د. علاء الأسواني يكتب: حوار بين شاب ثوري ومواطن طيب

تم الحوار بالصدفة ، كان الشاب الثوري جالسا على مقهى في وسط البلد وقد وضع على المائدة أمامه لافتات تحمل شعارات سياسية وعلى المائدة المجاورة جلس رجل خمسيني أصلع راح يشرب الشاى بالنعناع ويدخن الشيشة في تلذذ واضح ..
تطلع الرجل الى الشاب ثم سأله بأدب :
لا مؤاخذة ..ممكن أعرف ايه اللافتات دي ..؟!
دي لافتات حنرفعها يوم الجمعة 25 يناير في المظاهرات بمناسبة الذكري الثانية للثورة
هو أنت من شباب الثورة ..؟!
أنا واحد ضمن عشرين مليون مصري قاموا بالثورة
بصراحة أنا ماشتركتش في الثورة . تفرجت عليها في التليفزيون . أنا واحد من اللى بيقولوا عليهم حزب الكنبة .كنت ضد مبارك طبعا وفرحت لما تنحى لكن عمري ما مشيت في مظاهرة .. بأقولك ايه يابني مش كفاية علينا مظاهرات ؟! . احنا عاوزين استقرار .عاوزين عجلة الانتاج تدور
الاستقرار لا يمكن يحصل الا لما الناس يحسوا بالعدل ثم ان التظاهر السلمي من حقوق الانسان .كل الدول الديمقراطية فيها مظاهرات يوميا واقتصادها لم يتأثر . نظام الاخوان زى نظام مبارك بيرمي فشله على شماعة المظاهرات
طيب ممكن تقول لي الهدف من مظاهرات يوم الجمعة ..؟!
سنتظاهر لأن شيئا لم يتغير بعد عامين من الثورة بل على العكس تغيرت أشياء كثيرة الى الأسوأ حكم الاخوان زى نظام مبارك . نفس الاستبداد والظلم والقمع والغلاء والفقر والبطالة . . الاعتداء على القضاء ومحاولة استغلاله . ارهاب الكتاب والصحفيين ومحاكمتهم بتهم زائفة مثل اهانة الرئيس وازدراء الأديان . المحاكمات العسكرية للمدنيين .الاعتقال والتعذيب في الأقسام . هات لي شيء واحد تغير عن أيام مبارك .
لكن الرئيس مرسي بقى له ستة اشهر فقط في الحكم وهو بيقول اصبروا واعطوني فرصة .
اسمع يا حاج . الانسان لما يوعد مش المفروض يوفي بوعده ..؟!
طبعا
لو أنا وعدتك عشر مرات وكل مرة أخلف وعدى . هل لو وعدتك بعد كده تصدقنى ..؟!.
لا طبعا لو صدقتك أبقى عبيط .
أهو أنت قلت بنفسك . الشعب المصري مش عبيط . على فكرة أنا في الانتخابات الرئاسية برغم اني ضد الاخوان عصرت على نفسي ليمونة وانتخبت مرسي ضد شفيق . قلت لنفسي الاخوان مهما كانت عيوبهم حيبقوا أرحم من نظام مبارك لكن للأسف طلعوا الاتنين حاجة واحدة . . كنت أتمنى ان الرئيس مرسي يكون كما وعد رئيسا لكل المصريين لكنه أثبت أنه رئيس للاخوان فقط وبقية المصريين لا يهمونه في قليل أو كثير
الاخوان بيقولوا لازم ننتظر أربع سنوات قبل ما نحكم على الرئيس مرسي
بص يا حاج .افترض اني اتفقت معك اني أوصلك بسيارتي الى الساحل الشمالي ثم أخذتك في الاتجاه العكسي الى طريق الصعيد .هل ضروري انك تنتظر لغاية لما نوصل الصعيد عشان تعترض ...؟!
فكر الرجل قليلا ثم قال :
لا طبعا . لازم أطلب منك ترجعني فورا لطريق الساحل اللى اتفقنا عليه يا اما تنزلنى من السيارة .
هى دى حالة مصر بالضبط .. مرسي بدل ما ينفذ وعوده بينفذ تعليمات مكتب الارشاد وهو غير مهتم بأى حاجة الا مصلحة الاخوان . مرسي يعمل على تمكين جماعته من الدولة بحيث يستحيل بعد ذلك خلعهم من الحكم . لا يمكن ننتظر أربع سنوات حتى يتم تنفيذ مخطط مكتب الارشاد.. اما أن يعدل مرسي أو يرحل . ..
