6 اكتوبر فى المدرسة!!!!!

مستنى 6 أكتوبر عشان أكتب فى ذكراه
لكن قررت إنى مش هكتب الكلام التقليدى اللى الكل زمانه كتبه دلوقتى
مديرة المدرسة بتاعتنا ست محترمة جدا و مصرة على تنمية الروح الوطنية عند كل طالب
عملت لنا حفلة إمبارح بمناسبة 6 أكتوبر و كانت من تقديم الطلبة.
المهم فى الحفلة و خطف إنتباهى كلام مدرسة التاريخ فى الحفلة
حبيت أكتب لكم الكلام اللى قالته :
حرب أكتوبر مش مجرد حرب بين دولتين
دى حرب ما بين جبهتين كل جبهة لها إتجاهاتها و لغتها و دينها و قيمها و أهدافها
المصريين بعد النكسة عرفوا كدة كويس و لما إبتدوا يستعدوا لتحرير أرضهم كانوا حاطيين ده فى الحسبان
درسوا عدوهم الأول و شافوا إزاى يقدروا يدخلوا من الثغرات اللى فى نظامه الدفاعى
أول حاجة يوم 6 أكتوبر كان موافق العاشر من رمضان و محدش كان يتوقع أن ممكن الحرب تبقى فى رمضان
و كمان كان يوم عيد الغفران عند اليهود و دا يوم مخصص للصلاة بس.
الطيارات المصرية لما جات تهاجم كانت تقريبا لمسة المياة ودا لان المصريين عرفوا إن عشان ردارات العدو متلقطش الطيارات لازم تطير قريبة جدا من سطح البحر, فكانت الطيارات المصرية تروح تضرب و ترجع و إسرائيل مش عارفة هى بتضرب إزاى و إزاى حائط الصورايخ مشتغلش.
و خط بارليف اللى عمله حاييم بارليف و كلفه 500 مليون دولار بفضل سلاح المهندسين فى ست ساعات مكنش له اثر
و الزوارق اللى مكنش حد أبدا يتوقع إستخدامها كل دا حصل بسرعة و بتناغم خلى العدو يفقد توازنه بسرعة كبيرة جدا.
قبل ما تختم قالت لو إحنا بنتعب دلوقتى معاكم بس فى المستقبل هتطلعوا عظماء زى أبائكم الشهداء و هتعملوا حاجة للبلد يبقى دا بجد أحسن تعب فى الدنيا.
و فى الاخر قالت لنا :
حرب أكتوبر كانت صناعة مصرية يا ترى فين الصناعة المصرية دلوقتى ؟؟؟