«الاندرجراوند باند» أو فرق الشارع، نوع من أنواع الغناء الشبابى ظهر على الساحة بعد الثورة بشكل كبير، تفجرت جوي طاقة غير عادية فملوا الشوارع غنا وفن وأزعجوا السياسيين بصوتهم الغني بالحماسة، وقلقوا الحكام سواء كان المجلس العسكرى أو من قبله مبارك ولسة فى انتظار وضعهم مع الحكم الإسلامى.
فرق الاندرجراوند كانت موجودة قبل الثورة ولكن كان صوتهم خافت، وبعد الثورة صوتهم ارتفع وجلجل وكان بيشحن الميدان للصمود حتى إسقاط النظام «اتكلم» تقابلت مع شباب منهم وسألتهم عن سبب شهرتهم بعد الثورة وأيه دورهم فى المجتمع؟
أحمد ياسين مغنى فريق «عشرة غربى» قال أيوه أندرجراوند باند صوته على بعد الثورة رغم انه كان موجود من قبل الثورة بس محدش كان بيسمعه بسبب توجهات النظام السابق اللى مكنش بيرعى أى نوع من الفنون، وبما أن اللى بدأ شرارة الثورة شباب فبدأت الناس تلتفت أن فيه شباب بيعبروا بشكل فنى جديد وأن الثورة ليها صوت بيعبر عنهم هو الأندرجراوند، والفرق دى بعد الثورة أثبتت تميزها ووجودها، واعتقد أن الفترة الجاية هتظهر فرق تانية وهيكون اتجاه واضح للبلد وليه جمهوره اللى بيحبه بس الموضوع عايز وقت عشان الثقافة دى تنتشر أكتر والناس تحبها. ياسين أكد: «أكبر عقبة بتقابل الأندرجراوند هى ان فيه حفلات ومهرجانات بتتوقف ومش بناخد تصاريح لإقامتها من أيام الفترة الانتقالية والسبب الكلمة الشهيرة (دواع أمنية) واضاف : «بصراحة أنا مش مقتنع بالسبب ده لأن الأمن لما يحب يأمن حاجة بيأمنها كويس ولما بيكون ملوش مزاج يأمن حاجة مش هيأمنها وده من أيام مبارك لغاية النهاردة، مع أن مهرجانات الشارع مش بيكون فيها مشاكل كبيرة عشان تحتاج قدر كبير من التأمين زى «الفن ميدان» و«الكوربة» محدش بيأمنها عشان الناس رايحة تعمل مزيكا حلوة وتتبسط بس هما بيكون عندهم مشكلة فى الكلام اللى بيتقال.
ياسين شايف: إن دور «الاندر جراوند باند» بيحاول يوصل للناس المبادئ اللى بتخلى اى انسان يعيش محترم زى الحرية والعدالة والأمن ونبذ العنف وثقافة الحوار وكل ده بيدى دفعة للمجتمع للرقى، وف الاول والآخر احنا كفنانين دورنا اننا نخلى حياة الناس أحسن وبنعبر عن ده من خلال الأغانى بتاعتنا».
أسامة الهادى «23 عاما» مطرب فى فريق «زيرو خمسين» قال: «الشارع بقى له صوت مسموع بعد الثورة و«الأندرجراوند باند» فرق بتقدم فن مستقل هو جزء من صوت الشارع لكن بالموسيقى، ودا اللى خللى الناس بدأت تفهم وتستوعب نوعيات الأغانى اللى بنقدمها واللى مكنتش موجودة ومتوفرة ايام مبارك، وكمان الكوادر اللى كانت موجودة قبل الثورة زى فرقة (وسط البلد) أثروا على شهرتنا بعد الثورة بعد ما أدوا انطباع كويس عند الناس اللى بدأت تبص لاغانينا وتحب تسمعنا.
أكد «اسامة» أن مفيش أى مشاكل أو تضييقات أمنية بتحصل لفرقته، وقال: احنا بنفضل فى فرقتنا تقديم الاغانى الاجتماعية اكتر من السياسية علشان نلفت نظر الناس للمشاكل الموجودة فى المجتمع زى أطفال الشوارع اللى عملنا بيها اغنية بتقول «أنا طفل معنديش ولا لعبة وبطوب الأرض ببنى قصور»، مضيفًا: «فى نفس الوقت لما يكون فيه حاجة مستفزة بنعمل ليهم اغنية، وده حصل بالفعل فى أحداث مجزرة بورسعيد اللى عملنا عليها اغنية بعد الحادثة ب24 ساعة»..
