بطاطا بطاطا

الوقت متأخر
وما عدش ينفع..
طول عمرك بتيجى على نفسك
وتسافر.. وتبعد
لكن بترجع..
إشمعنى دلوقتى
عايز تروح ما تجيش..
وكل ما أقولك مالك..؟
تقول.. مفيش
هو أنت لسه بتفكر
ودلوقتى
بعد ما بقيت بتنهج من سلمتين
رايح تدور على وطن تانى فين..
فاكر الزمن واقف ما بيتحركش
بص ف تاريخ ميلادك
واحسب سنك..
استنيت ليه لما كبرت
والحزن بقى أكبر منك..
كان ف إيدك الورق
ومستوفى كل الشروط
فضلت تحسبها بقلبك
وأقطعت الورق
وحلفت والله ما هموت
غير ف حضن الحبايب
طول عمرك فى الحساب خايب
الوقت متأخر
وما عدش ينفع ندم..
جواز سفر محترم
كان كفيل..
يحمى طفلك الجميل..
من كل تجار الفساد..
يا أخى كنت اعملها
عشان خاطر الأولاد..
جواز سفر محترم يا عم
كان أهم من كل اللى كتبته
واللى لسه ها تكتبه
قلتلك دول وحوش ما بيرحموش
ولا ها يبطلوا يكدبوا
الوقت متأخر
والله يكون ف عون اللى يقع
ف البلدى ويقول أنا محتاج..
معلش يا ابنى
لا عندى صبر ولا ف إيدى العلاج
سامح أبوك لو كان تعب أو مل
سامحنى يا أجمل الجراح
يا بدر زاح عتمة الروح يوم ما طل
عارف
بكره لما نقف قدام المولى عز وجل
لما عقدة لسانك تتحل
اتكلم وخد حقك
من كل اللى ظلموك
وأولهم أبوك
واسألنا كلنا..
اسألنا قدام ربنا
عن العدل.. والرحمة.. والإنسانية
بس أنا عارف
إن قلبك الطاهر اللى علمنى
إزاى تكون الحنية
بيعرف يسامح
لما تجرى تبوسنى ف راسى
وتقوللى
بطاطا بطاطا..
يعنى بحبك يا بابا
وأشاور لك إنى فهمت
وأنا كمان يا حبيبى..
بطاطا بطاطا..
أد الدنيا دى كلها