هاني شكري يكتب: أنت مين فيهم؟

كل تعميم فيه ألف غلط، لكن مقارنة بعض المواقف ممكن تفتح العقول
1. أنا بأحمي مصر، طول عمري شايف إني عظيم لأن عمر ما حد انتقدني، كانت سلطاتي وصلاحياتي في النظام السابق لا يحدها إلا أوامر النظام نفسه وكان تدخله نادراً. كانت ميزاتي أيضاً كبيرة جداً وتعودت عليها. فجأة لقيت نفسي مسئول عن إدارة بلد في حالة ثورة والناس بتطلب مني أحاكم رئيسي السابق ورجاله، ومش بعيد بكره يطلبوا يحاكموني أنا كمان!!! بصراحة أنا مش فاهم حاجة وبأكره أي حد ينتقدني وبأعتبر إنه أكيد جزء من مؤامرة. أنا بأكره الشباب اللي أنا شايف إنه مضحوك عليه وإنه مخرب، وبأكرة الإخوان لأنهم عايزين يأكلوا البلد. أنا معظم المصريين معايا وبيحبوني، وناوي أفضل أحكم لأني أنا اللي عارف مصلحتهم كويس. أنا مين؟
2. أنا بأحرر مصر، من سنين وأنا جزء من حركة صغيرة لمقاومة النظام السابق، حركة اتحولت في يوم لملايين المصريين. بالنسبة لي مافيش مساومة في مقاومة الظلم. بعد الثورة، فيه ناس كتير سابتنا ورجعت البيت، ناس كتير عملوا فيها سياسيين وابتدوا يتفاوضوا مع الحكام على مكاسب سياسية ويدافعوا عنهم، فيه ناس فجأة كشرت عن أنيابها المتطرفة وعاملونا كأننا كفار. كل الناس قالت لنا نهدأ ونقعد، لكني شايف إن الثورة لازم تستمر لحد ما تنجح، ماينفعش أسكت واخواتي ماتوا وعينهم راحت ومنهم ناس بيتحاكموا عسكرياً، الإعلام بيصورنا للناس كأننا فوضويين، رغم إننا الوحيدين اللي بندافع عن الحق لآخر نفس. أنا مين؟
3. أنا بأحب مصر قوي، أنا الصراحة عمري ما كنت بأشارك في حاجة قبل الثورة، لكن في يناير نزلت لأني حسيت إن الوقت جه علشان نتغير. وقت ما كنا في التحرير كان فيه ناس كتير قوي بتشتمنا وتتهمنا بالعمالة والبلطجة. وقت الثورة اكتشفت إن كلنا زي بعض، الليبرالي والمتدين، الفقير والغني، المسيحي والمسلم، الراجل والست ... كلنا اخوات. بعد الثورة رجعت بيتنا وقعدت أتفرج على ناس بتسرق الثورة، ناس كانوا من النظام السابق ودلوقت بيتكلموا بإسمنا، ناس عايزين يقلبوا البلد أفغانستان كأننا شلنا ديكتاتور علشان نحط ديكتاتورية أكبر، وأحزاب بتقول كلام كويس لكن مش بتعمل حاجة خالص، وشباب مجانين عايزين يعتصموا كل يوم. أنا متضايق جداً علشن الوضع اللي احنا فيه، ومتهيألي لازم نرجع بالزمن تاني ليوم 11 فبراير ونبتدي من الأول صح. أنا مين؟
4. أنا اللي عايش في مصر، أنا مش فاهم الناس اللي فوق دي عايشة فين! ما كلنا بنحب مصر، بس الاقتصاد بايظ والأمن بايظ والتيارات الدينية هتأكل البلد. أيوه النظام السابق كان ليه غلطاته، لكن يعني عاجبكم اللي احنا فيه؟ وبعدين ما احنا عملنا استفتاء وقلنا للجيش أيوه، ما تسيبوه بقى يربي البلطجية ويحمينا من المؤامرات اللي محاوطنا من كل ناحية، هو معقولة نقعد كل يوم في ثورة علشان شوية شباب مجانين؟ إصلاح مصر يحصل بالعمل والعلم مش بالثورة. أنا مين؟
5. أنا ربنا هيوفقني وأصلح مصر، الناس ساعات كتير بتخاف مني من غير أي سبب. أنا كنت طول عمري جزء من حاجة بتتحرك وبتخدم وقت ما كان كل حاجة في مصر واقفة. إعلام النظام كان طول الوقت بيهاجمنا وأمنه بيطاردنا، وفي الظروف دي الواحد بيتعلم يبقى عملي ويعمل اتفاقات علشان يقدر يعيش. يوم 28 يناير طلب مننا قادتنا إننا ننزل التحرير وكان فيه ناس مننا نزلت من نفسها قبل كده رغم اعتراض قادتنا على ذلك. بعد الثورة، بقى واضح بالنسبة لي إننا أكبر مجموعة عاملة في مصر، وبصراحة دورنا إننا نقود البلد ونحقق رؤيتنا وشريعتنا. قادتنا فاهمين كويس إزاي نكسب المرحلة اللي جاية، والدنيا مش ثورة وخلاص. اللي أنا مش فاهمه هو ليه الناس بتستعملنا فزاعة، مع إن إيماننا وعقيدتنا هي أرقى العقائد وأعظمها، وأعدادنا في الثورة كانت مؤثرة جداً. أنا مين؟
