أبو لمعة الأصلي والحزام البمبى

أبو لمعة الأصلي هو شخصية ابتدعها الفنان محمدأحمد المصري رحمه الله ، واشتهر بفرقة ساعة لقلبك بهذا الإسم ،وهى شخصية تمثل المصرى الفهلوى الذى يضحك على الخواجات فى شخص الخواجة بيجو الذى كان أيضا من أعضاء فرقة ساعة لقلبك واسمه فؤاد راتب رحمه الله .وكان أبو لمعة والخواجة بيجو من الشخصيات التى أضافت البسمة علي وجوه كل من يسمعهم ، وكانا نجمين متألقين فى الخمسينات والستينات من القرن الماضى.
******
قال أبو لمعة : ياسلام ياخواجة ...يوم ما خدت بطولة العالم فى البوس..كان يوم..
الخواجة بيجو: أيه خِكاية البطولة دى؟
أبو لمعة : هوه انا ماقولتلكش ؟
الخواجة بيجو:لا يا خبيبى ما قولتليش...
أبو لمعة : كان يوم له العجب ياخواجة. أعلنوا فى بلاد الإسكيموعن مسابقة عالمية لأحسن بوّاس للممثلات بتوع برّه، خدت بعضى ورحت.
يوم المسابقة ،وقفوا الممثلات طابور طويل .. أوله فى الإسكيمو وآخره فى بولاق الدكرور ،ودخلنا احنا واحد ورا واحد وهات يابوس وأحضان فى الممثلات ، وقعدنا على كده كتير؟ 9 شهور ياخواجة، و كنت بابوس بسرعة 100 ممثلة فى الثانية ..
وبعدين لجنة التحكيم أعلنت فوزى ببطولة العالم فى البوس وخدت الحمّالة البمبى ..
الخواجة بيجو: أيه الخمّالة البمبى دى؟
أبو لمعة : هوه انا ماقولتلكش ؟ ياخواجة بطل العالم فى المصارعة بياخد حزام إسود ،وبطل العالم فى البوس بياخد حمّالة بمبى ، ودا كان بداية دخول الحمّالة فى مصر ، وبعدين بقى يلبسها اللى يسوا واللى مايسواش ..
الخواجة بيجو: مين اللى مايسواش ده يابو لمعة ..؟
أبو لمعة : إفتح قناة ال wc وانت تشوفه.. مُقرف وعامل نفسه أبو العُرِّيف وعمّال يهاجم فى الإسلام ..
بس يا خواجة ..ومن ساعتها كل ممثلات العالم يتمنّوا يبوسونى ، زى ما حصل يوم المعزى ..
الخواجة بيجو: أيه موضوع المعزى ده ؟
أبو لمعة : هوه انا ماقولتلكش ؟ ده كان يوم له العجب ياخواجة.... ما خبّيش عليك... أنا لقيت الولية أم لمعة مراتى كبرت وسلمّت النمر ،والبوسه منها بقى طعمها زىّ الأكل البايت الحمضان اللى بندّيه للبواب ،ووحشنى بوس الممثلات بتوع برّه ، قعدت افكّر، تعمل أيه يابو لمعة ؟.. تعمل أيه يابو لمعة ؟ ، قلت أعمل معزى.
الخواجة بيجو: معزى فى مين يابو لمعة ؟ هوه فيه خدّ مات ؟
أبو لمعة : هوه انا ماقولتلكش ؟ أنا قلت لام لمعة روحى عند ابوكى فى الصعيد اقعدى كام يوم لأنى مسافر بلاد الهونولولو.بس يا خواجة هيّه سافرت من هنا وانا ما كدِّبتش خبر، رحت عامل إعلان على صفحتى فى الفيس بوك والتويترشعلل الدنيا..
قاطعه الخواجة بيجو باستنكار وقال:
يالنافوخ بتاع الأنا !! فيس بوك أيه وتويتر أيه يابو لمعة ؟ هوه أيامنا كان فيه الخاجات دى؟ ده ما كانش فيه انترنت من أصله ..
أبو لمعة : أيوه صحيح...... فوّت دى يا خواجة.
الخواجة بيجو: خاضر ... راخ نفوّت ..أيه الإعلان ده على الفيس بوك والتويتر؟
أبو لمعة : ما طوّلش عليك قوللى لأ طوّل، أنا نشرت فى الإعلان أم لمعة ماتت، مفيش ساعة لقيت الرسائل جت لى بالملايين من ممثلات السينما فى هوليوود وأوربا وكلهم عايزين ييجوا العزا .
الخواجة بيجو: وعملت أيه فى المطبّ ده ؟
أبو لمعة : فوتّك فى الكلام ،أنا رحت عامل صوان فى الاستاد ، وجبت مقرئ عشان يحيي اليلة اسمه الشيخ منصر ،وواحد صاحبى اسمه الأستاذ محمد حلمى اللى بيكتب عمود يومى فى جورنان المصريون عنوانه صباحك عسل كان عارف إن الصوان ده ملعوب، وحبّ يلاعبنى ، فبعت لى مُقرئ مُلعب اسمه الشيخ مبعر..
