السيريالية حياة والسيريالية نجاة . بعد الهبوط الاضطراري من السما الوردية حصل احتباس حراري .. خلى الخدود وردية . والحبس الانفرادى وسع خيال السجين . والعمر الافتراضي مابيتحسبش بسنين . والناس كما يكونون وما أرادوه خافوا الأمل والألم .. جابوا صنم عبدوه . والانتحار الجماعي لألف شجرة على الطريق الزراعي وسع فى نهر الطريق . والانسداد المروري للميكروباس والتوكتوك تعبير عن الناس اللى عايزة تعيش وخافوا من قولة مفيش وضاقت الشرايين . ورغم ان القلب ما بيغلطش شبابنا شافوا الماتش فى استاد بلا جماهير . والتهديف تحت ضغط فى مباراة عبثية سيريالية شاركوا فى إحضار وضبط الناشط الرافض فى مشهد قوام نسيوه ومات ابوه .. مع اهتزاز الأرض وهاجرت العصافير . هاجرت معاهم جزر ومسكوا فى إيدين بعض راحوا لشبه الجزيرة من ارضنا لأرضهم مع إن الجزيرة أرض . واللى يزيد عن حاجتنا هو الأساس الناقص اللى يشيله اللودر . والرقص اصبح شتيمة على لسان الراقص وعلى لسان الشيوخ والمنطق المفشوخ على ميت لسان مشقوق جابهم ريموت الديكودر .