يا تشتغل رقاصة يا تعمل زى صاصا

مفيش حد اقابله : موظف. عامل. حرفى. اعمال حرة. كمسارى. سواق كناس. فلاح. اوصحفى. او حتى.. راجل ارزقجى. على باب الله. لحد ماتفرج
الا.. ويشكو مر الشكوى. من العيشة. واللى عايشينها. وغلاء اسعار الميه والكهربا. والغاز. والبنزين. والسولار .
والبهدلة فى.. طوابير العيش .
والشعلكة. فى ميكروباص. والانتظار لساعات. للاتوبيس ابو جنيه. بعد ما ابو 2 جنيه.. بقى زى الهم. على القلب
وكمان.. شكاوى لاتنتهى. من طلبات العيال. وام العيال.. اللى ما بتنتهيش وبتزيد يوم بعد يوم .
والغريب... ان كل اللى باقابلهم. مش مقتنعين. باللى بتعمله الحكومة. اى حكومة. من الببلاوى لمحلب.. ويا قلبى لا تحزن
واحترت. وماعرفتش اجاوب. الا بسخرية......
ما هو شر البلية. مايضحك. ولا تعايرنى. ولا اعايرك يا امور
ده الهم طايلنى. وطايلك ..
ولا.. ماتكنش فاكر. ان العبد لله ولا مؤاخذة.. جاى من بلد. ا ولا كوكب تانى يعنى
خلاصة القول.. جاوبت اللى سالنى. بحاجتين. لا تالت ليهم
الاول.. ان يتوكل على الله. ويشتغل رقاصة. والشغل مش عيب
وليكم فى صافى بنت ناز ..
الاسوة .
يا مؤمن.. دى مع كل هزة. وغمزة. ولمزة
كده دولارات. وكده يوروهات .
وكمان الريالات. والدراهم. والدينارات ..
برضك ما يضرش ..
والست.. فوق ده وده .عندها حضور. وكاريزما
فشر اى زعيم سياسي ..
ربنا يجعل كلامنا. خفيف عليهم .
وهى.. اى الست صافى فى النهاية. بتدفع ضرايبها. بالملى للدولة
يعنى مش على راسها. بطحة زى رجال الاعمال اياهم
اللى ناهبين ..
طالعين نازلين.
ده حل من حلين .........
ولو.. لامؤاخذة ماعندكش. موهبة الهز. من اى نوع. ومنه الرقص الشرقى
عليك بطريقة صاصا .
واللى مالية البلد دلوقتى. وبتكسب تمام ..
زى المنشار يا اخى .
طالع واكل .
نازل واكل .
وصاصا... لمن لا يعرف. هو الاسم الحركى. الذى يعرفه كل الناس. الا صاحبه
راجل منافق ..
انتهازى .
متلون .
واكل من كل الموايد .
اخر حاجة ..
وزيد على ذلك.. بجح كمان .
اكل على موائد القذافى. الله يبشبش الطوبة. اللى تحت راسه
واخذ من صدام. الله يرحمه.. هو كمان
وفوق ذلك... يقال عنه انه.. زى الموبايل الصينى : صوته عالى
ورخيص .
وبشريحتين .
واحدة للريس الحالى
وواحدة للى جاى .
عاوزين كمان .......
اقولكم
ده زمن الفهلوة
والالفطة .
وتلبيس طاقية ده.. لده ..
و و و و و
فاذا كنتم .لا تجيدون. ولا تتقبلون التعلم
فعليه العوض.. فيا . وفيكم .
..وزى مالمثل بيقول
الفقر له... ناسه ؟