فاطيما مهدي تكتب عن «شيوخ تبرير التحرش» : نحو وطن أكثر إباحية

* آخرون
فاطيما مهدي
المواطن:ويا تري يا شيخ ايه سبب التحرش اللي عمالين يتكلموا عليه في كل البرامج يا شيخ
الشيخ مُستنكرا:برامج؟؟؟ انت بتتفرج علي برامج يا ابو قتاده؟
المواطن كاذباخوفا من ردة فعل الشيخ:لا والله يا شيخ ادينا بنسمع من الناس
الشيخ يتنهد بارتياح :ايوه كده بارك الله فيك يا ابا قتاده اياك والفتنه
واعلامنا كله اعلام فتنه وفسق وفجور وكفايه علينا المذيعات الكاسيات العاريات والمواضيع الخايبه اللي بيتكلمو فيها اللي لاتهم الاسلام في شئ
المواطن يسأل ببلاهه: هو انت بتتفرج عالتليفزيون يا شيخنا
الشيخ يتلعثم ويرد كاذبا:استحِ يا ابا قتاده انت ماتعلمتش ادب الحوار
المواطن مرتبكا: العفو منك يا شيخ انا اسف بس انا قلت ايه ده انا بسأل
الشيخ يرد بعصبيه:ماهي البلاوي كلها بتجيلنا من السؤال والجواب وده ليه وده عشان ايه
ثم يرنو اليه بلهجه اقل حده (يابني الاسئله دي مدخل الشيطان)
ماهو الشيطان اعوذ بالله منه ومن شره لما عصي ربنا ابتدي بالسؤال
يحملق المواطن في وجه الشيخ بانتباه ينظر الشيخ في عينيه مباشرة ويقول
دايما استعيذ بالله من الشيطان يا حبيبي انت لو فتحت له الباب ممكن يوصلك اعوذ بالله انك تكفر.
يشهق المواطن الاهبل مفزوعا اعوذ بالله اعوذ بالله
ينَجَعِص الشيخ في قعدته ممسكا سبحته في يده مقلبا اياها بين يديه ولا اعلم ماذا يفعل فهو يتكلم اساسا الا انه ظل يحركها بانتظام بين اصابعه وقال في انتصار بعد ان تأكد له انه سيطر علي عقل المواطن الاهبل خلاص وقال له: كنت بتسألني عالتحرش انت يابوقتاده
فاطرق المواطن ارضا وقال خلاص ياشيخ مالوش داعي السؤال ينظر اليه الشيخ بتفَضٌل قائلا:لاء يا ابوقتاده انا هجاوبك عشان ماحدش يلعب في دماغك يابني بالكلام المسموم بتاع الشباب العلماني الكافر من نوعيه البنت الضحيه ومجني عليه وراح بُسهب في قدح معشر النساء اساس الرِجس فالوجود ولم يخلو الامر من بِضع الايماءات والحركات المبتذله.
استرجع الشيخ الامثله في دماغه مفكرا اقوله مثل المصاصه اللي عليها ذباب ولا مثل „,ولا ثم قال: بص يابو قتاده انت يابني لو مااشي في حالك وجنبك كلب وماعملتلوش حاجه وماستفزيتوش باي شكل ياتري هايقربلك ؟؟؟
رد ابو قتاده بسرعه:لا يا شيخ (وتناسي ابو قتاده انه اكم من كلاب مسعوره تهاجم بني البشر للا شييء..وتناسي الاهانه الاكبر انه اعترف هو وشيخه ضمنيا ان المتحرش ليس الا كلب مسعور)
فاجابه الشيخ الفَطِن :قائلا آدي يابني كل القصه الشاب من دول يبقا ماشي في حاله ويلاقي واحده من شياطين الانس ماشيه و„,باين و„„باين وده محزق وده ملزق والشاب يا ابني غلباااااان (مؤثرا علي مشاعر المواطن الاهبل)
وبالفعل يتأثرالمواطن ممصمصا شفتيه في حسره قائلا :اه والله ياشيخ
الشيخ : والشياطين دول من ناحيه والبلاوي اللي عالي اسمه ايه النت ده والعياذ بالله والبلاوي السودا يابني اللي عليه دي اصل الشرور ...
