ضيوف على مائدة الرئيس..!

كل سنة وأنت طيب.. ورمضان كريم
فكرت قليلاً قبل أن أكتب لك.. قلت لنفسى فى البداية الدنيا صيام والجو حر والناس مش ناقصة خنقة.. لكن الصمت فى هذه الحالة يفسد الصيام.. لم أسأل شيخاً ولم أستفت عالماً.. أنا أعرف بالفطرة أن حجب الأمانة ذنب كبير.. وأنا فى حوزتى أمانة لابد أن تصل لصاحبها.. فتسلمها منى.. ثم افعل ما تشاء..!
كنت أدلف إلى باب الجريدة.. فاستوقفنى عدة أشخاص.. ثلاثة رجال وسيدتان وحفنة أطفال.. اعتقدت أنهم جاءوا لنشر شكوى ضد رئيس الحى أو لمناشدة المحافظ توفير مساكن لهم.. بادرنى أحدهم بهدوء شديد «اسمع يا أستاذ.. إحنا كنا رايحين للريس بيته.. أى والله.. كنا رايحين للريس مبارك بيته.. كنا عايزين نفطر عنده.. هوه راجل فلاح وكريم.. أكيد كان هيرحب بينا.. بس واحد فينا قال لو رحنا هيطخونا بالنار من قبل ما نوصل للباب.. فقررنا نبعت له الرسالة عن طريقك.. مش مهم الفطار»..!
قالت سيدة رقيقة الحال تحمل طفلاً رضيعاً: «الحكاية مختصرة خالص.. إحنا مش عارفين نعيش.. اوعى تفتكر إننا جايين نشحت.. لأ.. إحنا جايين نطلب من الريس حقنا.. من كام سنة كنا مستورين.. موظفين فى الحكومة والمرتب بيكفى اللقمة بالجبنة والفول وشوية رز وخضار أورديحى للعيال وفرخة كل أسبوع.. ساعتها كنا فاكرين إن ده أسوأ حال يمكن الوصول له.. دلوقتى بنترحم على أيام طبق الرز ولقمة الفول وفرخة الأسبوع.. يعنى تقدر تقول إننا من الطبقة المتوسطة اللى نزلت دلوقتى تحت الأرض»!
«اسمع يا ابنى».. قالتها السيدة الأخرى التى تجاوزت الخمسين، وبدت على وجهها تضاريس مائة عام: «إحنا زى ناس كتير فى مصر دلوقتى.. التحايل على العيشة بقى صعب أوى.. إزاى نعيش والولاد ياكلوا والفرخة وصل تمنها 35 جنيه، يعنى الوجبة للعيلة كلها هتعدى ال100 جنيه.. وإحنا موظفين..
المرتب لم يعد يكفى فواتير الكهرباء والمية والغاز.. ومفيش حد بيقول لنا نعمل إيه.. نعيش إزاى.. قول للريس إحنا سمعناك فى التليفزيون من كام يوم زعلان علشان قطع الكهربا.. طيب نفسنا تقول لنا إزاى نعيش والغلا أكل بطوننا.. ومرتباتنا لا تسر عدو ولا حبيب..
قل له إن البيضة الواحدة ب75 قرش، وكيلو اللبن ب5.30 قرش، وكيلو اللحمة ب60 جنيه، ولتر الزيت ب7 جنيه، وكيلو الرز ب5 جنيه، والمكرونة ب4.5، والدقيق ب5 جنيه، والسكر ب5،
والطماطم ب4، والخيار ب4.5.. هل يعرف الرئيس هذه الأسعار.. أنا نفسى يمسك بإيده المرتب بتاعنا ويعمل لنا ميزانية الشهر، وعلى فكرة أنا عندى 3 أبناء فقط، يعنى ماشية على تنظيم الأسرة تقريباً.. تصدق يا أستاذ إنى بقيت عكس الناس.. بقيت بزعل لما ييجى شهر رمضان.. أصله كمان حرام الولاد يبقوا صايمين طول النهار وما ألاقيش أفطرهم..»!
كلام كثير قاله «ضيوف الرئيس على الإفطار».. مصريون بسطاء لا يختلفون عن أهالى «كفر المصيلحة» مسقط رأس مبارك.. كانوا جادين فى دعوة أنفسهم إلى مائدته، ولكنهم خافوا من الحرس.. لذا كان لابد أن أنقل رسالتهم.. فهذا أضعف الإيمان..!
melgalad@almasry-alyoum.com