أحلام فتى بيتعالج!

يا جيمي البلد دي ملناش فيها عيش إحنا لازم نسافر... لازم نسافر
-انت اتجننت يابني نسيب البلد لمين !! انت شايف البلد اتحسنت وبقت عامله ازاي !!يعني بعد ما استحملت كل ده اسيبها أول ماحس بالتغيير !!
= اتحسنت ايه بس انت جرالك ايه !! ده انت اكتر واحد عارف حال البلد
- انت اكيد من اعداء الوطن... انت اجنده خارجيه.. البلد اتغيرت والناس كمان اتغيروا
سواقين التكاسي..بقوا بيشغلوا العداد... وبيودوك في أي حته انت عاوزها من غير مايتنكوا عليك...ولو تاه في النص بيوقف العداد عشان مايعدش عليك
وكمان فيه اتوبيسات نقل عام.. بتيجي في مواعيد محدده... وكل واحد ليه كرسي بتاعه... ده حتى الناس اللي كانت بتطلع تبيع جلد انابيب وحافظه بطاقه وفلايات...فتحوا محال في مول العرب وسيتي ستارز
البنات بطلت تحط الموبايل في الطرحه...وتلبس فسفوري على بنطلون أخضر..وتلبس نضاره شمس في المحاضرات....
والولاد بتتخرج تلاقي شغل... وتتجوز...وتروح جولدز جيم... وتتجوز تاني...من فرط الفلوس والبذخ اللي وصلناله
المدارس بقي فيها تعليم... والعيال بطلت تنط من على السور تتحرش بالبنات أو تجيب كشري في اكياس..
الحكومة نزلت عيش كايزر في الطابونه.... وبيدوا لبن رايب وجبنه ريكفورد في التموين
الناس مبقاش خلقها ضيق وبتضحك في وش بعض
مدام اميمه بتاعه الشئون بطلت تحط روج وبقت بتضحك في وش الطلبه وتخلصلهم ورقهم بسرعه من غير ماتقول على أي حاجه "هاتلي موافقه العميد "
Tedata مبقتش بتقطع والنت بقي سريع...وحرقوا خدمه العملاء عشان مبقناش محتاجنلها...احنا اصلا كده كده مش محتاجنلها
شركات المحمول بطلت تخصم ال 51 قرش كل شهر ضريبه دمغه... متعرفش كانت دمغه ايه بس مش مشكله اهي بطلت وخلاص
بقيت لما تيجي تشحن رصيدك وكنت بتبقي سالف من فودافون ال 12 جنيه... تلاقيها بعتالك مسج...تقولك " خليها علينا المره دي " وتحلف عليك 100 يمين قبل ماتسحبهم منك...مش زي زمان كانت بتسحبهم قبل مايقولك تم الشحن
...
امي بطلت تقولي قوم من على الزفت اللي انت قاعد عليه ليل نهار ده...وعملت اكونت هي كمان وبنتشات سوا
ده انا حتى آخر موقف حصلي واحد صاحبي عمل حادثه على الدائري وكان هيموت والإسعاف جت مفيش 5 دقايق وانقذوا حياته وصدر قرار ملكي... أنه يسافر يتعالج في فرنسا على نفقه الدوله...
وتقولي اسيب البلد!!! انت إرهابي يلا.. انت اكيد مش معانا
= يا جيمي فوق...فووووووق...من الاوهام والاحلام دي بالله عليك انا قلبي بيتقطع عليك يا اخي
-......................
من أسبوع فات....
-يادكتور بالله عليك شوفلي حل..... الشباب بينتحر كل يوم... والحياه بقت صعبه
= خد يا جيمي يابني الحبوب دي.... وادعيلي
- ده ايه ده !!! ‫ترامادول‬ !!! حد الله ياعم
= انت دماغك غلط كده على طول...دي حبوب هتحل مشاكل البلد أن شاء الله
- اسمها ايه ؟!
=دي ("اوهام "انتينال )... قرص كل 12 ساعه.... وده ("احلام"فلاجيل 250 mg) قرص كل 8 ساعات....هتمشي عليهم طول مانت عايش في مصر...اوعي تنسي جرعه عشان متحصلكش انتكاسه...
وخد كمان الكيس ده
- ايه ده ؟!
=لا ده كيس فوار مسكن عشان لو جالك صداع ولا حاجه هاهاها
-مفيش استشاره طيب ؟!
=لا مفيش وبلاش شغل المستوصفات الرخيص ده...