ما تنساش انه رئيس منتخب.
صحيح الرئيس مرسي منتخب لكنه أخل بشروط انتخابه . أنت تنتخب الرئيس وفقا للقانون فاذا جاء هذا الرئيس ودهس القانون بقدمه وحصن قراراته ضد القانون وسمح بحصار المحكمة الدستورية العليا حتى لا تصدر أحكاما ضد اللجنة التأسيسية الباطلة التى شكلها .. اذا فرض الرئيس المنتخب علينا نائبا عاما بالمخالفة للقانون واذا طلب هذا النائب العام من المحامي العام حبس مواطنين أبرياء حتى لا يحرج الرئيس يبقى نثق ازاى في النائب العام أو في الرئيس نفسه .. اذا فرض الرئيس على الشعب دستورا لا يمثل الا جماعة الاخوان عن طريق استفتاء مزور .. اذا فعل الرئيس المنتخب كل ذلك فلابد أن يفقد شرعيته قطعا لأن الشرعية مستمدة من احترام القانون والحاكم عندما يهدر القانون يبقى غير شرعي ..
ممكن أسألك سؤال و ما تزعلش منى ..؟!
تفضل
هو أنت علماني شوية ..؟!
قصدك ايه بالضبط بكلمة علماني ..؟!
بصراحة امام الجامع اللى بأصلى فيه بيقول ان كل اللى بيعارضوا الرئيس مرسي من العلمانيين الرافضين لشرع الله وأعداء الاسلام .. بس أنت شكلك ابن حلال
ابتسم الشاب وقال :
اذا كان المسلمون الأوائل انتقدوا تصرفات عمر بن الخطاب وأبي بكر رضى الله عنهما يبقى احنا مش من حقنا نعارض مرسي .؟!. كلمة علماني معناها فصل الدين عن السياسة يعنى ممكن تبقى علماني ومسلم ملتزم . حضرتك طبعا تعرف سعد زغلول ومصطفى النحاس وجمال عبد الناصر ..؟
دول زعماء مصر العظام
كلهم كانوا علمانيين . مش معنى كده انهم ضد الدين بالعكس كانوا بيعتزوا باسلامهم لكن كان رأيهم اننا لايمكن نبنى دولة ديمقراطية حديثة على أساس ديني .
.سكت الرجل وبدا عليه التفكير بينما قال الشاب :
احنا الحمدلله مسلمين و نريد تطبيق شرع ربنا لكن المصريين ما كانوش كفار قبل ما يحكمهم الاخوان . معظم القوانين الموجودة في مصر مطابقة للشريعة الاسلامية وهذا رأي وزير العدل أحمد مكي وهو ينتمى فكريا الى الاخوان المسلمين بالاضافة الى أن الاخوان هدفهم الأساسي السلطة وليس الشريعة ..
ازاى ..؟
فيه مشروع اسمه الصكوك الاسلامية سمعت عنه ..؟
بصراحة ما ركزتش فيه.
الاخوان عاوزين يؤجروا مصر مفروشة . أى واحد اجنبي يدفع يبقى من حقه يمتلك أى شيء في بلدنا حتى لو كان السد العالى أو قناة السويس
يا نهار أسود
هكذا هتف الرجل بانزعاج وشرح له الشاب مشروع الصكوك الاسلامية ثم قال :
مشروع الصكوك الاسلامية رفضه مجمع البحوث الاسلامية وأكد انه مخالف للشريعة ومع ذلك الاخوان مصممون على تنفيذ المشروع بالرغم من مخالفته للشريعة .. يبقى الاخوان يهمهم تطبيق شرع الله ..؟
أعوذ بالله .بصراحة أشكرك لأنك شرحت لي الوضع . فعلا المفروض تحاولوا بكل طريقة توقفوا المشروع ده لأنه خطير .. ازاى نبيع بلدنا ياناس ..؟!
