أنا المصري

قوم يا زمن و جهز ريشاتك
و افرد صفحاتك و استعد
يا زمن آن الأوان أنك
تحكي حكايتي للعالمين
آن الأوان تقولهم أنا مين
أنا المصري
خلقني ربي من طينة غير الطين
و يوم وهبني لأرض الكنانة
من فرحته النيل
انشق فرعين
لأجل ما تحضني فروعه
و يرتوي مني
و يشفي الحنين
أنا المصري
و أبويا أحمس علمني
أن النصر أتي أتي
و لو انتظرنا من السنة
مائتين
و مهما طال الأمد بالعدو
فالأرض ديه
لي وفيه
تحفظ في جوفها كريم الأصل
و تطرد الخسيس الهجين
أنا المصري
و بصمتي على حجارة الهرم
اول بطاقة شخصية في التاريخ
و حق امتياز الصدارة
و برائة اختراع الحضارة
باسمي مكتوبين
و حتفضل يا كرنك
و تفضل كباشك
شهود على عظمتي
من هنا ليوم الدين
أنا المصري
انكتب على جيشي
أفضل جنود الأرض
في رصته تلاقيه
مانع حصين
تشهد الأرض على بسالته
و شجاعته
و اسألو شط القنال
أو اسألو حطين
أنا المصري
و في قلبي متسع لكل فكر و دين
و ياما عدا علي ألوان و وشوش
كل واحد منهم ساب علامة
و سبت أنا فيه ألفين
و لو أخدت منه أنا كلمة
أخد مني هو
بدل الكلمة اتنين
و كل من يدخل في عبايتي ابني
و كيف أفرق بين البنين
أنا المصري
و أسمي علم
يرفعه الدهر فوق الجبين
تنكتب حروفه بماء الدهب
فوق سطور التاريخ
قوم يا زمن و افرد ريشاتك
و قول للدنا انا مين
أنا المصري
ابن المصري
و مين يستاهل حكاياك
زي المصريين