من حمار حصاوى .. من بتوع 25

ايوه..انا كنت عيل سيس. ومش متربى. لما طاوعت الواد: اللى مش متربى برده. احمد زميل دراستى. والبت اللى خرجت.. عن طوع اهلها اسمها ايه دى. وخرجت معاهم. من قبل اليوم المشئوم 25 من حوالى كده قول 4 سنين.
وكنت.. عيل اهبل واهطل كمان. لما قعدت بالايام والليالى. اشير على الفيس. وادعو احبابى وجيرانى.. والمجتمع والناس. انهم ينزلوا وما بيقوش: سلبيين. ويبطلوا بقى مزاج ضرب القفا. اللى ادمنوه ل50 سنة قول 60 سنة.
وكنت برده. عيل حمار. وما بافهمش. لما اتصورت انا والعيال البهايم: من عينتى. اننا ممكن. وعن طريق الفيس. والتظاهر اننا نزيح الدولة العميئة. اى والله. طيش عيال بقى. وكمان كنت ساذج وحمار ومعايا قول: 10 11 مليون حمار حصاوى.. من عينتى. لما اتخدعنا وافتكرنا: اننا ممكن ندى دولة اللصوص والحرامية. والارزوجية والواكلين من كل الموايد. والفاسدين فى الاجهزة. وفى الشرطة: ال ايه كتف قانونى ونخلى الشعب ال ايه يحكم ها ااااو ما يحكمش.
وكنت برده.. ورغم انى ما كنتش فى الصفوف الاولى. ولا حتى فى الخلفية من الثورة. ولا كنت من اللى ادوا.. صدورهم للرصاص. وما خافوش بطش بيادة. ولا قناص.
كنت مؤمن ان الثورة.. رغم النكسة. والوكسة مستمرة ورغم غباوة.. اللى ركبوها من هنا وهناك. مسيرها حتحكم؟ وخاب ظنى زى ما خاب ظن: باقى الحمير الحصاوى.. من عينتى انت البعيد ما بتفهمش رنت الجملة فى ودانى. لما شفت براءة الريس مبارك وولاده وعصابته وشفت الشماتة.. فى اللى ماتوا. وقدموا دمهم بلا تمن. اللهم عند الله وحده وهو وحده احكم الحاكمين
عاوزين كمان ماعنديش.. الا الاعتذار لمبارك. واللى معاه احنا اسفين ياريس. احنا ولا د ستين.. قول سبعين كلب؟ ماكناش عارفين ان العين عمرها: ما عليت على اى حاجب. حتى ولو كان حاجب محكمة وماكناش.. نعرف انه رغم نهيقنا المستمر.. ان القافلة. ولا مؤاخذة. بتعوى. والكلاب: حتسير.. حتسير؟ وانه لا ياس مع الحياة. ولا حياة لمن تنادى.
##
##