أمير يوسف، 25 سنة، مغنى فى فريق «كلاكيت» شرح سر تفضيل الناس لفرق الاندر جراوند بعد الثورة فقال: «الناس زهقت من الأغانى اللى بقت شبه بعضها وكلها بتتكلم عن الحب والفراق والغدر والخيانة وعشان كدة لما ظهرنا حصل اقبال علينا لان اغانينا جديدة، واحنا على فكرة – فرق الاندر جراوند - موجودين من زمان لكن كان فيه تعتيم علينا من قبل الامن وكان فيه أغانى امن الدولة بيمنعها ايام مبارك ومينفعش تنزل فى التليفزيون، وكان بيجى لبعضهم رسايل تهديد من مجهولين، لكن صوتنا هزم امن الدولة وحضن الناس، وقدرنا نحقق ذاتنا فى الشارع لاننا صادقين فى اللى بنقوله ومتحمسين ليه.
يوسف أضاف: «احنا بنغنى كل حاجة فى الدنيا بس بنميل اكتر للاغانى الاجتماعية، وعملنا 7 أغانى عن الثورة، واغانينا بنحاول من خلالها نوصل فكرتنا عن كل حاجة بنشوفها رغم أنها مش بتجيب دخل كويس، بالعكس احنا بنصرف عليها من جيوبنا والحفلات مش بتغطى اللى بندفعه».
إبراهيم فاروق، 30 سنة، مغنى فى فرقة «أسفلت»، شايف ان «الأندرجراوند» أكتر ناس بتعبر عن الثورة، لانهم بيغنوا أغانى سياسية واجتماعية. فاروق كمل كلامه: «استمدينا قوتنا وتواجدنا فى الشارع علشان أغانينا مختلفة عن الغناء التقليدى والتجارى، بس مشكلتنا أن معندناش نقابة تحمى حقوقنا الفكرية وللأسف صوتنا اللى اسقط النظام فى الميدان لما بيدخل اختبارات نقابة الموسيقيين بيسقطوه لأننا بنغنى راب، وف كل حفلة بتيجى المصنفات الفنية ومتخلناش نغنى غير بالعافية».
فاروق رصد مخاوفه من ان الحرية اللى جلبتها الثورة تضيع فى تضييق الاسلاميين عليهم وده كان باين فى حكاية كلمنا عنها بتقول: «مرة فريق (سلالم) كان بيغنى فى حفلة فى المنصورة حد تقريبا منتمى للإسلاميين وشغل قرآن جنبهم عشان يسكتوا وميغنوش، وبالفعل الحفلة اتوقفت».
رامى عصام المعروف بمطرب الثورة، كلمنا عن سبب ظهور الاندر جراوند بقوة بعد الثورة وقال: «لما الناس عملت ثورة على النظام كان لازم يكون فيه فن بديل هادف للفن التقليدى يحمل الرسالة اللى عايزين يوصلوها وأهم شئ بيحرك الناس وبيأثر فيهم هو الفن، ودا كان سبب ارتفاع شعبية الاندرجراوند عند الناس بعد الثورة.
- عصام اكد : «الحرية مش مطلقة وزى ما كان فيه قيود على «الاندرجراوند» ايام مبارك، فى تضييق حاليا على الفرق دى، لكن مش بنفس القدر بتاع مبارك، الحرية كانت موجودة بشكل ملموس قوى فترة اندلاع الثورة وحتى قيام النظام الجديد ووجود رئيس منتخب، يمكن الحرية دلوقتى أحسن من أيام مبارك لأن النظام الجديد بيقلق من الفنانين ومن الشعب ومش عايز يستفزه».
- «رامى» اضاف: «مش كل فنانى الأندرجراوند بيعملوا أغانى ضد النظام لكنى كفنان مستقل حريص على عمل أغانى ضد اللى بيحصل فى البلد لأن الحالة الثورية لن تنتهى من الشارع ولازم الفن يكون مركز على الثورة، ايوه أنا بعمل أغانى اجتماعية، بس مش هبطل أغانى عن الثورة عشان الثورة لسه منتهتش».
