المصريين بالخارج والانتخابات

واحد مصري بيعمل بالسعودية سألني السؤال ده:
أخي الحبيب د / م / جمال
كيف حالك ويا رب تكون بخير وسعادة ومستمر في العطاء والجهد المميز ربنا يعطيك الصحة والعافية. كنت بسأل عن موضوع الانتخابات للمصريين بالخارج طريقتها وهل لها تأثير لأني لسه مسافر السعودية من شهر ومش عارف إيه الموضوع ده برغم يأسي من النتيجة بس يمكن أحاول إذا وجدت بارقة أمل كما يقولون ...
وربنا يصلح أحوالنا ويولي علينا خيارنا ولا يولي علينا شرارنا قولوا آمين، وجزاك الله خيراً، ولا تنس ذكر الله .... لا إله إلا الله.
ورديت عليه وقلت: يا راجل قول كلام غير كده أنا بقول المصريين بالخارج مين قال إن المصريين في السعودية هما مصريين بالخارج يا راجل هو أنت متعرفشي أن المصطلح ده للمصريين الخواجات بتوع أمريكا بالذات إنما حضرتك وبقية المقيمين في دول الخليج دول مصريين عرب يعنى بالصلاة على النبي مصريين بالداخل ... برضك حد يصدق إن السعودية بالخارج ده حتى لما أنت تركب الطيارة هي بتشرق ولا بتغرب ...طبعاً بتشرق إذاً هى بالداخل وهو المطلوب إثباته وخد الخبر الطازة ده سمعت وشفت بالتليفزيون المصري إن الانتخابات بقت سلطة مشكلة ممكن بالبطاقة الانتخابية وممكن بالرقم القومي وممكن بالاثنين معاً وممكن تجيب شهود معاك إنك أنت واخد آخر حاجة ممكن المناديب يشهدوا إنك أنت أنت ومش حد غيرك ......وعجبي!
نسيت أقولك أنا رافض تماماً المشاركة في هذه المهزلة الانتخابية لأنني مش فاهم يعنى إييه "كوتة" وأنا أعتقد إنها "كوسة" بتاعت زمان ...قال كوتة قال ....والحريم بتوع الوطني وبتوع ال"كوسة" ستعرض أسمائهم على جدو "حسني" رئيس الحزب الوطنى لاختيار أجملهم وأصلحهم بغرض تجميل وتحسين منظر الحزب مع الاعتذار لهيئة "نظافة وتحسين وتجميل مدينة الجيزة "
أصل انا من سكان الجيزة في حى المهندسين المحاصر بميت عقبة وأرض اللوا (اللواء) مع الاعتذار لغزة المحاصرة من كل جانب.....ودي بقه آخر عجبي في هذه المشاركة!
ولا إله إلا الله.