ملكة فى المنجاااا !!!!

نازلى
ملكة بجد
عاشت ملكة
بس مماتتش ملكة
لا بشكل ولا بشكل غير رسمى، فى حياتها عاشت ملكة حتى بعد اللقب ما أتشال منها لكن فى النهاية خسرت كل حاجة حتى حب الناس و حتى بنتها .
فى محاولة فاشلة لأستعادة تعاطف الناس معاها وحب الناس ليها وللأسرة عملوا مسلسل عجيب غريب مريب، وجابوا (نعجة الجماهير) تمثل دورها بس فعلاً أنت محاولة فاشلة.
اولا مخدوش بالهم ان الفنانة الكبيرة كبيرة اوى اوى اوى و عدت السبعين يعنى كبرت على أدوار الستات اللى فى عمر الأربعين دول كمان خلوها تعمل الدور من أول ما نازلى كان عندها 30 سنة !!!!!
ثانيا نسيوا أن صاحبة الجملة الشهيرة سلملى على البتنجان ست طول عمرها بتعمل رقاصة، خدامة، جاسوسة، أو مجرمة يعنى ست بيئة قاموا مرة واحدة مدينها دور ملكة بحجة أنها كانت ملكة على عرش السينما المصرية قال يعنى مش عارفيين أن هى فضلت على العرش بسبب (اللحم الأبيض) على فكرة حتى الناقد السينمائى طارق الشناوى قال هى عملت دور ممكن نقول الملكة نادية الجندى مش الملكة نازلى
ثالثا : أنا من محبى تصميمات هانى البحيرى لكن لما بيتعمل عمل بين قوسين (تاريخى) فى صور ووثائق و فترة زمنية بتحكم الملابس
لكن فى المسلسل كان عندهم وجهة نظر تانية خالص سواء فى السواريه اللى له صور أكيدة وموثقة أو فى الماتينيه اللى فى قواعد و بروتوكول وطريقة لبس لزمانهم للعلم السواريه تصميم هانى البحيرى والماتينية تنسيق إيمان محروس صاحبة الخط الرائع (eve)
مثلاً فى زفاف الأميرة فوزية مش دة الفستان الصحيح أنما ده هو الصحيح .
أما الماتينيه فمصيبة ما بين الأطقم الجينز والبلوزات أم بربرق والبنطلونات والميكروجيب والبنطلونات الجلد ستايل مايكل جاكسون و السكيننيز.. أكدولى أنهم أكيد كانوا بيصوروا مسلسل عن نادية الجندى ملكة البوب
فى حاجة كمان بالنسبة للمظهر هما أنهم نسيوا يقولوا للماكيير أن شعر الملكة نازلى كان أسود
أما بالنسبة لمظهر القصور فهما أكيد عمرهم ما سمعوا عن قصور مصر وجمالها لا عابدين ولا القبة و لا المنتزة ولا حتى الطاهرة لأن الديكور بيدل على أنهم ميعرفوش أصلا الفرق بين القصر والفيلا الدوبلكس
أما الأميرة شيوه كار والسلطانة ملك فعايزين تدوينة لوحدهم على اللى كانوا عاملينه فيهم فى المسلسل الحمد لله ماتوا قبل ما يشوفوه
أكتفى بأنهم كانوا ملبسنهم تيجان ليل نهار
-----------------------------------------------------------------
نيجى بقة للأحداث العجيبة الغريبة المريبة
أولاً السيناريو العجيب والأخطاء العجيبة
زى ما شوية يقولوا لطفية هانم و شوية لطيفة هانم
شوية يقولوا تاج الملوك وشوية قوت القلوب، قوت القلوب دة اسم سمنة على فكرة مرسوم عليها ست لابسة برقع محدش يشتريها عشانها نباتى مضرة .
مشهد خطف البرنسيس فتحية مشهد يوقع من الضحك
و قال أيه الدفاتر عشان المجوهرات تتباع بمليووووووون دولار بدل 100 الف
عندهم مشكلة فى الأرقام بيفوتوا أصفار
اللى صعبان عليا فى الموضوع حاجتين أولاً راوية راشد لأن كاتبها بجد أكتر من راااااااائع و الملكة نازلى اللى الناس كرهتها أكتر و فضلت تتريق طول الشهر تريقة ضيعت صياام شهرهم كله منك لله يا نادية
برضو كتير من المشاكل دى كانت ممكن متبانش لو كانت وفاء عامر هى اللى مثلت الدور والكل كان مراهن عليها و كان هيبقى رهان كسبان .
بالتاكيد ملكة فى المنفى أوحش مسلسل فى رمضان السنة دى أوى على الأقل من أوحش 10 مسلسلات بالإجماع من كل الناس اللى تعرف تاريخ الملكة نازلى وتعرف تاريخ نادية الجندى .
وأن نادية الجندى كسبت أحسن ممثلة فى مهرجان الإعلام العربى دة أكد أن المهرجان زى سوق للترويج للمسلسلات اللى أشتراها التلفزيون المصرى لعرضها .
نصيحتى لصاحبة الجملة الشهيرة سلملى على البتنجان :
إذا عوزتى تعملى دور ملكة فأختارى ملكة العصير ملكة المسخرة ملكة الهجص ملكة الباذنجان أو على الأقل ملكة فى المنجاااا !!!!!
التدوينة اللى هنا هى هى اللى على المدونة بتاعتى على اللينك دة
http://reesha-filhawa.blogspot.com/2010/12/blog-post_29.html