ديالوج

البيضة: هو مين الأول أنا ولا أنتى يا فرخه هانم!
الفرخة: اسأل الست الوالدة؟
البيضة: سألتها وقالت لى اسأل المجلس العسكرى هو الدستور ولا الرئيس؟!
الفرخة: هى الوالدة لها فى السياسة للدرجة دي؟
البيضة: طبعا لها فى السياسة ولها فى العجة والاومليت.
الفرخة: ما شاء الله وأنت رأيك يا «مشروع كتكوت»؟
البيضة: ولما بكره الكتكوت يخرج من البيضة ويعمل شباب ائتلاف الكتاكيت ويكبر ويبقى ديك.. ويطلع «ديكك» يا فرخة المزارع .. ياللى انفلونزا الطيور هدت حيلك.
الفرخة: وانتى يعنى اللى «بيضة بلدي» ما أنتى كمان مزارع ومفيش داعى للاسلوب ده!!
البيضة: عموما اللى عايز أقوله من غير بيضة مفيش فرخة!
الفرخة: وأنا باقولك من غير فرخة مفيش بيضة.
البيضة: على كده بقى من غير «دستور» مفيش «ريس»؟!
الفرخة: لمؤاخذه بقى عشان تتكلمى صح شيلى الألوان اللى أنتى ملخبطة بيها وشك!!
البيضة: أنا فى عيد شم النسيم وده يوم بيجى من السنة للسنة عشان الناس تدلعني.. هتغير ولا إيه؟
الفرخة: أنا اغير من واحدة زيك.. يا بت أنا أعمل منك كرتونة وأقول هل من مزيد؟
البيضة: بلاش قنزحة وافتكرى أنك فى يوم كنتى بيضة؟!.. وخلى بالك فى أى لحظة تلاقى السكينة فوق رقبتك وحضرتك بعد شوية بقيتى «شاورمه»
الفرخة: طيب يا فالحة خلينى اسألك هو المجلس ولا الشعب؟!
البيضة: ودى عايزة إجابة «الشعب» طبعا
الفرخة: ماشي.. طيب المجلس العسكرى الأول ولا الجيش؟
البيضة: لا العسكرى نفسه يا حدق.. اللى هو خير أجناد الأرض.
الفرخة: فى دى عندك حق
البيضة: خلينى أنا اسألك مرة من نفسى!
الفرخة: وماله يا حبيبتى
البيضة: هو مين الرئيس اللى جاى لمصر؟
الفرخة: وليه ما تقوليش اللى مصر رايح له!
البيضة: لا يا حلوة.. مصر قاعدة فى مكانها واللى عايزها يجيلها هى ما ترحش لحد ومع ذلك نكرر السؤال واقول: مين هو الرئيس المنتظر؟
الفرخة: مفيش اختيارات!
البيضة: عشان خاطرك فيه 3 اختيارات!
الفرخة: ايه هي؟
البيضة: الأول رئيس مودرن والتانى «مولانا» والثالث «فلولي»؟
الفرخة: يبقى هاختار «المودرن» بس بيقى عنده «دين».. وعنده «دم»!!
البيضة: كده أنا عرفت مين الأول البيضة ولا الفرخة؟
الفرخة: مين يا تري!
البيضة: «الفرارجي»!!