الصكوك الاسلامية واحدة من كوارث كتيرة عملها حكم الاخوان في ستة أشهر . .. الاخوان اعتدوا على حقوق المصريين وفرضوا عليهم دستور المرشد بالعافية عن طريق استفتاء مزور . بعد عامين من الثورة لسه المصريين بيموتوا في القطارات والعمارات بتقع عليهم لأنها بدون ترخيص لسه بيتحاكموا عسكريا وبيتعذبوا في الأقسام .. لسه المصري في الخارج مالوش قيمة ولا كرامة . . نجلاوفا وأحمد الجيزاوي وغيرهم كثير اتحبسوا واتجلدوا ظلم في السعودية . مرسي قلب الدنيا عشان 11 اخواني اعتقلوا في الامارات بينما المعتقلون المصريون في كل دول الخليج ولا بيسأل عنهم مرسي ولا بيعمل لهم حاجة .. ..
لماذا لا تغيرون حكم الاخوان عن طريق الانتخابات ..؟! .
أى انتخابات ديمقراطية في العالم لها شروط من أهمها الشفافية وتكافؤ الفرص .. أين هي الشفافية والاخوان والسلفيون ينفقون ملايين أثناء الانتخابات من أموال مجهولة المصدر وهم يرفضون خضوع ميزانيتهم لاشراف الدولة .اذا لم نعرف من أين ينفق الاخوان والسلفيون فلا شرعية لأى انتخابات ثم أى انتخابات هذه التى تجرى وفقا لقانون يضعه مجلس الشوري الباطل بناء على تعليمات مكتب الارشاد ..
يعنى أنت رأيك نقاطع الانتخابات ..؟!
لقد أعلنا عن شروط لنزاهة الانتخابات لو لم تتحقق سنقاطعها .
كلامك مقنع لكن تفتكر ان المظاهرات ممكن تجيب نتيجة ..؟!
المظاهرات دي هي اللي خلعت مبارك وحاكمته ووضعته في السجن
يعنى أنتم عاوزين تخلعوا مرسي ..؟!.
احنا عاوزين حقنا .. حقنا نعمل دستور يعبر عن المصريين كلهم . حقنا اننا نتعامل بكرامة واحترام . حقنا ان يكون فيه عدل وحرية . حنستمر في الثورة لغاية لما نحقق أهدافها . لازم مرسي يحترم الشعب المصري ويلغى الدستور المشوه ويعطي المصريين حقهم في كتابة دستورهم . اما اذا رفض مرسي ذلك فلابد أن يرحل ..
سكت الرجل المسن وتأمل الشاب لحظة ثم قال بود :
انت عندك كم سنة ..؟!
عندى 28 سنة وخريج هندسة القاهرة قسم مدني دفعة 2007 ..
طيب يابنى أنت شاغل نفسك في المظاهرات والاحتجاجات وبتعرض نفسك للخطر .ممكن تنضرب أو تموت لاقدر الله أو على الأقل يعتقلوك ويعذبوك .. ما فكرتش انك تسيبك من وجع القلب ده وتشوف لك عقد عمل في الخليج ..تروح هناك تكسب وتكون نفسك وترجع بعد كم سنة تعيش في ملك ..
ابتسم الشاب بحزن ثم نظر بعيدا كأنما يبحث عن كلمات مناسبة وقال :
بص ياحاج أنا اشتركت في الثورة من أول يوم وشفت الشباب بيموت جنبي . أنا شلت على كتفى ده شهداء وشفت ناس كثير فقدوا عيونهم من الخرطوش .. كان القناصة بيضربونا بالرصاص . دائرة الليزر كانت بتلف علينا وكل مرة تقف تنطلق رصاصة في دماغ واحد منا ويقع وسطنا . أنا كان ممكن أموت في أى لحظة لكن ربنا أراد للشهداء أنهم يموتوا وسابنى عايش لأجل أقوم بالمهمة اللى استشهدوا من أجلها .الشهداء ماتوا وهم بيحلموا بالعدل والحرية والكرامة وأنا حأستمر في الثورة لغاية لما حقق حلمهم ..
ساد الصمت لحظة ثم قال الرجل المسن :
بصراحة أنت وزملاؤك شباب شجعان وعندكم حق تتظاهروا .
اذا كنت مقتنع بكلامنا يبقى تنزل معنا يوم الجمعة .
أنا عمرى ما مشيت في مظاهرة .
ضحك الشاب وقال :
ولا يهمك . انزل معي المظاهرة وأنا حاخلي بالي منك
ضحك الرجل والشاب وراحا يتفقان على موعد ومكان اللقاء في مظاهرات الجمعة .
الديمقراطية هي الحل
------------------------------
Dralaa57@yahoo.com