الكلام ..مش كلامى .ولا تريقة لاسمح الله ده كلام .على لسان وزير الزراعة. اللى زف الخبر السعيد.. ل 90 مليون مصرى وقالك كمان .ان ده اتحقق .بعد 30 سنة بالتمام والكمال. بنعافر فيهم ولا مؤاخذة ..مع الفراخ .بلدى .ومستورد ..عشان تكتر البيض شويتين. طيب ..مبروك يا سيدى وعقبال كمان ..بقية الثروة الحيوانية زى: اللحوم .والفراخ .والاوانص والذى منه بس المهم برضك ..مش ده كله المهم بقى ..نخلص من البيض التانى .اللى مالى مصر من :منافقين .وانتهازيين. وواكلين ..من كل الموايد وكمان : الاونطجية .وبتوع التلات ورقات .ولا مؤاخذة :الفورمجية والفهلوية . واللى ...بيدهنوا الهوا دوكو وبيمشوا .فوق المية وبيخلوا كمان الفيل ..يلعب مع النملة بينج بونج ؟ . وكلامى ...ليس هزارا واحنا سيد العارفين .ان افة هذا البلد .ان الكل فاكر. انه بيفهم فى كل حاجة ومعلوم ...ان اللى يقولك .انا بافهم ..فى كل حاجة .خلقها ربنا . ده ..مابيفهمش .فى اى حاجة يعنى الشر بره وبعيد .عنى وعنك ده .ولا مؤاخذة ..قفا كبير ومصر اللى جاية ..مش عاوزة .قفوات عاوزة .ناس بتفهم بجد عاوزة .اهل علم وخبرة .مش اهل ثقة. عاوزة.. ناس مبتكرة .بتبتدى من حيث انتهى ..الاخرون وبلاش ...حكاية الستينيات .وما ادراك ما الستينيات عن :التصنيع ..من الابرة للصاروخ . قوم الابرة . تطلع : مصدية .... والصاروخ .ينفجر من قبل .ما يطلقوه . يا ولداه؟ وبلاش كمان .فهلوة عصر السادات .واللى مااغتناش فى عهدى. عمره ما حيغتنى وبلاش .عصابات مبارك والرشاوى .والعمولات .واللعب ..اللى من تحت الترابيزة وجماعة. الحاج مرسى وانا وهما .ومن بعدنا الطوفان ؟ ولا... حتى الوهم اللى .بيحطوه ..فى صباع من اياهم مصر .. عاوزة رجالة .موديل .2014 والعواجيز زى وزيك ..يمتنعون مصر ..عاوزة شغل بجد .من غير بيض .ولا يحزنون .ومش ناس تصحى من النوم .عشان تنام تانى ! ولا خبرا ...قاعدين .معسكرين واكلين .شاربين .قابضين . وال ايه. بيحللوا . فى.. قنوات فضائية مصر.. عاوزة خلية نحل كل واحد فيها. بيشتغل شغله. وما لوش دعوة .باللى جنبه. من اجل : الله والوطن . مصر ..عاوزة رجالة .وستات الواحد فيهم .ولا الواحدة فيهن يوزن بلد .بزيه ... مصر.. مش عاوزة .خبرا استراتيجيين. ولا بيض ممشوش مصر ..عاوزة تقف على رجليها .بجهود ابنائها وبلاش... الحوجة. للى يسوى .واللى ما يسواش وتحميلنا بالجمايل .اللى مالهاش لزمة مصر.. مش عاوزة رقص. ولا اغانى ولا ..عطلات فى الفاضية .والمليانة عاوزين ..نبقى زى اليابان .اللى خرجت .هى والمانيا. بعد الحرب العالمية التانية مهزومة .ومكسورة بس شوف دلوقتى ..بقت ايه من غير :شعارات. ولا تسبيل ولا... لا مؤاخذة برضك تهويل ؟ : احنا مصريين#