ولا في فلوس ولاشغل ولا جواز...الشاب من دول يعمل ايه هه
غصب عنه ماهي لو محترمه نفسها مكانش حد قربلها انما دول قالعين يا بني مش لابسين.
يطرق المواطن برأسه مؤيدا ل أبو ماجد وقائلا في خنوع:عندك حق والله يا شيخنا.
ويقطع حديثهم صوت موبايل الشيخ اثناء جلوسهم في زاويه المسجد: فيمسك بجهاز تليفونه المحمول حديث الطراز ويرد قائلا: ايوه يا سعادة الباشا ...نعم نعم ولا تعول هم سيادتك..كله تمام ..الولاد جاهزين وكله مبيت علي قرايبه اللي فالمحافظات القريبه كمان...نعم؟؟؟؟ لا حضرتك ماتقلقش...الساعه 9الصبح بالتمام والكمال هتلاقيهم ماليين الميدان ...اومااااال ياباشا ..كله جاهز اليفط والبنرات وكله زي ما أمرت جنابك
ولا تقلق ياباشا....ييختم مكالمته ضاحكا ويقول لل(باشا) ده احنا عنينا ...ده يروحو لحد باب فلة جنابك ..ده ام ماجد بتبوس ايدك والله وبتدعيلك الواد من يوم ماشتغل فالبترول وهو بقا صلاة النبي ربنا يخليك لينا يا باشا...اتفضل ..اتفضل سعادتك مع الف سلامه
ينهي الشيخ مكالمته ويستدير لإكمال حواره مع ابو قتاده الي كان أيل له شويه علي مالشيخ يخلص مكالمته...فيخبط علي كتفه قائلا يالله يابو قتاده قوم جهز اخواتك واجمعهم عشان نستعد للمليونيه يابني بارك الله فيكم
ربنا ينصر بيكم الاسلام يابني
ينهض ابو قتاده مهرولا كي يجمع حصته من الذاهبين واستكمال المشهد بميدان التحرير تمام التاسعه
تمت
ملحوظه: الشيخ في القصه هو فلان الفلاني حاصل دبلوم صنايع سافر العراق ثم نجح في ان يتسلق لبعش المسئولين وسافر الي السعوديه بعقد عمل احسن دام لمده 10سنوات رجع من بعدهم الي ارض الوطن بجلباب قصير وغتره خليجيه علي رأسه وكم من الافكار والعلاقات بشخصيات كبيره
لا يعلمهم الا الله ومن يومها قد اصبح فلان الفلاني الصنايعي بقدره قادر الي الشيخ ابو ماجد (مع الاحترام لكل صنايعي شريف)
اما المواطن :هو مثال لمواطن فقير مُغيب
الملحوظه الأهم :
دي بعض ايات من القراءن الكريم عن ان الله خلقنا أحرارا وليس لأحد من ماكان ان يقهَر احد
﴿ لَسْتَ عَلَيْهِمْ بِمُسَيْطِرٍ ﴾ [الغاشية: 22].
﴿ وَمَا أَنْتَ عَلَيْهِمْ بِجَبَّارٍ ﴾ [ق: 45].
﴿ وَمَا أَنْتَ عَلَيْهِمْ بِوَكِيلٍ ﴾ [الزمر: 41].
﴿ فَمَنْ شَاءَ فَلْيُؤْمِنْ وَمَنْ شَاءَ فَلْيَكْفُرْ ﴾ [الكهف: 29].
﴿ أَفَأَنْتَ تُكْرِهُ النَّاسَ حَتَّى يَكُونُوا مُؤْمِنِينَ ﴾ [يونس: 99].
فأي دين يتبع ابوماجد وامثاله؟؟
-(اعتذرعن الاطاله)-
* رأي
مصدر الخبر : البداية