هى دى مصر يا عبلة

هو إحنا ليه بقينا عايشين فى فيلم «الشك يا حبيبى»، أى حد مِعَدّى يقلب كياننا ويمشينا على هواه، ليه ناكرين للجميل وذاكرتنا ذاكرة سمك بَسَريا، لحقنا قوام ننسى الوقوف بالساعات على محطات البنزين عشان ناخد لتر زيادة فى جركن، نسينا طوابير السوبر ماركت عشان نشترى خزين يكفى ولادنا لو حصل مجاعة، نسينا الأبواب الحديد اللى عملناها عشان نحافظ على بيوتنا من السطو المسلح، نسينا الطبنجات اللى جبناها عشان لو اعترضنا مسجلين خطر فى الشارع، نسينا ماكينات الATM اللى كانت بتتخلع من مكانها وتتحمل على عربيات نص نقل، نسينا نهب البضائع عينى عينك فى المولات من البلطجية، نسينا حظر التجول واللجان الشعبية وحرق الأقسام وحصار المحكمة الدستورية ومدينة الإنتاج الإعلامى والمتاحف والفنادق، نسينا استشهاد الضباط لحمايتنا، نسينا الجيش اللى تصدى لكل هذه الكوارث ورجع لنا بلدنا من الأعادى، والنهارده جايين نشكك فى ذمته المالية وإدارته الهندسية وقياداته، عايز تعرف ليه الجيش قام بإنشاء مزارع ومصانع غذائية عشان يأمن الإمداد والتموين للقوات المسلحة ويوصل للاكتفاء الذاتى ويوفر نفقات من على كاهل الموازنة العامة للدولة عشان يواجه تعرض مصر لأى نقص فى السلع الأساسة من إنتاجه بأرخص الأسعار، يعنى الحكاية لا هى استحواذ على الاقتصاد المصرى ولا تربح منه، إنما لمواجهة أوقات الأزمات دون أن نكون تحت رحمة أفراد أو شركات أو جهات لا نعرف انتماءاتها، الأعادى فى الداخل والخارج عايزين الجيش يبقى تحت رحمتهم يتحكموا فيه كما يشاؤون عن طريق نقص المعونة بأى صورة من الصور، ولما الجيش تصدى لهذه اللعبة، شحن الشعب ضده بالشائعات المغرضة لزعزعة الثقة والأمن والأمان، رغم أن كل جيوش العالم بتوفر احتياجاتها بنفسها من مصانعها وما يساهم به الجيش من منتجات لا يمثل 4% من إنتاج السوق المصرى، وأحيانًا يطرحها فى منافذ البيع لضبط الأسعار وكبح جشع التجار، بالإضافة إلى أنه لا يقوم بأعمال المقاولات ولا حتى لحسابه، ودوره مراقبة المقاولين وطبعًا المتضررون من منظومة الجيش المنضبطة هما حيتان الفساد اللى ليهم مصلحة وعايزين يغشوا فى المواصفات ومواقيت الاستلام دون شروط، ورغم كل هذه المهام الموكلة للجيش لم تتأثر مهمته الأساسية فى تأمين حدودنا ومحاربة الإرهاب لأنه وطنى لا يباع ولا يُشترى، ولمن لا يعرف هو الذراع الاقتصادى للدولة بعد الخصخصة ويعمل وفق مقتضيات الأمن القومى، تصور سيادتك مصر بعدما خرجت من ثورتين مُحملة بمليون أزمة اقتصادية، لو الجيش ما عندوش احتياطى استراتيجى لتلبية مطالب شعبه وإمداده بكل احتياجاته كان الحال هيبقى إيه؟!، إذن الهوجة الحالية على الإدارة المصرية مش صدفة، لكن مدروسة ومنظمة وتهدف لإسقاط الدولة بعد تبنيها لقضايا إفريقيا وقرب تنفيذ أحكام نهائية فى قيادات الجماعة الإرهابية وكثرة التوسعات وتعاظم الإنجازات التى تشهدها البلاد، إحنا بنواجه تكتلات عالمية مش مجرد أفراد عايزين يكسروا شوكة مصر فى المنطقة والعالم وبيضغطوا علينا خارجيًا عن طريق سد النهضة- مملكة الجبل الأصفر، وداخليًا عن طريق رمى بذرة الشك جواك عشان يوقعك مع جيشك ورئيسك وتبدأ تتذمر وأنت مش فاهم أبعاد الموقف، إحنا فعليًا بنستعد لحرب شاملة وكان لازم وجود عاصمة إدارية جديدة لو تعرضت العاصمة الأصلية لأى خطر نقدر ندير البلد منها، وكان لازم وجود مناطق عسكرية جديدة زى قاعدة محمد نجيب بحيث تغطى مسافة ممكن تتعرض للخطر بين المنطقة الشمالية والغربية، تفتكر يا محترم ليه بنشترى غواصات دولفين وصواريخ ومقاتلات هجومية وبنبنى أسطول بحرى جنوبى غير الأسطول الشمالى، ليه بنصلح الجيش بأحدث الأسلحة والطائرات والمدرعات عشان نعمل عرض عسكرى مثلًا؟!، العدو عمره ما هيكشف لك نفسه ولا يدخل معاك فى مواجهة مباشرة، الأول هينهك قوتك فى صراعات ملهاش ملامح وهيضعف عزيمتك معنويًا بالانقسام والفوضى ويعطلك عمليات البناء فتكون مؤهلا للهزيمة من قبل ما الحرب تبدأ، طريقة قديمة ومتكررة، لكن بتجيب نتايج لوقتنا هذا، مش عيب علينا نتكعبل للمرة المليون، خليك فاكر يا من تعترض وتنتقد دون دليل مادى أن قوتك المسلحة المجيدة عقبة هائلة فى تنفيذ خطتهم الشيطانية، آدى الخطة وآدى أهدافها، وآدى مصر يا عبلة، أنت هتكون مع مين؟!.