لست متشائما. ولا انا واحد. من الطابور الخامس. اللى مالى مصر دلوقتى. وعلى حسب الريح ما يودى الريح. واهو كله منافع. وحوافز. ومستنقعات؟! انا يا سيدى.. بنى ادم. واقعى. انظر مثل ملايين المصريين حولى ..فارى الحال .هو الحال. بل اسوا. وارى الناس.. ماشية فى الشارع. بتكلم نفسها. وحتطلع من هدومها. انا يا سيدى.. واقعى سودوى. بس مش حاخدع نفسى. قبل ما اخدعك. واقولك: ال ايه كله تمام. وحوش حوش.. الفلوس. اللى حتقع منك! انا زى زيك. عدمان. كفران. وطالع دينى. واللى ببات فيه.. با صبح عليه. وباقضى نص عشايا.. نوم. اى والله. وانا برده.. زى زيك. زهقت من النخبة. وسنين ابو. وام. وكل عيلة النخبة وزهقت من: بتوع التلافزيون. والمنا ظر اللى بتعقد. فى مسلسلات التلافزيون. وكانى وكانك ناس فضائيين. او جايين. من كوكب تانى.. ونزلنا مصر بالخطا؟! انا وانت.. عاوزين نعيش زى باقى خلق الله. ومش فارق معانا. زيد ولا عبيد. المهم لا مؤاخذة عندنا.. المم يعنى: الاكل ومصاريف البيت. والعيال. وام العيال. مش مهم عندنا. واحد مقعر. وصاحب نظريات. يطلع علينا. ويقولنا: ان شاء الله. بعد عشرة.. عشرين سنة. حنبقى نمر. من نمور اسيا. ولا اسد اوربى. ولا حتى مرات .. الاسد! ولا مؤاخذة. الناس دى يا صاحبى. بتشتغلنا. وعملانا: يويو فى لسانها. مع انى وانت.. ما فوضناهمش. فى كيت. ولا كيت. ولا حتى نطاط الحيط؟ حتقولى كفاية حرام عليك. قلبت علينا المواجع. سيبنا فى همنا. واحلامنا. يا عم حتى.. ولوكانت مزيفة حاقولك: يا بخت مين بكاك. ولا بكى الناس عليك. وزى ما قالك المرحوم مصطفى كامل : لا يأس مع الحياة. بس والله فى زمنا ده: لا حياة لمن تنادى؟ صدقنى.. مش حاخدعك. واعيشك فى احلام. واوهام.. فشر النهضة. والفنكوش. وصباع .. الكفتة. صدقنى.. همى.هو همك. ولا تعايرنى. ولا اعايرك. ده الهم طايلنى. وطايلك. عاوز كلام كمان.. والله خلص الكلام. بس وحياة ابوك. باوصيك زى . ما باوصى نفسى : بلاش تسمع الزن على الودان. ده الزن على الودان اقوى من السحر! ويا ريت تشغل مخك شوية. وتعرف اللى بيتقال. واللى وراه. وادامه كمان وبلاش حكاية: كبر دماغك.. البلد بلدهم يا عم.. يا عم قول: يا باسط و .. ايش تاخد القرعة. من ام الشعور ؟
