الكلام ليكى ياجارة

إللى حصل فى الخَضرا عركِة حارة
طاحِت بريع تلاتين سنة و وزارة
مَسَحِت تاريخ , كتبت تاريخ بإشارة
و الوِلعة راح تبدأ بِعُقب سيجارة
أصل الكلام ده كله ليكى ياجارة
ياللا الحقوا طَفوا إللى جوه نفوسنا
فكونا من نعلكم قبل الغريب ما يدوسنا
العرض طَوِّل و ماسخ رجعوا لنا فلوسنا
هىَّ الدراما كده ؟ نحنى و ندفن روسنا
ما اوعدش يمكن يومين أو خطوتين فاضلين
تِرُدو ورث إتنهب و ترجعوا لنا الطين
و ترخصو لنا الغاز و تعيينو العاطلين
الليستة لسه طويلة و إنتو موش فاضيين
خللوا المطار مستعد و الموتور بيدور
طيارة متفَوِّلة للصحبة عشرين دور
و تحسوا طعم الغربة , كومبارس مالكوش دور
ألا أونا . . آخر ندا . . إتجنبوا المحظور
يا تونس الخضرا أنتم السابقون
الوهم رعرع هنا , فاكرين سكوتنا سكون
ما تخييبوش ظننا . . إحيوا أمل مركون
الشعب قال كلمته , يا حُر كن . . فيكون
حسن العربى