أنا رحت الميدان مالقيتوش

الحق ............... أنا رحت الميدان مالقيتوش
وكل اللى فاكره انى ساعتها ما صدقتش اللى قال ما نسيبوش
هى دى غلطة ... والا حلم وهاصحى ما افتكروش
انا حلمى كان جميل ..... وكانت نيتى انه يتحقق وما انساهوش
اصحابنا اللى كانوا فى الميدان ، دلوقتى على كل قناة ما بيسكتوش
هوه انتو وانتو رايحين ... على الميدان ما عديتوش ؟
وكاتبنا بيكتب ويحلل ، طب ايه الفرق ؟ ما هو كان بيكتب و النظام ما يعبروش
والشرطة مش راضية تنزل ........ والبلطجة فى الشارع حلق حوش
والثورة بقت 100 حزب .... والجروبات على الفيس بوك ما تعدوش
وجمال وعزمى فى النادى ..... هوه احنا مش عملنا الحظر علشان ما يبرطعوش ؟
ورجعلنا عبود و اصحابه .... هوه فيه ايه ، الناس دى ما بيموتوش
وحريقة هنا و حريقة هناك .... اما بالنسبة لغليلى على الشهدا ، النائب لسه ما طفاهوش
وفلوسى اللى هنا وهناك ........ كل المليارات دى لسه ما رجعوش
وقانون اعتصامات وشغب ......... بس على الله علينا ما يطبقوهوش
اما بالنسبة للجيش ....... ده خط أحمر ما نقربلوش
والمجلس شغال ولحاله ..... والدنيا حواليه تضرب تقلب ما بيهموش
يا اصحاب الثورة ، شباب و كبار .... احنا عملنا الثورة علشان الغلط ما نعديهوش
الغلطة فين ؟ ......... والله اللى بيحصل ده كله على بعضه ما بفهموش
هوه اللى بقوله صح واللا الميدان لسه فى مكانه ... وانا من لخبطتى ماشفتهوش
شكلنا كده هنبدأ من تانى .... بس المرا دى اللى يقولوهولنا ما نصدقهوش