تعالى يازكى قدرة .. روح يازكى قدرة

بداية .. كاتب هذه السطور. مش زكى بالمرة. ويحمد الله انه رزقه.. بنعمة الغباء فى هذا الزمان.وهو كمان. بيحاول فى ذات الوقت. انه ما يكونش قدرة .
والقصة.. ان زكى قدرة ده. واحد من اخوانا. قول: الاعلاميين تمشى.، قول الانتهازيين. برضك تمشى. ، قول الاكلين على كل الموايد. مفيش مانع برضك.. بتمشى وكل هؤلاء.. ماشيين بنظرية عمتى. اللى بتقولك: ان فاتك صاحب الكرسى اى كرسى. حتى ولو كان من غير لا مؤاخذة كرسى حمام. اتمرغ فى ترابه.
وبيتقولك كمان: اربط الحمار مطرح. مايعوز. ومن غير لامؤاخذة برضك. الحمار بذاتية نفسه وهما.. بيفضلوا ماسكين فى شعرة معاوية. لغاية ما يجيبوا قرارها. ولربما تنفع الشعرة دى فى يوم من الايام. اللى هى دول: يوم ليك. ويوم فوق دماغك.. ربنا ما يكسر لك دماغ وهما.. بكده جلدهم سميك. سمك السمك البياض. بيتقبلوا المدح والشتيمة مع بعض.
وبصدر رحب. وبدل ما الواحد منهم. يقولك: اهو انت يابعيد. لو شتمته. او عيبت فى ذاته الملكية. بيدور وشه. ويرفع ايديه للسما ويشتكيك لربنا. ومش بعيد برضك. يبوس راسك وساسك. ويقولك: ربنا يسامحك ال ايه البعيد مظلوم ظلم الابل .
وهما.. برضك وخد بالك من ده كويس. زمبجية اخر حاجة. ودى ما اتولدوش بيها. دى اتعلموها من اخوانا اللى اعادوا تربيتهم. من اول وجديد. فى لا ظوغلى سابقا. وفى مدينة نصر حاليا. وخللى الطابق مستور وحياة ابوك وهما.. زى البغبغانات برضك. وكلامهم كله مش من دماغهم.
واحد يقولك احنا النخبة. وواحد تانى يحلفلك. انهم اكتر ناس حريصين. على حماية الوطن.. من الاخوان الوحشين. وفلول الحزب الوطنى. الله ما يرجعه. ومن الليبراليين. واليساريين. والتقدميين. والرجعيين. والشيوعيين. والملحدين ومن كل لون.. يابتيستا كده وبس وحياتك دول كمان عارفين. ولا مؤاخذة انتة كل ات جديد. وعارفين يدخلوا له.. منين بالضبط شطارة: يمكن. خبرة: ممكن. تفتيح مخ: يجوز. عادة: اكيد .
المهم.. ان اتباع: روح يازكى قدرة.. يروح زكى قدرة. وتعالى يازكى قدرة ييجى زكى قدرة من كتر التجربة والمرمطة. اللى جابت لهم برضك الملايين. فى البنوك والشقق والفيلات.. فى التجمع والشيخ زايد دلوقتى. وفى مارينا. من زمان كل دول. صدقوا انفسهم. وانهم جنود مجندة. فى خدمة الوطن. وانهم المحافظون وحدهم. على امنى.. وامنك القومى وعشان كده.. بيعملوا بالمقولة السيد درويشية الخالدة: كل ما نطاطى نطاطى.. كل ما نعلى ونعلى.. ونعلى كمان وهما.. مش عارفين. ويمكن يكونوا عارفين وبيستعبطوا. انه لو دامت لغيرهم. ما انتقلت اليهم؟!
ولهم فى غيرهم مثل: الراجل ابو طشة الملوخية والست اللى كانت. جنب المدام. واتباع علاء وجمال. وحاشية صفوت وسرور. وخدمة عز بدل العبرة الف عبرة
خالد حمزة
خالد حمزة