قاطعه الخواجة بيجو باستنكار وقال: وهوه أيامنا كان فيه جورنال اسمه المصريون؟
أبو لمعة :آه.....ما تفوّت دى كمان يا خواجة..أخوك مزنوق ..
الخواجة بيجو"غاضبا": راخ نفوّت أيه واللا أيه يابو لمعة ؟
أبو لمعة : الله؟؟؟ اشمعنى يعنى فوّتوا للشيخ اللى قال أن من السنّة إن الراجل من دول لمّا يكون مسافر ويرجع من السفر ما يصحّش يدخل البيت على مراته كده زى النطع ولازم يتصل بيها الأول فى المحمول عشان لو معاها راجل بايتة فى حضنه تلحق تنفض له؟ هوه كان فيه محمول؟
الخواجة بيجو: خلاص ...راخ نفوّت دى كمان، بس بعد كده موش راخ نفوّت خاجة تانية أبدا. وبعدين؟ أيه اللى خصل؟
أبو لمعة : جم الممثلات يا خواجة م الشرق والغرب..لبست أنا الجلّابية الدبلان المخططة بتاعة أخويا شلبى ، وفوقيها الحزام البمبى ،ووقفت على باب الصوان آخد العزا......
الخواجة بيجو:وعملت أيه مع الممثلات بتوع برّه ؟
أبو لمعة : هوه انا ماقولتلكش ؟ كانت ليلة لها العجب يا خواجة... جم الممثلات واحدة ورا واحدة، وأول ماشافونى هجموا عليّه وهات يا أحضان وبوس..البركة فيك يابو لمعة ..كلّنا لها يابو لمعة ..آدى حال الدنيا يابو لمعة ..وبين كل كلمة وكلمة 100 حضن بوسة ..أصلهم بيحبّوا بوس الرجّالة الغُرب قوى ومتعودين عليه !!
وبعدين قعدوا يبوسوا المعازيم ، والمعزى اتقلب مبوسة..
الخواجة بيجو: طب و المشايخ عملوا أيه ؟
أبو لمعة :مشايخ مين يا خواجة ؟ سابوا القرآن ونزلوا بوس فى الممثلات...
لكن ياخواجه كله كوم ، والممثلة بتاعة البرازيل دى كوم ..
الخواجة بيجو: مين دى يا خبيبى؟
أبو لمعة : هوه انا ماقولتلكش ؟ ما كدبش عليك يا خواجة ..هيّه ممثلة يعنى مش قد كده، طول عمرها كومبارس بتاخد أدوار الدرجة التالتة ، يعنى تطلع كده فى دور خدّامة، وأكبر دور عملته كان عاملة نظافة فى دورة ميّه رجالى ، وبعدين كبرت وبقت قرشانة مش لاقية حدّ يبوسها، فبقت تتلكّك على أى مناسبة فيها ممثلين عشان روح تبوسهم ، حتى فى العزا ما بتعتقش ...
الخواجة بيجو: والقرشانة دى بتاعت البرازيل عملت أيه لمّا جت العزا ؟
أبو لمعة :كانت لابسة برنيطة عشان تدارى صلعتها، وبعد ما خلّصت بوس وأحضان معايا ،هجمت على المعازيم وهات يابوس وأحضان .....
لكن كله كوم يا خواجة، واللى حصل مع ام جميل حمّالة الحطب وزميلاتها لمّا جم العزا كوم..
الخواجة بيجو: أيه اللى خصل ؟
أبو لمعة : هوه انا ماقولتلكش ؟ المعازيم أول ما شافوهم هجموا عليهم و نزلواعلى دماغهم ضرب بالقباقيب .
الخواجة بيجو: ما كانش معاهم رجّالة يخموهم ؟
أبو لمعة :كان معاهم ابولهب وابو قُصة ، وابو حمّالة وابو ديل..بس ما خبّيش عليك.. كانوا مشغولين.... نازلين بوس وأحضان فى بعض..!!
لكن يا خواجة كله كوم..... و اللى حصل مع ابوستيللا كوم..
الخواجة بيجو: مين ابوستيللا ده ؟
أبو لمعة :هوه انا ماقولتلكش ؟ ده هلفوت جه ومعاه قرشانة لابسة قميص نوم شفتشى أحمر شفّاف وف إيدها كوتشينة... وهوه ماسك فى إيده إزازة مكتوب عليها " خمرة الأخلاق" وكانوا سكرانين.... بس ياخواجة.. وعينك ما تشوف إلا النّور...المعازيم أول ماشافوهم هجموا عليهم وخدوهم فى الدِرا .....
الخواجة بيجو: وعملوا فيهم أيه ؟
أبو لمعة : ما طوّلش عليك ..الست خرجت بعد ساعتين حامل فى 3 توائم..
الخواجة بيجو: : طب و ابوستيللا ؟
أبو لمعة : هوه انا ماقولتلكش ؟ حامل فى 3 توائم برضه.!!
****