أمير يوسف ل حلمي بكر: "وصفك للأندرجرواند بالشحاتين إهانة للفنانين والنقد عمره ما كان بالشتيمة"

أحدث تصريح الموسيقار حلمي بكر، الذي وصف فيه فناني الأندرجرواند والفن المستقل بكونهم "شحاتين"، و"معندهمش فن"، بلبلة وردود فعل سلبية موسعة لدى نجوم الوسط المستقل، مما رأوا فيه "إهانة" لهم.
ومن جانبه قال الفنان أمير يوسف، في تصريح ل "بوابة الأندرجراوند": " التصريح ده لو قاله بشكل عام فهو أكيد يعتبر إهانة وشتيمة لكل فناني الأندرجرواند والوسط المستقل، لأنه مينفعش اوجه نقد لو اعتبرنا كلامه نقد لحد أو حاجة بشكل عام جدًا بدون تحديد أو توضيح، واوقول عليها وحشة وأشتمها، لان الكلام كده مش هيبقى نقد بناء هيندرج تحت مسمى "سب وإهانة"".
كما أضاف أمير: " لو فرضنا إن تصريح الأستاذ حلمي كان يقصد بيه ينقد ويقول إن وسط الأندرجراوند مش كله كويس ومش كل اللي فيه فنانين، فممكن أتفق ظاهريا معاه في حتة إن فعلا فيه ناس في الوسط مش بيقدموا حاجة مفيدة أو معندهمش موهبة، ومحسوبين على الأندرجرواند، وأكيد برضه زي ما فيه حاجة كويسة وفن كويس فيه اكيد جانب سلبي، بس الغلط إن الكلام يبقى عام وعايم بدون تحديد لحاجة معينة أو حتى توجيه رؤية نقدية واضحة تتناقش وتتفهم".
وأشار أمير إلى أن وسط الأندرجراوند والفن المستقل يضم عددًا ضخمًا من الفنانين، وكون وصفهم ب "الشحاتين" فبحد ذاته "حاجة غلط" ولم يكن من المفترض أن تخرج من قامة فنية كبيرة مثل حلمي بكر، قائلًا: " الحكم الوحيد في إن الفن ده كويس أو لأ من وجهة نظري هو الجمهور اللي بيسمع ويشوف وبيقيم، فأنا ميهمنيش كلام حد معين أيًا كان، بقدر ميهمني تقدير الجمهور، لأنه هو اللي بيكون سبب نجاح أو فشل أي فنان".