رباب أنور تكتب : و الشاطرة تغزل بإيه ؟؟

طبعاً كلنا عارفين الإجابة ..

إمبارح زي أي ست مصرية أصيلة كنت واقفة في البلكونة ب انشر الغسيل .. و كانت عربية النضافة معدية بتنضف الشارع .. جه عامل النضافة علشان ينضف تحت بيتنا لقى زبالة كتيييير و ده مش لأني ب ارمي زبالة تحت البيت بالعكس إحنا متعودين عندنا في البيت إن أي حد نازل ياخد معه أكياس الزبالة و لازم يرميها في الصندوق الكبير اللي على أول الشارع ..
الزبالة الموجودة تحت البيت دي كانت بسبب البنات و الأولاد الحلوين طلبة الثانوي اللي بياخدوا درس في البيت اللي جنبنا .. عاملين سلم البيت عندنا إستراحة قبل الدرس و ماله أهلا و سهلاً على راسنا المشكلة مش في كدة المشكلة في كمية الزبالة الي بيرموها و هما وافقين ينتظروا الدرس ..
أكياس شيبسي (ما يضرش ) أغلفة بسكويت ( مش مشكلة ) مناديل و رق ( و ماله )

و كلمناهم أكتر من مرة و مفيش فايدة .. أنا مش عارفة البنت أو الولد من دول يقدر يرمي كيس فاضي على الأرض في قوضته و لو عملها مرة أكيد والدته أو والده نبهوه إن كده ما ينفعش .. و لا هو شاف حد عنده في البيت بيعمل كدة فبقى الموضوع بالنسبة ليه مش أزمة ؟؟ ..
طيب ما قرأش مرة في كتاب في المدرسة و لا على يافطة في الشارع حافظوا على نضافة شارعكم و لا قريتكم و لا مدينتكم ؟؟..

إنتي يا كتكوته و أنت ياكتكوت مش ها تتعبوا خالص لو حطيتوا الكيس الفاضي في جيبك أو شنطِتِك لحد ما تلاقي صندوق قمامة و انتي أو إنت ماشيين في الشارع ..
و لا يا سيدي و لا يا ستي سيبوه معاكم لحد ما تروحوا البيت و ارموها في السلة ..

كل ده كوم و رد فعل عامل النضافة كوم تاني الرجل وقف شوية كدة و اتأمل كمية الزبالة و كأنه بيقول " هو انا مكتوب عليا البيت ده كل يوم " و أكيد كان بيلعن في سكانه لأنه ما يعرفش الحقيقة ..
الراجل صعب عليا هو ده مش بني آدم زينا يا جماعة و لا إييييييييه ؟؟؟؟..

المشكلة الأكبر بقى هيا أدوات النضافة اللي بينضف بيها كانت أدوات بدائية جداً .. (مأطف) من الجلد فيه ييجي عشرة خمستاشر قطع يعني الي بيحطه من هنا بينزل من الناحية التانية زي عربية الزبالة اللي ماشية معاهم بالضبط .. مليانة زبالة لحد آخرها و اللي بيحطوه من فوق بيقع من تحت و كأنك ياأبو زيد ما غزيت و كمان حتة ( أبلكاش ) يلم بيها و وواحد تاني معاه مقشة بتوسخ أكتر ما بتضف و مطلوب منهم إنهم يالأدوات البدائية دي يخلوا الشارع زي الفل ..

سرحت بخيالي و افتكرت إن حال عامل النضافة في بلدنا زي حال موظفين كتيييير مطلوب منهم إنهم ينجزوا أعمالهم على أكمل وجه بأي حاجة موجودة و السلام ..

مثلاً عامل المزلقان اللي قاعد في مكان غير آدمي لفترة ممكن تتجاوز ال 6 ساعات بدون حمام و عنده تليفون بيشتغل (بالمنفلة) زي تليفون العمدة يوم ما يحب يشغله يطلع ميه أو يطلع منه ( شمهورش ).. و في وسط كل ده مطلوب منه إنه يأدي عمله بدون أي أخطاء و لما يحصل الخطأ القاتل هو اللي يلبس لوحده ..

و لا الدكتور اللي في مستشفى حكومي لو جاله عيل راسه مفتوحة و ما عندوش و شاش و لا قطن و لا خيط .. المفروض إنه يتصرف و يبعت يجيب قطن و خيط و إبرة من عند ( المنجد ) اللي جنب المستشفى و يخلص نفسه المهم إنه يقوم بواجبه الإنساني تحت أي ظرف .. و لو الحالة متأخرة قوي هايعمل إيه ؟؟ هايسيب المريض يموت و الموت علينا حق .. و هو ده الحق الوحيد اللي بناخده في البلد دي ..

و لو كل دول و غيرهم ما تصرفوش يبقوا غلطانين لأن البلد دي أكلتنا من خيرها و شربتنا من نيلها و علمتنا نغنيلها و أكتر حاجة علمتهالنا في مدارسها إن الشاطرة تغزل بإيييييييييييييييه ؟؟ ب رجل حمار ..
و الله العظيم الحمار مظلوم في عيشيتنا..
تتصبحوا بالخير

إصطباحات رباب