1 - بوستات المرأة المطحونة اللى جوزها مش مقدرها واد ايه انتى لازم تقللى مجهودك شوية لأن مفيش رجالة يستاهلوا يا اختى وكدة وياحبذا لو البوست مطعم بحلم أو اتنين من بتوع الحاج مستغانمى اللى بكره تجيبلك سيد سيده لأنه ميستاهلش ضافرك وغالبا بتكون التعليقات عليها من نوعيه " اه والله " وزوجات ممنشنه بعضها والكثير من ال "مسم" = مصمصه الشفايف.. الجمهور المستهدف من 25 إلى 35 سنه.. 2 - بوستات المحن بتاع لو لقيتها بتعيط بوسها احضنها افعصها خدها فومين غسيل وطبطب عليها من سكات وامسح على شعرها وادفنها ف حضنك واحرقها وانثر الرماد على نهر اليانج والكثير من الهااااح والشبابيك اللى بتعمل هاشتاجات ملهاش معنى زى #حب #حضن #محن #كهن الجمهور المستهدف من 16 إلى 22 سنه.. 3 - بوستات حبى نفسك واحضنيها ومتعيطيش وهاتى شيكولاته وكلى لما يجيلك انفجار في جدار المعده وخليى ثقتك بس في القهوه لأن حماده شايفك شهوه ولانهم ميستاهلوشى.. الجمهور المستهدف من 28 إلى 34 سنه.. 4 - بوستات افوره المغتربين في بلاد أوربا اللى على طريقه انا كنت رايح الشغل وبعدين اتوبيس نقل عام داس على رجل كتكوت رضيع فسلاح الطيران الالمانى بعت طياره خدت الكتكوت سفرته يتعالج بره وصرفت تعويض لامه ووفرتلها وظيفه بمرتب عالى في وزارة العدل الالمانية..وياحسره علينا وعلى بلدنا الجمهور المستهدف من 30 إلى 35 سنه..