6. أنا زعلان من مصر، طول عمري عايش جنب الحيط وجوة السور وعارف إني مختلف وأقلية، كل اللي كنت عايزه يا مصر إنك ما تقسيش عليَّ وتسيبيني أعيش وأصلي وأشتغل في حالي. النظام السابق كان بيذلنا ويعاملنا بتجاهل في مقابل حمايته لينا من مجانين التطرف، لكننا كنا راضيين، ولما الثورة قامت، فيه ناس مننا نزلت لكن أنا قلت لهم لأ لأن النظام هو اللي بيحمينا وما سمعوش الكلام. بعد الثورة قلنا حكامنا الجدد هيحمونا طلعوا أكثر قسوة علينا، بيوتنا وأماكن صلاتنا اتحرقت، ولادنا اتفرموا تحت المدرعات ومنهم اللي بيتحاكموا عسكرياً، أنا عمري ما كنت مع المظاهرات والاعتراضات والكلام اللي من ده، لكن ألاقيها منين ولا منين دلوقت؟ اللي بيكفروني علناً واللا اللي بيفرموني فرماً، ماليش غير ربنا بقى. أنا مين؟
7. أنا بأدعي لمصر، أنا كمان طول عمري في حالي، بأنزل أجر
ي على رزقي، ويوم الجمعة أحضر الخطبة وأدعي لديني وبلدي. فضيلة الشيخ على طول بيقول لنا إن مصر مقصودة من أعدائها الصهاينة، وإن دول ليهم عملاء في كل حتة، ودايماً كان بيحذرنا من الفتنة مع حكامنا اللي بيحمونا. أنا بصراحة نزلت في يوم من أيام التحرير وانبسطت جداً، ونزلت برضه لما فضيلة الشيخ قال لنا إن فيه مؤامرة على الدين وإن العلمانيين الكفرة عايزين يلغوا الدين، لكن أنا مش فاهم الناس اللي في التحرير دلوقت عايزين إيه؟ ما هو لازم السلطة تفرض هيبتها على الناس وإلا الدنيا تبقى سايبة، واللا أنتم عايزين البلد تولع، حسبي الله ونعم الوكيل. أنا مين؟
8. أنا بأعمل شغلي، الناس ما بتحبناش، طظ. أنا عندي أوامر إن مايبقاش فيه اعتصام يبقى مايبقاش فيه اعتصام، واللا انتم عايزين ولاد ال... دول يفرضوا رأيهم علينا ويكسبونا؟ في 28 يناير كان عددهم كبير قوي، إنما ده مش معناها إن كل مرة هنسيبهم بقى. أنا مش فارق معايا هم مين وعايزين إيه، أنا أوامري بأنفذها وده دوري واللي مش عاجبة يكلم اللي بيديني الأوامر. أنا مين؟
9. أنا بأرسم مستقبل مصر، أنا أفكاري ومواقفي كانت من أهم الحاجات اللي شجعت على قيام الثورة، لكني بعد الثورة حاولت إني أرسم خريطة سياسية للمرحلة اللي جاية، للأسف كل واحد بيدور على مصلحته، الشباب رغم حماسهم المستمر ما بيتفقوش، وزمايلي كل واحد منهم عمل حزب لحد ما بقوا 50 حزب، ورغم إيماني الغير منقوص بالثورة، لكني شايف إن نجاح الثورة لازم يكون نجاح سياسي مش بس شعبي، وده معناه نقعد على ترابيزة ونتفق على مباديء، مش كل واحد يكلم نفسه. أنا مين؟

بعد ما تفكر في كل المواقف اللي فوق، حاول تجاوب على اللي تحت:
1. مين من دول رفض تولي العسكر السلطة في فبراير، وليه؟
2. مين من دول رفض فكرة الاستفتاء ومين قبلها، وليه؟
3. مين من دول قال لأ للمحاكمات العسكرية، ومين طنش، وليه؟
4. مين من دول مصلحته إن الانتخابات تحصل ومين مصلحته تتأجل، وليه؟
5. مين عايز رئيس قبل الدستور ومين عايز دستور الأول وليه؟
6. مين عايز وثيقة السلمي ومين رافضها وليه؟
7. مين اللي في التحرير دلوقتِ، وليه؟
يارب الإجابات تنور العقول، واللي عايز شرح بالتفصيل يطلب. وأعتذر عن التعميم مرة أخرى، فمن المنتمين لكل فئة من الفئات المذكورة أعلاه من تتوافق مواقفهم مع فئات أخرى أكثر مما تتوافق مع أغلب دائرتهم
لو مش لاقي نفسك في ولا موقف، اكتب في التعليقات ... أنت مين؟