"لو آمن الفرعون" قصيدة جديد لإيهاب قاسم

لو آمن الفرعون
الفاسق المجنون
الكافر الملعون
كنا بقينا جنود
ف جيوش ليفى و داود
كنا بقينا .... يهود
والحلم يتحقق
من الفرات للنيل
يا حلاوة المواويل
بالعبرى عينى يا ليل
بلا مصر بلا نيلة
محلاها أسرائيل
...
واندارت الأيام
ركبتنا الأنعام
وآمنا ونسينا
فرعون ...
وقوم فرعون
ع السبحة سبينا
وف حصة الألعاب
صقفنا غنينا
"يا خى طظ ف بهية"
"دى ولادها الاتية"
"و بناتها فلاتية"
"وجدودها الفراعين"
"كفرة ومشركين"
"خرسيس وفلاحين"
"بيغوطو ف الطين"
"افية يا جلابية"
"ياخى طظ ف بهية"
"أما أنا"
"دنا أمى بدوية"
"و اعمامى تركية"
"و خلانى ماليزية"
"و جدودى فارسية"
"خلطة مغرية"
"ف الطين محنية"
"تجعل قليل الاصل"
"مملوك بحرية"
"يا خى طز ف بهية"
....
من يومها و أحنا من العلا طافحين
العلم راكن مستربع ف باب الخلق
و الخلق هايمة و مزينة البساتين
و الفن زفزف راياتة تحت باب النصر
و النصر هابب علينا من شمال و يمين
و الفكر قاعد يشرب الملوخية
عند أم سيد فتوة الحسينية
يغمز لها
تغمز كمان هية
تشهق قوام
و تطش دى التقلية
....
موتو بغيظكم يا الفراعين
حصوة ف عينكم
كبة تشيلكم
عريتو أم البنى أدمين
بصو و شوفو
ملعون خوفو
دحنا وصلنا للميلامين
....
يا بهية و خبرينى
مين اللى جاتلك مين
أحمس؟.. رمسيس ؟..و مينا؟؟؟
و اللا أمة آمين
و أمين دة بتاع بطاطا
ساكن جنب الكمين
على راس ناصية حارتنا
من ناحية اليمين
و امة نبوية الاكتع
مشتاقة من سنين
للواد سلومة الأقرع
و مخاوية الأمين
....
يا بهية وخبرينى مين اللى جاتلك مين؟؟