رسالة من حمار

وصلنى الميل التالى على بريدى الإلكترونى بعنوان «رسالة من حمار» فأردت عرضها عليكم: يا بن آدم يا كبير الدار.. قلبت الدنيا ع اللى قالك يا حمار.. هو اسمى شتيمة ولا جنسى ده عار؟.. خلقنى ربى وخلقك ولا حدش له خيار.. أنا مهما زاد الحمل على صابر على المشوار.. لا فى يوم أقول اشمعنى أخويا واخد منه تار.. ولا يوم أبص لرزق غيرى وأطلق منه وأغار.. ولا أرفع عينى على جارتى وأخوان الجار.. ولا مهر أدفع لحمارتى ولا شبكة ولاسوار.. ولا شقة أجمع فى ثمنها ولا أجهز دار.. ولا حرمى حامل تتوحم عايزة الكافيار.. ولا بنتى تخرج عن طوعى وتجيب لى العار.. ولا ابنى يدمن ويهلوس ويقع ينهار.. عايش فى حالى ومتهنى.. وليه أحتار؟.. باكل وبشرب وبنهق وما فيش أسرار.. مش بس كده.. وعندى ابن آدم يخدمنى ليل ونهار.. إن جعت يشترى برسيمى بأغلى الأسعار.. وفى مرضى يفضل يعالجنى ويدعى الستار.. خادم أمين من غير راتب ولا حتى إيجار.. دلوقتى عرفت يا بن آدم.. مين اللى حمار؟