة بسمة والفنان أحمد مالك وأحمد داش، في محاولة لتقديم الشكر إلى الحضور، إذ أكدت على تركهم بصمة خاصة في يوم ميلادها، وعبّرت عن حبها لخطيبها الذي ساهم في جمع الأصدقاء الأقرب إلى قلبها بالوسط الفني في يوم ميلادها.
وعلّقت «شوقي» على الصور ب«انستجرام»: «بوست طويل شوية معلش استحملونى مع أنى بحب جدا وبفتخر أنى برج القوس (بحذافيره) إلا إنى من وأنا صغيرة مش بحب أوى عيد ميلادى، مش عارفة ليه، يمكن عشان وإحنا صغيرين أو حتى أيام الجامعة كان بيبقى وقت إجازة نص السنة وكله بيبقى بيذاكر عشان الامتحانات فمش بعرف احتفل أوى يعني، أو يمكن عشان في الشتاء وأنا والشتاء مش حبايب (غالبا لعدم وجود شمس- وأنا الشمس عندي مهمة أوى أوى يعنى) أو يمكن عشان إحنا العيلة كلها برج القوس (داليا 26/11، ياسمين أختى التانية 6/12، مامى 11/12، أنا 14/12 وأبويا 21/12) فعلى لما بييجى عيد ميلادى بتكون فكرة الاحتفال بعيد الميلاد قدمت شوية».
تابعت: «زاد على ده بقى لما دخلت التمثيل أن ديسمبر هو وقت التسكينات، يعنى سيزون رمضان أغلب أدواره بتتسكن في ديسمبر، فمع كل ديسمبر، دماغى (ودماغ كل الممثلين حقيقى) بتفضل قلقانة هل هيجيلى دور كويس ولا لا، طيب لو مجاش، السيزون يعنى سنة كاملة هتروح عليا، فخلاط المشاعر اللى فوق ده كان بيسببلى أرق وخوف وحالة حزن كدة السنة دى، حصلى العكس مع أنى واخدة احتياطاتى ومستعدة تماما للاكتئاب لأول مرة مش فاكرة من امتى أصلا أبقى مبسوطة في عيد ميلادى، لأول مرة أحس بالحب أوى كدة».
واستكملت: «شكرا لأنى شوفت الحب في عينيكم، شكرا عشان غيرتم وجهة نظرى في عيد ميلادى، وشكرا لكل واحد عشان شاركتونى قلبكم وخوفكم في لحظات من عمرنا سواء في حياتنا الشخصية أو في ورش التمثيل (شله الممثلين اللى في الصورة دول زي أهلي) وأخيرا، شكرا أوى لمحمد (محمد فراج) على المجهود الجبار في وقت قياسى، أنا عارفة أني أبان قوية وكدة بس اللى بيعرفني عن قرب بيشوف الحقيقة، شكرا أنكم سمحتولى أبين حقيقتي وأنا متطمنة وشايلة الدرع اللى بحمي بيه نفسي».
وكان خطيبها الفنان احتفل بيوم ميلادها، منذ خمسة أيام في يوم ميلادها ب14 ديسمبر، أي قبل إعلان مرضها بيومين، بنشر صورة م الحفل عبر صفحته الشخصية ب«انستجرام» مُعلقًا:«الحبيبة والصديقة، والبنت والأخت، وساعات الأم يعني بالبلدي كدة إنتى الحياة من غيرك الحياة مالهاش طعم وبيكى الحياة بتدب فيها الروح وتبقى حياة، كل سنة وإنتي طيبة يا أحلى حياة».
تمر ساعات وتعلن الفنانة إصابتها ب«كورونا»، عبر «فيسبوك»: «أنا للأسف إيجابى، الحمد لله أنا معنديش أعراض، بس مع ده بردو أنا حاملة للفيروس، فياريت أي حد اختلط بيا قريب ياخد باله وياخد احتياطاته ويتابع صحته أول بأول لأن فيه ناس كتير معندهمش أعراض أو أعراض بسيطة جدا»، أضافت: «ويا ريت تاخدوا فيتامين سى وزنك وتأكلوا كويس وتشربوا كتير وتاخدوا علاج وهكذا، أسفه جدا لو اتسببت لأي إزعاج لأي حد من المخالطين».
View this post on Instagram
A post shared by Passant Shawky | بسنت شوقى (@passantshawky)