فيديو.. توقعات فلكي للنجوم 2015: مصير باسم يوسف وصحة كريم عبدالعزيز وزواج هيفاء

توقع الخبير الفلكي محمد فرعون ما سيحدث للفنانين والمشاهير في عام 2015، بينهم عمرو دياب وباسم يوسف وأحمد حلمي وكريم عبدالعزيز، كما لفت إلى أن ثلاثة نجمات سيتزوجوا في السنة الجديدة.
وقال، أثناء حلوله ضيفًا على الإعلامي عمرو الليثي في برنامج «بوضوح»، على قناة الحياة، الثلاثاء: «السنة الجديدة سيسيطر عليها برج يسمى ب»برج الثور الترابي«والكوكب اللي نازل هو كوكب الزهرة وده بيدي آمان وسلام في الكون، ولكن داخل معاه كوكب اسمه عطارد بيبقى كوكب متقلب شوية، فبيخلي الأمور ساعات ممكن تنقلب بسرعة جدًا في الكون».
وأوضح: «أنا شايف إن عندنا عمرو دياب هيبقى نجمه عالي السنة دي، أحمد السقا هيبقى الحظوظ بتاعته عالية، عندنا شيرين عبدالوهاب هتبقى متوسطة الحظوظ بتاعتها واحتمال يبقى فيه إعلان لزواج ليها، عندنا غادة عبدالرازق الحظ السنة دي معاها مش تمام هيتخلى عنها مش هيبقى مرفقها وهيبقى عندها أخبار برضه مش كويسة».
وأضاف: «هيفاء وهبي برضه عندها زواج السنة دي، يعني على ما أتوقع والفلك ما بيتوقعلها، إن هيبقى عندها زواج من رجل اقتصاد خليجي مش مصري».
وتابع: «عندي برضه تامر حسني الحظوظ بتاعته مش حظوظ كبيرة السنة دي، برضه زي ما تقول كدة بيبقى موجود حاجة كدة في القبول، الإنسان بيبقى موجود ومش موجود، فالحظوظ شيء مهم في حياة الفنان يعني، عندنا برضه كريم عبدالعزيز عنده الحظوظ بتاعته عالية جدًا السنة دي، بس بنقوله برضه أهتم بصحتك لأن في عنده برضه شوية مشاكل في الصحة، لكن على الحظوظ بتاعته الفنية عنده نجاحات كبيرة جدًا وأعمال موفق فيها».
واستطرد: «النجمة حورية فرغلي عندها برضه السنة دي ارتباط وزواج، وعلى المستوى الفني النجاحات بتاعتها برضه عندها أخبار سارة، فالحظ معاها يا ريت».
وأكمل: «عندنا باسم يوسف هيعود من جديد ولكن مش هيحقق النجاحات هيبقى برضه متواجد على الساحة ولكن غير متشاف بالمرة، فالحياة معاه مش تمام يعني، عندنا برضه رانيا يوسف الحظ معاها حلو السنة دي، عندها حظوظ حلوة ونجاحات كبيرة ممكن تحققها، بس تخلي بالها في ناس ممكن يتقربوا منها يعملولها مشاكل كبيرة، يعني عندها مشكلة في الحتة دي».
وأضاف «فرعون» لتوقعاته: «منى شلبي الفلك بيقولها إن الحظوظ بتاعتها لازم تشتغل على حالها كثير جدًا لأن الحظوظ برضه، القبول مش هيبقى مساعدها إنها تحقق النجاحات اللي كانت بتحققها قبل كدة.. محمد هنيدي هيعود للتألق من جديد، عنده شغل ونجاحات الحظ معاه عالي جدًا، محمد سعد بقوله عندك أشياء مخيفة في الطالع بتاعك، النجم بتاعك واقع خالص، فحتى مهما الإنسان بيشتغل مبتبقاش الأمور معاه ماشية في المستوى المطلوب.. نيلي كريم السنة دي عندها بعض المشاكل على المستوى الأسري، برضه الحياة محتاجة منها شوية شغل كبير».
واستطرد: «يحيى الفخراني بنقول له إن الحظ بتاعه حلو السنة دي جدًا والنجاح إن شاء الله في كل الأعمال اللي هيكون مشارك فيها.. أحمد حلمي بنقول برضه السنة دي سنة مش كبيرة بالنسبة له، ولكن هي سنة تابعة حتى البرج بتاعه العقرب عندهم حظوظ بس ولكن السنة دي برضه هيبقى رتم الحياة عنده مش الكبير أوي، هيبقى عنده بعض العراقيل.. جورج وسوف بنقوله عنده الأعمال الفنية بتاعته تكاد تكون منعدمة والتألق بتاعه مش المطلوب وعنده مشاكل صحية».
أين تذهب هذا المساء؟.. اشترك الآن