بمناسبة أعياد تحرير سيناء ( شعب واقف ع الزناد )

شعر عامي
....................
( شعب واقف ع الزناد )
....................
كنت عارف يا حبيبتى
وأنتى عارفة
إن بكره تحت شمسك
حلم دافى بين قلوبنا
زى توبنا
مانتى فينا
حته من لحمة وادينا
بسمة الحب اللى عايشه
بين عنينا
كنت بحلم يا حبيتى
يوم أشوفك
لابسه طرحه
والف فرحه
فوق شفايفك
يوم ما اضمك
بين ضلوعى
يوم عبورى
وافضل احضن
حب رملك
وازرع الأشواق غناوى
لجل تطلع
تكبر الأحلام دى فينا
كنت بحلم كل لحظه
وكل ساعه وكل يوم
كنت بحلف بالكرامه
وبالإراده وبالنجوم
كنت عارف إنى راجع
أيوه راجع لارض سينا
وافضل ارسم يا حبيبتى
ف ألف مدنايه جديده
لجل نور الحق يعلى
فوق ترابك
والمح البسمه
ف عنيكى والبشاشه
والدليل
حب دافى
م العريش ولحد طورك
من رفح ولحد طابا
لون عيونك سلسبيل
رحت طالع من سكاتى
بعد ما اتلمت
إرادتى وبكرامتى
قمت واتوضيت ف نيلك
شلت زادى والحضاره
كان سلاحى بين ضلوعى
فى العروق
كان ورايا الشعب واقف
ع الزناد
شعب كله كان بيعبر
كان بيحفر فوق صخور الحلم
كلمة إنتصار
كان بيرسم عمر تانى
م الكرامه
كان بيطحن فى الحصون
كل ظالم إيه يكون ؟
بالإراده كان لابد ف يوم نكون
كلنا كنا جنود
والسلاح هوه الصمود
لجل ينبت من دمانا
فوق ترابك حب أكبر
عمر أزهى من النهارده
وف دروب الفرح يعلى
طيف سلامك
فوق غصون الحب
ويرفرف حمامك
والامان يملى الوجود .