10 طرق تفرحي بيهم قلب ماما

السلام عليكم ورحمه الله وبركاته أنا مش هاطول عليكم، مشكلتي باختصار إني كان ليا أختين بنات وأمي كانت متعلقة بيهم جدا وهما اتجوزوا وراء بعضهم، وسافروا بعيد. وأمي حالتها نفسيا متدهورة، ومش عارفة إزاي أحسسها وأخليها سعيدة وأنا عندي 14 سنة.
مجهولة
أنا سعيدة بيكي وبرسالتك جدا، وفرحانة إنك رغم صغر سنك بتفكري إزاي تسعدي أمك وده مهم، لأن الزعل عادة بتكون نتيجته سيئة سواء على صحة مامتك النفسية أو الجسدية، وعشان يكون ردي عملي هاحاول أقول لك كام طريقة هيفرّحوا مامتك إن شاء الله، ونصيحتي إنك تحاولي تعمليهم من وقت للتاني لغاية ما مامتك تبدأ تتعود على بُعد إخواتك.

1- أول حاجة كل يوم الصبح وإنت بتصبّحي عليها ارمي نفسك في حضنها واحضنيها قوي وبوسيها.. ومن وقت للتاني ادّلّعي عليها، وروحي اقعدي جنبها، ونامي على رجلها، وهزري معاها، التلامس أحيانا بيكون علاج صدقيني.
2- ما تنسيش تجيبي لها حاجات صغيرة هدية من وقت للتاني، حاجة مش مكلفة بس هي بتحبها، ولما يكون في إيدك حاجة اقسميها معاها.
3- اتفقي مع إخواتك من وراها إنهم يبعتوا لك صور ليهم واطبعيها وحطيهم قدامها.
4- نبهي على إخواتك مش يحكوا لها على أي حاجة تزعلها علشان ما تقلقش عليهم، وبرضه يحكوا دايما على الحاجات الكويسة اللي بتحصل عشان هي هتنبسط لو حست إنهم مرتاحين.
5- لو عندك كمبيوتر حطي على شاشته صورة لكم مع بعض، وخليها تحس إنهم لسه موجودين حواليها في كل مكان.
6- قولي لها تنزل تتمشي معاكي، واتكلموا سوا، وجربي تبقوا صحاب.
7- قولي لباباكي على إحساسك، ورتبي معاه مفاجآت وحاجات حلوة علشانها؛ خصوصا في عيد ميلادها وعيد الأم.
8- اقعدوا اتفرجوا على أفلام كوميدية ومسرحيات سوا، وشاركيها في الحاجات اللي بتحبها.
9- اقفي معاها في المطبخ حتى لو مش هتعملي حاجة، حاولي ترغي معاها في أي موضوع، اسأليها إزاي بتعمل الأكل أو عن الأسعار أو خليها تحكي لك عن اللي شافته النهارده في السوق.
10- حاولي دايما تسهّلي اتصال إخواتك بيها واتصالها بيهم؛ خصوصا في المناسبات على طول تفكريهم.

بس كده، وربنا يفرّح قلبها ويبعد عنها الزعل ويقدّرك تساعديها وتسعديها زي ما هي ربتكوا ووقفت جنبكوا وساعدتكوا لغاية ما بقيتوا عرايس..