"وهان عليك".. قصيدة ل "منى حوّاس"

(1)
وهان عليك
تتوضّى من دمع القمر
وتقيم صلاة الغدر
فوق جثّة حبيبة مُخلصة
ف حضن كوكب عتمتك
مليت كاساتك بالخمور
وف صحّتك
البنت تشرب دمعتك
ف الكاس رغاوي ضحكتك
والدمع نازل من عينيها
بذمّتك .....
مااتكسفتش؟ !
وانت شايف دمعها
شلّال مطر
يا حزن كل الكون
وحسرة ده الفضا
من قسوتك
ليلة ما بكّيت القمر
......................
(2)
ف لحظة تترصّ الصور
يتجمّعوا الأموات .....
ف حضن الذاكرة
همّا اللي عاشوا
وانت ميِّت من سُكات
فبلاش .....
تجادل ف اللي فات
وبلاش تصحّي الذكريات
كان لك ف قلبي :
حروف قصايد من لُقا
وامّا التقينا بالفراق
الشِعر مات
.................
(3)
الشمس رافضة ضمّتك
ورافضة حتى
إنها تظهر
على الأرض اللي ضامّة خطوتك
الشمس طاهرة
واللي زيّك
ما يستاهلشي طُهرها
الشمس ودعت سرّها
ف اللي يستاهلوا الظهور
وانت عتمة ....
إزاي تبان
تحت سقف الشمس
نور؟!!.