هواية الكذب

لاحظت العنوان .. من فضلك ركز فيه هواااااااااية الكذب ..
ما هو المعنى اللغوي لكلمة هواية ..
الهواية هي الحاجة اللي بتهواها "بتحبها" بس مش بتكسب منها حاجة غالباً .. بل يمكن بتضيع من وقتك ومجهودك وأحياناً فلوسك .. ويمكن حياتك في أوقات .. مش ده موضوعنا
هواية الكذب هي موضوع المقالة المسخوطة دي .. وعشان نلخص الليلة انا مش عايز أرغي وأصدع دمغكم معايا بكلام فارغ مالوش أي لازمة أنا هانجز و ألخص
تعليقاً على ما يحدث في العالم العربي حالياً من كذب بالجملة مع العلم بان الكذب دا حاجة مش بسيطة و صعب تلاقي كذب من الغالي .. الأصلي يعني .. اللي واضح انه "شاحح" .. لدرجة ان كل الحكام بقوا بيشتروا كذب من الصيني .. عشان كدا كلهم بيكذبوا نفس الكذبة ملتزمين و متزمتين بشعار : " بالتكرار يصدق الحمار " .. المشكلة هنا مش في الشعار المشكلة هنا في الحمار .. عارفين ليه لأنه مش حمار واحد دا 400 مليون حمار .. انا آسف في التوصيف .. مش القصد الاهانة و الله .. لكن دا توصيف مهم .. انا بتكلم عن سكان العالم العربي اللي مفروض ان الموساد و cia ... و WC .. - و دي منظمة معروفة بريحتها الفايحة -مستهدفينهم و عايزين يقضوا عليهم لدرجة انهم بيدربونا على تدمير الانظمة الحاكمة النبيلة الطاهرة العفيفة بتاعنا وأحنا مش عارفين أنهم بيدربونا لحد ما نقع في الفخ اللعين ونهدد أستقرار وأمان بلادنا .. على رأي دبور في فيلمه الشهير a*a ..
و من غير لكلة و كلام لا يودي و لا يجيب .. أنا قررت أنني أعلن عن أكتشاف خطير في عالم الطب هيهز المجتمع الطبي في العالم العربي و الشرق أوسطي و الغربي والشمالي الشرقي من الآخر هيعمل زلزال تسونامي بس المرة دي على شكل طوفان وهو .. ياريت الكل يبقى لابس الكمامات على ودانه عشان العدوى
"داء حسني"
المسبب لحالة مفرطة من الكذب المتناهي المتلاهي المتوازي و يبقى علاجه الوحيد التزاما باعلان حسب الله الكفراوي .. الضرب بالجزم !!!
مع اني متأكد ان الجزم مش بتجيب نتيجة .. و إلا كانت جابت مع بوش لو انتوا فاكرين ..
و العيب الوحيد للفيروس دا انه بيسبب حالة من الكذب الرخيص و بيخليك تكذب كذب خايب بيخلي شكلك وحش .. لدرجة انك بتضطر تعمل عمليات تجميل لمناطق كتير في كلامك .. و دا بيشده جامد و يخليه مش مرتاح ..
و لهذا فأنا انصح بتوخي الحذر و تناول المضاد السريع له و هو سداده اذن مقاس 25 يناير 2011 و يمكن المقاس يتغير حسب البلد اللي انتا فيها .. هتلاقيه مقاس 17 فبراير في ليبيا مثلاً و هكذا ..
أنا بس أحب أشدد بصفتي طبيب متخصص بأن المرض دا أعراضه مفضوحة جداً مثلاً .. حالة من الكذب المفرط لدرجة انه ممكن يكذب وبعدها بدقيقة يكذب كذبة تانية عكس الاولى ..
و هنا أيضا توابع ليه زي حالة من السهوكة اللي مالهاش مثيل زي الأخ تامر بتاع غمرة أتمنى أن الناس ماتكونش نسيت وخصوصاً أنه كان بيتكلم أنجليش لانجودش كويس جداً ..
و هناك أيضاً أعراض تانية متفشية وأوضح من دي زي .. ولا بلاش عشان ماحدش يزعل ..
انا لي تعليق بسيط .. هل الكذب في العالم العربي حقا داء يجب استئصاله أم أن الحكام خلقوا ليكذبوا !!!
و زي ما قال تميم البرغوثي
في العالم العربي تعيش
كما قط ساكن تحت عربية
عينيه ما تشوفش في الدنيا دي
حاجة إلا الجزم