أم الشحات فى ليلة رمضان

الشحات الحيلة اللى فاضل من خمسة ماتوا قبله.. قلب القلب وحبة الحبة ولبة اللبة.. أم الشحات أصبحت خبيرة فى كل أنواع التجارة.. شقتها الصغيرة ولا أجدع مول! (من السجاير) (للمنطلونات) (للحلل) و(مفارش السرير) والسكاكين وقمصان العرايس الشفتشى الحرير الرعّاش.. ناهيك عن الفياجرا لزوم الزوجة الثانية! شوكلاتة إسرائيلى من غير ماركة.. الشحات رماها فى الزبالة وقال لها: إلا إسرائيل يا أمه ده حاطين لنا فيها سم فيران!!
الشحات حب بنت الحاج مدبولى تاجر العطارة فى شارع زين العابدين وياما ركبها فى التوك توك بتاعه فى الرايحة والجاية.. البت تقيلة وحبته هيه كمان.. الشحات عاوز يخطب..! طب إزاى، فين الشبكة 30 جرام ذهب.. ومنين حفلة الشبكة على الأقل فيها 4 دست شربات ورد، و4 شربات لوز.. و15 دستة جاتوه غير الكوافير والفستان أم الشحات قالت أوسّع التجارة.. داخل رمضان، أشترى حاجة رمضان م الجمعية وأبيعها فردانى!
الشحات جه يجرى:
- أمه.. تعالى بسرعة أبو قورة بيقولك مادام بتشتغلى فى حاجة رمضان عنده بضاعة كثيرة جدًا من اللى الحكومة ضبطتها مغشوشة.. زبيب وبلح وجوز هند.. الحقى يا أمه أصل التجار راحوا جرى لأبوقورة.. لأنه قال لازم تاخدوها بسرعة أحسن مرزوق بتاع التموين حياخدها بلدهم فى عربيات بالليل يبيعها هناك.
لفت أم الشحات طرحتها بسرعة.. وفكيك على أبوقورة.
- جبتى فلوس معاكى؟
- ليه هو أنا بعت علشان أجيب فلوس؟
- يا وليه بتوع التموين حياخدوا فولس ويسيبولك البضاعة كلها، ألفين جنيه منك وتلاتة منى وحناخد بضاعة بتمنهم عشر مرات.
- يا أخويا أنت عارف كله ع النوتة وباخد ألبس طاقية ده لده!
- خلاص مالكيش نصيب.
وخلعت غويشتها الدهب وربطتها فى منديلها وأعطتها لأبوقورة.
- خد دى يا أخوها دى ثمنها أكثر من ألف.. بس ما تبيعهاش، حديك بعد ما أبيع البضاعة وآخد الغويشة.
- فحص الغويشة ووضعها فى جيبه وأعطاها البضاعة، شوال تمر وصندوقين زبيب وصندوقين جوز هند وصندوقين تين وتلات صناديق قمر الدين.. وحطوا الحاجات فى توك توك الشحات وجرى على البيت.
امتلأت الحجرة بحاجات رمضان حتى أنها رصت جزءا كبيرا منها فى النافذة الوحيدة.
وبدأ زباين رمضان.. والفلوس ملأت عبها.. وكان قمر الدين هو أهم المبيعات.
وأخد الشحات جزءا من البضاعة فى التوك توك وذهب بها فى نهاية الحارة ليبيع هو الآخر.
وفجأة جاءت عربة التموين.. مباحث التموين طبت.
- إنت يا وليه بتبيعى بضاعة مضبوطة وواقعة على أنها بضاعة كويسة؟
- والنبى يا خويا دى زى الفل!
- يا ولية الشوال متعلم عليه والصندوق متعلم عليه.. دى بضاعة مغشوشة.. ومضبوطة قبل كده.
- ما أنا عارفة يا سيادة الأمين (أمين الشرطة) ودفعت المعلوم لأبوقورة.. هو ما دفعلكوش.
- يا وليه يا مجنونة.. يا مغفلة يا تدفعى يا ناخد الحاجة دى كلها! أبوقورة خد نصيبه.. لكن لسه نصيبنا احنا!
- وأخرجت كل ما باعت به ووضعته بين يدى الرجل.
- هو أنا بابيع لب يا وليه.. البضاعة مالية بيتك..! الله يخرب بيوتكم غشاشين وطماعين.. هاتى يا وليه.. تعال يا واد يا قرنى لم الحاجات دى!
وبدأ قرنى يجمع الأشياء بعد أن أزاحها من طريقه فانكفأت على وجهها. وقامت تحاول أن تمنعهم من أخذ الأشياء.
ولكن أمين الشرطة أمسك بيدها وقال لها:
- إنت ما فيش فيكى فايدة.. أنا آخدك ع القسم وانت متلبسة ببيع بضاعة مغشوشة.. والحبس من ستة شهور لثلاث سنوات، رقعت بالصوت والحارة ترش الملح ما ينزلش من العيال والكبار.
وتتطاير العبارات:
- مباحث التموين.. يا لهوى البضاعة مغشوشة.
- بيقولوا دى المعونة بتاعة بتوع غزة!
- يا مصيبتى دنا أخدت منها حاجات بتلاتين جنيه!
- إلحقى يا سنية بيقولوا جوز الهند متسمم.
- هات يا واد يا عبعال الزبيب بيقولوا إسرائيل حاطة فيه سم فيران.
- والبت الشيماء خدت كيس الزبيب هدية لصاحبتها، يا لهوى لا البت تموت!
وكان الشحات قد وصل تحت شباك سمية بنت الحاج متولى وحدف لها أكياس التين وجوز الهند والزبيب.. وهى تلقف الأكياس وتتسع ابتسامتها مع كل كيس:
- خلصنى بأه قبل ما أبويا ييجى من صلاة الجمعة!
- أبوكى بيجرى ورا المزز.. الصلاة خلصت من زمان.. ما أنا صليت قبل ما أخرج للشغل.
ويتوه الاثنان فى نظرات الوله والحب ولا يدرى الشحات أن أمه أخذها أمناء الشرطة متلبسة ببيع بضاعة مغشوشة فى شهر الصيام.. لأن الضابط صمم على إحضار المتهم!
أما أبوقورة فقد جلس يستمع إلى حكاية القبض على أم الشحات ولم يعلق سوى بكلمة واحدة وهو يحرك حبات السبحة بتلقائية بين أصابعه.
- وليه غشاشة بتاكل فى الحرام! وباتت أم الشحات ليلتها الأولى فى رمضان فى التخشيبة وأبوقورة فى سحور الهناء مع أولاده.. سبحان الله.
قبل الطبع
بدأت الإعلانات عن المسلسلات تملأ الصحف.. وبدأ الناس ينظمون مواعيد خروجهم ودخولهم على مواعيد بث المسلسلات.. أما مواعيد الصلاة فهى فى إمساكية رمضان.. واقتصرت المسلسلات الدينية على أخبار المحظورة من القبض والإفراج وتبادل الاتهامات والإلقاء بالفتاوى من الشبابيك لعل الشرطة تجمعها مع بضاعة أم الشحات المغشوشة، وكل عام وأنتم مسلمون.. ومشتتون.. بالصلاة على النبى!